3. උන්දූරඞ්ගපඤ්හො

3. ‘‘භන්තෙ නාගසෙන, ‘උන්දූරස්ස [උන්දුරස්ස (ස්‍යා. ක.)] එකං අඞ්ගං ගහෙතබ්බ’න්ති යං වදෙසි, කතමං තං එකං අඞ්ගං ගහෙතබ්බ’’න්ති? ‘‘යථා, මහාරාජ, උන්දූරො ඉතොචිතො ච විචරන්තො ආහාරූපාසීසකො යෙව චරති, එවමෙව ඛො, මහාරාජ, යොගිනා යොගාවචරෙන ඉතොචිතො ච විචරන්තෙන යොනිසො මනසිකාරූපාසීසකෙනෙව භවිතබ්බං. ඉදං, මහාරාජ, උන්දූරස්ස එකං අඞ්ගං ගහෙතබ්බං. භාසිතම්පෙතං, මහාරාජ, ථෙරෙන උපසෙනෙන වඞ්ගන්තපුත්තෙන –

‘‘‘ධම්මාසීසං [ධම්මසීසං (සී. පී.)] කරිත්වාන, විහරන්තො විපස්සකො;

අනොලීනො විහරති, උපසන්තො සදා සතො’’’ති.

උන්දූරඞ්ගපඤ්හො තතියො.