4. චතුත්ථවග්ගො

1. මිගසිරත්ථෙරගාථා

181. ‘‘යතො අහං පබ්බජිතො, සම්මාසම්බුද්ධසාසනෙ;

විමුච්චමානො උග්ගච්ඡිං, කාමධාතුං උපච්චගං.

182. ‘‘බ්‍රහ්මුනො පෙක්ඛමානස්ස, තතො චිත්තං විමුච්චි මෙ;

අකුප්පා මෙ විමුත්තීති, සබ්බසංයොජනක්ඛයා’’ති.

… මිගසිරො ථෙරො….

2. සිවකත්ථෙරගාථා

183. ‘‘අනිච්චානි ගහකානි, තත්ථ තත්ථ පුනප්පුනං;

ගහකාරං [ගහකාරකං (සී. පී.)] ගවෙසන්තො, දුක්ඛා ජාති පුනප්පුනං.

184. ‘‘ගහකාරක දිට්ඨොසි, පුන ගෙහං න කාහසි;

සබ්බා තෙ ඵාසුකා භග්ගා, ථූණිකා [ථූණිරා (පී. ක.), ධුණිරා (ස්‍යා.)] ච විදාලිතා [පදාලිතා (සී. ස්‍යා.)];

විමරියාදිකතං චිත්තං, ඉධෙව විධමිස්සතී’’ති.

… සිවකො [සීවකො (සී.)] ථෙරො….

3. උපවාණත්ථෙරගාථා

185. ‘‘අරහං සුගතො ලොකෙ, වාතෙහාබාධිතො [… බාධිතො (ක.)] මුනි;

සචෙ උණ්හොදකං අත්ථි, මුනිනො දෙහි බ්‍රාහ්මණ.

186. ‘‘පූජිතො පූජනෙය්‍යානං [පූජනීයානං (සී.)], සක්කරෙය්‍යාන සක්කතො;

අපචිතොපචෙය්‍යානං [අපචනීයානං (සී.), අපචිනෙය්‍යානං (ස්‍යා.)], තස්ස ඉච්ඡාමි හාතවෙ’’ති.

… උපවාණො ථෙරො….

4. ඉසිදින්නත්ථෙරගාථා

187. ‘‘දිට්ඨා මයා ධම්මධරා උපාසකා, කාමා අනිච්චා ඉති භාසමානා;

සාරත්තරත්තා මණිකුණ්ඩලෙසු, පුත්තෙසු දාරෙසු ච තෙ අපෙක්ඛා.

188. ‘‘අද්ධා න ජානන්ති යතොධ ධම්මං, කාමා අනිච්චා ඉති චාපි ආහු;

රාගඤ්ච තෙසං න බලත්ථි ඡෙත්තුං, තස්මා සිතා පුත්තදාරං ධනඤ්චා’’ති.

… ඉසිදින්නො ථෙරො….

5. සම්බුලකච්චානත්ථෙරගාථා

189. ‘‘දෙවො ච වස්සති දෙවො ච ගළගළායති,

එකකො චාහං භෙරවෙ බිලෙ විහරාමි;

තස්ස මය්හං එකකස්ස භෙරවෙ බිලෙ විහරතො,

නත්ථි භයං වා ඡම්භිතත්තං වා ලොමහංසො වා.

190. ‘‘ධම්මතා මමසා යස්ස මෙ, එකකස්ස භෙරවෙ බිලෙ;

විහරතො නත්ථි භයං වා, ඡම්භිතත්තං වා ලොමහංසො වා’’ති.

… සම්බුලකච්චානො [සම්බහුලකච්චානො (ක.)] ථෙරො….

6. නිතකත්ථෙරගාථා

191. [උදා. 34 උදානෙපි] ‘‘කස්ස සෙලූපමං චිත්තං, ඨිතං නානුපකම්පති;

විරත්තං රජනීයෙසු, කුප්පනීයෙ න කුප්පති;

යස්සෙවං භාවිතං චිත්තං, කුතො තං දුක්ඛමෙස්සති.

192. ‘‘මම සෙලූපමං චිත්තං, ඨිතං නානුපකම්පති;

විරත්තං රජනීයෙසු, කුප්පනීයෙ න කුප්පති;

මමෙවං භාවිතං චිත්තං, කුතො මං දුක්ඛමෙස්සතී’’ති.

… නිතකො [ඛිතකො (සී. ස්‍යා.)] ථෙරො….

7. සොණපොටිරියත්ථෙරගාථා

193. ‘‘න තාව සුපිතුං හොති, රත්ති නක්ඛත්තමාලිනී;

පටිජග්ගිතුමෙවෙසා, රත්ති හොති විජානතා.

194. ‘‘හත්ථික්ඛන්ධාවපතිතං, කුඤ්ජරො චෙ අනුක්කමෙ;

සඞ්ගාමෙ මෙ මතං සෙය්‍යො, යඤ්චෙ ජීවෙ පරාජිතො’’ති.

… සොණො පොටිරියො [සෙලිස්සරියො (සී.), පොට්ටිරියපුත්තො (ස්‍යා.)] ථෙරො ….

8. නිසභත්ථෙරගාථා

195. ‘‘පඤ්ච කාමගුණෙ හිත්වා, පියරූපෙ මනොරමෙ;

සද්ධාය ඝරා නික්ඛම්ම, දුක්ඛස්සන්තකරො භවෙ.

196. ‘‘නාභිනන්දාමි මරණං, නාභිනන්දාමි ජීවිතං;

කාලඤ්ච පටිකඞ්ඛාමි, සම්පජානො පතිස්සතො’’ති.

… නිසභො ථෙරො….

9. උසභත්ථෙරගාථා

197. ‘‘අම්බපල්ලවසඞ්කාසං, අංසෙ කත්වාන චීවරං;

නිසින්නො හත්ථිගීවායං, ගාමං පිණ්ඩාය පාවිසිං.

198. ‘‘හත්ථික්ඛන්ධතො ඔරුය්හ, සංවෙගං අලභිං තදා;

සොහං දිත්තො තදා සන්තො, පත්තො මෙ ආසවක්ඛයො’’ති.

… උසභො ථෙරො….

10. කප්පටකුරත්ථෙරගාථා

199. ‘‘අයමිති කප්පටො කප්පටකුරො, අච්ඡාය අතිභරිතාය [අතිභරියාය (සී. ක.), අච්චං භරාය (ස්‍යා.)];

අමතඝටිකායං ධම්මකටමත්තො [ධම්මකටපත්තො (ස්‍යා. ක. අට්ඨ.), ධම්මකටමග්ගො (සී. අට්ඨ.)], කතපදං ඣානානි ඔචෙතුං.

200. ‘‘මා ඛො ත්වං කප්පට පචාලෙසි, මා ත්වං උපකණ්ණම්හි තාළෙස්සං;

න හි [න වා (ක.)] ත්වං කප්පට මත්තමඤ්ඤාසි, සඞ්ඝමජ්ඣම්හි පචලායමානොති.

… කප්පටකුරො ථෙරො….

වග්ගො චතුත්ථො නිට්ඨිතො.

තස්සුද්දානං –

මිගසිරො සිවකො ච, උපවානො ච පණ්ඩිතො;

ඉසිදින්නො ච කච්චානො, නිතකො ච මහාවසී;

පොටිරියපුත්තො නිසභො, උසභො කප්පටකුරොති.