8. සල්ලසුත්තං

579. අනිමිත්තමනඤ්ඤාතං, මච්චානං ඉධ ජීවිතං;

කසිරඤ්ච පරිත්තඤ්ච, තඤ්ච දුක්ඛෙන සංයුතං.

580. න හි සො උපක්කමො අත්ථි, යෙන ජාතා න මිය්‍යරෙ;

ජරම්පි පත්වා මරණං, එවංධම්මා හි පාණිනො.

581. ඵලානමිව පක්කානං, පාතො පතනතො [පපතතො (සී. පී. අට්ඨ.)] භයං;

එවං ජාතාන මච්චානං, නිච්චං මරණතො භයං.

582. යථාපි කුම්භකාරස්ස, කතා මත්තිකභාජනා;

සබ්බෙ භෙදනපරියන්තා [භෙදපරියන්තා (ස්‍යා.)], එවං මච්චාන ජීවිතං.

583. දහරා ච මහන්තා ච, යෙ බාලා යෙ ච පණ්ඩිතා;

සබ්බෙ මච්චුවසං යන්ති, සබ්බෙ මච්චුපරායණා.

584. තෙසං මච්චුපරෙතානං, ගච්ඡතං පරලොකතො;

න පිතා තායතෙ පුත්තං, ඤාතී වා පන ඤාතකෙ.

585. පෙක්ඛතං යෙව ඤාතීනං, පස්ස ලාලපතං පුථු;

එකමෙකොව මච්චානං, ගොවජ්ඣො විය නීයති [නිය්‍යති (බහූසු)].

586. එවමබ්භාහතො ලොකො, මච්චුනා ච ජරාය ච;

තස්මා ධීරා න සොචන්ති, විදිත්වා ලොකපරියායං.

587. යස්ස මග්ගං න ජානාසි, ආගතස්ස ගතස්ස වා;

උභො අන්තෙ අසම්පස්සං, නිරත්ථං පරිදෙවසි.

588. පරිදෙවයමානො චෙ, කිඤ්චිදත්ථං උදබ්බහෙ;

සම්මූළ්හො හිංසමත්තානං, කයිරා චෙ නං විචක්ඛණො.

589. න හි රුණ්ණෙන සොකෙන, සන්තිං පප්පොති චෙතසො;

භිය්‍යස්සුප්පජ්ජතෙ දුක්ඛං, සරීරං චුපහඤ්ඤති.

590. කිසො විවණ්ණො භවති, හිංසමත්තානමත්තනා;

න තෙන පෙතා පාලෙන්ති, නිරත්ථා පරිදෙවනා.

591. සොකමප්පජහං ජන්තු, භිය්‍යො දුක්ඛං නිගච්ඡති;

අනුත්ථුනන්තො කාලඞ්කතං [කාලකතං (සී. ස්‍යා.)], සොකස්ස වසමන්වගූ.

592. අඤ්ඤෙපි පස්ස ගමිනෙ, යථාකම්මූපගෙ නරෙ;

මච්චුනො වසමාගම්ම, ඵන්දන්තෙවිධ පාණිනො.

593. යෙන යෙන හි මඤ්ඤන්ති, තතො තං හොති අඤ්ඤථා;

එතාදිසො විනාභාවො, පස්ස ලොකස්ස පරියායං.

594. අපි වස්සසතං ජීවෙ, භිය්‍යො වා පන මාණවො;

ඤාතිසඞ්ඝා විනා හොති, ජහාති ඉධ ජීවිතං.

595. තස්මා අරහතො සුත්වා, විනෙය්‍ය පරිදෙවිතං;

පෙතං කාලඞ්කතං දිස්වා, නෙසො ලබ්භා මයා ඉති.

596. යථා සරණමාදිත්තං, වාරිනා පරිනිබ්බයෙ [පරිනිබ්බුතො (සී. ක.)];

එවම්පි ධීරො සපඤ්ඤො, පණ්ඩිතො කුසලො නරො;

ඛිප්පමුප්පතිතං සොකං, වාතො තූලංව ධංසයෙ.

597. පරිදෙවං පජප්පඤ්ච, දොමනස්සඤ්ච අත්තනො;

අත්තනො සුඛමෙසානො, අබ්බහෙ සල්ලමත්තනො.

598. අබ්බුළ්හසල්ලො අසිතො, සන්තිං පප්පුය්‍ය චෙතසො;

සබ්බසොකං අතික්කන්තො, අසොකො හොති නිබ්බුතොති.

සල්ලසුත්තං අට්ඨමං නිට්ඨිතං.