11. කලහවිවාදසුත්තං

868. ‘‘කුතොපහූතා කලහා විවාදා, පරිදෙවසොකා සහමච්ඡරා ච;

මානාතිමානා සහපෙසුණා ච, කුතොපහූතා තෙ තදිඞ්ඝ බ්‍රූහි’’.

869. ‘‘පියප්පහූතා කලහා විවාදා,

පරිදෙවසොකා සහමච්ඡරා ච;

මානාතිමානා සහපෙසුණා ච,

මච්ඡෙරයුත්තා කලහා විවාදා;

විවාදජාතෙසු ච පෙසුණානි’’.

870. ‘‘පියා සු [පියානු (ස්‍යා.), පියස්සු (ක.)] ලොකස්මිං කුතොනිදානා, යෙ චාපි [යෙ වාපි (සී. ස්‍යා. පී.)] ලොභා විචරන්ති ලොකෙ;

ආසා ච නිට්ඨා ච කුතොනිදානා, යෙ සම්පරායාය නරස්ස හොන්ති’’.

871. ‘‘ඡන්දානිදානානි පියානි ලොකෙ, යෙ චාපි ලොභා විචරන්ති ලොකෙ;

ආසා ච නිට්ඨා ච ඉතොනිදානා, යෙ සම්පරායාය නරස්ස හොන්ති’’.

872. ‘‘ඡන්දො නු ලොකස්මිං කුතොනිදානො, විනිච්ඡයා චාපි [වාපි (සී. ස්‍යා. පී.)] කුතොපහූතා;

කොධො මොසවජ්ජඤ්ච කථංකථා ච, යෙ වාපි ධම්මා සමණෙන වුත්තා’’.

873. ‘‘සාතං අසාතන්ති යමාහු ලොකෙ, තමූපනිස්සාය පහොති ඡන්දො;

රූපෙසු දිස්වා විභවං භවඤ්ච, විනිච්ඡයං කුබ්බති [කුරුතෙ (බහූසු)] ජන්තු ලොකෙ.

874. ‘‘කොධො මොසවජ්ජඤ්ච කථංකථා ච, එතෙපි ධම්මා ද්වයමෙව සන්තෙ;

කථංකථී ඤාණපථාය සික්ඛෙ, ඤත්වා පවුත්තා සමණෙන ධම්මා’’.

875. ‘‘සාතං අසාතඤ්ච කුතොනිදානා, කිස්මිං අසන්තෙ න භවන්ති හෙතෙ;

විභවං භවඤ්චාපි යමෙතමත්ථං, එතං මෙ පබ්‍රූහි යතොනිදානං’’.

876. ‘‘ඵස්සනිදානං සාතං අසාතං, ඵස්සෙ අසන්තෙ න භවන්ති හෙතෙ;

විභවං භවඤ්චාපි යමෙතමත්ථං, එතං තෙ පබ්‍රූමි ඉතොනිදානං’’.

877. ‘‘ඵස්සො නු ලොකස්මි කුතොනිදානො, පරිග්ගහා චාපි කුතොපහූතා;

කිස්මිං අසන්තෙ න මමත්තමත්ථි, කිස්මිං විභූතෙ න ඵුසන්ති ඵස්සා’’.

878. ‘‘නාමඤ්ච රූපඤ්ච පටිච්ච ඵස්සො, ඉච්ඡානිදානානි පරිග්ගහානි;

ඉච්ඡායසන්ත්‍යා න මමත්තමත්ථි, රූපෙ විභූතෙ න ඵුසන්ති ඵස්සා’’.

879. ‘‘කථංසමෙතස්ස විභොති රූපං, සුඛං දුඛඤ්චාපි [දුඛං වාපි (සී. ස්‍යා.)] කථං විභොති;

එතං මෙ පබ්‍රූහි යථා විභොති, තං ජානියාමාති [ජානිස්සාමාති (සී. ක.)] මෙ මනො අහු’’.

880. ‘‘න සඤ්ඤසඤ්ඤී න විසඤ්ඤසඤ්ඤී, නොපි අසඤ්ඤී න විභූතසඤ්ඤී;

එවංසමෙතස්ස විභොති රූපං, සඤ්ඤානිදානා හි පපඤ්චසඞ්ඛා’’.

881. ‘‘යං තං අපුච්ඡිම්හ අකිත්තයී නො,

අඤ්ඤං තං පුච්ඡාම තදිඞ්ඝ බ්‍රූහි;

එත්තාවතග්ගං නු [නො (සී. ස්‍යා.)] වදන්ති හෙකෙ,

යක්ඛස්ස සුද්ධිං ඉධ පණ්ඩිතාසෙ;

උදාහු අඤ්ඤම්පි වදන්ති එත්තො.

882. ‘‘එත්තාවතග්ගම්පි වදන්ති හෙකෙ, යක්ඛස්ස සුද්ධිං ඉධ පණ්ඩිතාසෙ;

තෙසං පනෙකෙ සමයං වදන්ති, අනුපාදිසෙසෙ කුසලා වදානා.

883. ‘‘එතෙ ච ඤත්වා උපනිස්සිතාති, ඤත්වා මුනී නිස්සයෙ සො විමංසී;

ඤත්වා විමුත්තො න විවාදමෙති, භවාභවාය න සමෙති ධීරො’’ති.

කලහවිවාදසුත්තං එකාදසමං නිට්ඨිතං.