9. මාගණ්ඩියසුත්තං

841. ‘‘දිස්වාන තණ්හං අරතිං රගඤ්ච [අරතිඤ්ච රාගං (ස්‍යා. ක.)], නාහොසි ඡන්දො අපි මෙථුනස්මිං;

කිමෙවිදං මුත්තකරීසපුණ්ණං, පාදාපි නං සම්ඵුසිතුං න ඉච්ඡෙ’’.

842. ‘‘එතාදිසං චෙ රතනං න ඉච්ඡසි, නාරිං නරින්දෙහි බහූහි පත්ථිතං;

දිට්ඨිගතං සීලවතං නු ජීවිතං [සීලවතානුජීවිතං (සී. පී. ක.)], භවූපපත්තිඤ්ච වදෙසි කීදිසං’’.

843. ‘‘ඉදං වදාමීති න තස්ස හොති, (මාගණ්ඩියාති [මාගන්දියාති (සී. ස්‍යා. පී.)] භගවා)

ධම්මෙසු නිච්ඡෙය්‍ය සමුග්ගහීතං;

පස්සඤ්ච දිට්ඨීසු අනුග්ගහාය,

අජ්ඣත්තසන්තිං පචිනං අදස්සං’’.

844. ‘‘විනිච්ඡයා යානි පකප්පිතානි, (ඉති මාගණ්ඩියො [මාගන්දියො (සී. ස්‍යා. පී.)] )

තෙ වෙ මුනී බ්‍රූසි අනුග්ගහාය;

අජ්ඣත්තසන්තීති යමෙතමත්ථං,

කථං නු ධීරෙහි පවෙදිතං තං’’.

845. ‘‘න දිට්ඨියා න සුතියා න ඤාණෙන, (මාගණ්ඩියාති භගවා)

සීලබ්බතෙනාපි න සුද්ධිමාහ;

අදිට්ඨියා අස්සුතියා අඤාණා,

අසීලතා අබ්බතා නොපි තෙන;

එතෙ ච නිස්සජ්ජ අනුග්ගහාය,

සන්තො අනිස්සාය භවං න ජප්පෙ’’.

846. ‘‘නො චෙ කිර දිට්ඨියා න සුතියා න ඤාණෙන, (ඉති මාගණ්ඩියො)

සීලබ්බතෙනාපි න සුද්ධිමාහ;

අදිට්ඨියා අස්සුතියා අඤාණා,

අසීලතා අබ්බතා නොපි තෙන;

මඤ්ඤාමහං මොමුහමෙව ධම්මං,

දිට්ඨියා එකෙ පච්චෙන්ති සුද්ධිං’’.

847. ‘‘දිට්ඨඤ්ච නිස්සාය අනුපුච්ඡමානො, (මාගණ්ඩියාති භගවා)

සමුග්ගහීතෙසු පමොහමාගා [සමොහමාගා (ස්‍යා. ක.)];

ඉතො ච නාද්දක්ඛි අණුම්පි සඤ්ඤං,

තස්මා තුවං මොමුහතො දහාසි.

848. ‘‘සමො විසෙසී උද වා නිහීනො, යො මඤ්ඤතී සො විවදෙථ තෙන;

තීසු විධාසු අවිකම්පමානො, සමො විසෙසීති න තස්ස හොති.

849. ‘‘සච්චන්ති සො බ්‍රාහ්මණො කිං වදෙය්‍ය, මුසාති වා සො විවදෙථ කෙන;

යස්මිං සමං විසමං වාපි නත්ථි, ස කෙන වාදං පටිසංයුජෙය්‍ය.

850. ‘‘ඔකං පහාය අනිකෙතසාරී, ගාමෙ අකුබ්බං මුනි සන්ථවානි [සන්ධවානි (ක.)];

කාමෙහි රිත්තො අපුරෙක්ඛරානො, කථං න විග්ගය්හ ජනෙන කයිරා.

851. ‘‘යෙහි විවිත්තො විචරෙය්‍ය ලොකෙ, න තානි උග්ගය්හ වදෙය්‍ය නාගො;

ජලම්බුජං [එලම්බුජං (සී. ස්‍යා.)] කණ්ඩකං වාරිජං යථා, ජලෙන පඞ්කෙන චනූපලිත්තං;

එවං මුනී සන්තිවාදො අගිද්ධො, කාමෙ ච ලොකෙ ච අනූපලිත්තො.

852. ‘‘න වෙදගූ දිට්ඨියායකො [න වෙදගූ දිට්ඨියා (ක. සී. ස්‍යා. පී.)] න මුතියා, ස මානමෙති න හි තම්මයො සො;

න කම්මුනා නොපි සුතෙන නෙය්‍යො, අනූපනීතො ස නිවෙසනෙසු.

853. ‘‘සඤ්ඤාවිරත්තස්ස න සන්ති ගන්ථා, පඤ්ඤාවිමුත්තස්ස න සන්ති මොහා;

සඤ්ඤඤ්ච දිට්ඨිඤ්ච යෙ අග්ගහෙසුං, තෙ ඝට්ටයන්තා [ඝට්ටමානා (ස්‍යා. ක.)] විචරන්ති ලොකෙ’’ති.

මාගණ්ඩියසුත්තං නවමං නිට්ඨිතං.