12. චූළබ්‍යූහසුත්තං [චූළවියූහසුත්තං (සී. ස්‍යා. නිද්දෙස)]
884. සකංසකංදිට්ඨිපරිබ්බසානා, විග්ගය්හ නානා කුසලා වදන්ති;
යො එවං ජානාති ස වෙදි ධම්මං, ඉදං පටික්කොසමකෙවලී සො.
885. එවම්පි විග්ගය්හ විවාදයන්ති, බාලො පරො අක්කුසලොති [අකුසලොති (සී. ස්‍යා. පී.)] චාහු;
සච්චො නු වාදො කතමො ඉමෙසං, සබ්බෙව හීමෙ කුසලා වදානා.
886. පරස්ස චෙ ධම්මමනානුජානං, බාලොමකො [බාලො මගො (සී. ස්‍යා. ක.)] හොති නිහීනපඤ්ඤො;
සබ්බෙව බාලා සුනිහීනපඤ්ඤා, සබ්බෙවිමෙ දිට්ඨිපරිබ්බසානා.
887. සන්දිට්ඨියා චෙව න වීවදාතා, සංසුද්ධපඤ්ඤා කුසලා මුතීමා;
න තෙසං කොචි පරිහීනපඤ්ඤො [කොචිපි නිහීනපඤ්ඤො (සී. ස්‍යා. ක.)], දිට්ඨී හි තෙසම්පි තථා සමත්තා.
888. න වාහමෙතං තථියන්ති [තථිවන්ති (ස්‍යා. ක.)] බ්‍රූමි, යමාහු බාලා මිථු අඤ්ඤමඤ්ඤං;
සකංසකංදිට්ඨිමකංසු සච්චං, තස්මා හි බාලොති පරං දහන්ති.
889. යමාහු සච්චං තථියන්ති එකෙ, තමාහු අඤ්ඤෙ [අඤ්ඤෙපි (ස්‍යා.), අඤ්ඤෙ ච (?)] තුච්ඡං මුසාති;
එවම්පි විගය්හ විවාදයන්ති, කස්මා න එකං සමණා වදන්ති.
890. එකඤ්හි සච්චං න දුතීයමත්ථි, යස්මිං පජා නො විවදෙ පජානං;
නානා තෙ [නානාතො (ක.)] සච්චානි සයං ථුනන්ති, තස්මා න එකං සමණා වදන්ති.
891. කස්මා නු සච්චානි වදන්ති නානා, පවාදියාසෙ කුසලා වදානා;
සච්චානි සුතානි බහූනි නානා, උදාහු තෙ තක්කමනුස්සරන්ති.
892. න හෙව සච්චානි බහූනි නානා, අඤ්ඤත්‍ර සඤ්ඤාය නිච්චානි ලොකෙ;
තක්කඤ්ච දිට්ඨීසු පකප්පයිත්වා, සච්චං මුසාති ද්වයධම්මමාහු.
893. දිට්ඨෙ සුතෙ සීලවතෙ මුතෙ වා, එතෙ ච නිස්සාය විමානදස්සී;
විනිච්ඡයෙ ඨත්වා පහස්සමානො, බාලො පරො අක්කුසලොති චාහ.
894. යෙනෙව බාලොති පරං දහාති, තෙනාතුමානං කුසලොති චාහ;
සයමත්තනා සො කුසලො වදානො, අඤ්ඤං විමානෙති තදෙව පාව.
895. අතිසාරදිට්ඨියාව සො සමත්තො, මානෙන මත්තො පරිපුණ්ණමානී;
සයමෙව සාමං මනසාභිසිත්තො, දිට්ඨී හි සා තස්ස තථා සමත්තා.
896. පරස්ස චෙ හි වචසා නිහීනො, තුමො සහා හොති නිහීනපඤ්ඤො;
අථ චෙ සයං වෙදගූ හොති ධීරො, න කොචි බාලො සමණෙසු අත්ථි.
897. අඤ්ඤං ඉතො යාභිවදන්ති ධම්මං, අපරද්ධා සුද්ධිමකෙවලී තෙ [සුද්ධිමකෙවලීනො (සී.)];
එවම්පි තිත්ථ්‍යා පුථුසො වදන්ති, සන්දිට්ඨිරාගෙන හි තෙභිරත්තා [ත්‍යාභිරත්තා (ස්‍යා. ක.)].
898. ඉධෙව සුද්ධි ඉති වාදයන්ති, නාඤ්ඤෙසු ධම්මෙසු විසුද්ධිමාහු;
එවම්පි තිත්ථ්‍යා පුථුසො නිවිට්ඨා, සකායනෙ තත්ථ දළ්හං වදානා.
899. සකායනෙ වාපි දළ්හං වදානො, කමෙත්ථ බාලොති පරං දහෙය්‍ය;
සයමෙව සො මෙධගමාවහෙය්‍ය [මෙධකං ආවහෙය්‍ය (සී. පී.)], පරං වදං බාලමසුද්ධිධම්මං.
900. විනිච්ඡයෙ ඨත්වා සයං පමාය, උද්ධං ස [උද්දං සො (සී. ස්‍යා. පී.)] ලොකස්මිං විවාදමෙති;
හිත්වාන සබ්බානි විනිච්ඡයානි, න මෙධගං කුබ්බති ජන්තු ලොකෙති.
චූළබ්‍යූහසුත්තං ද්වාදසමං නිට්ඨිතං.