4. විච්ඡිකඞ්ගපඤ්හො

4. ‘‘භන්තෙ නාගසෙන, ‘විච්ඡිකස්ස එකං අඞ්ගං ගහෙතබ්බ’න්ති යං වදෙසි, කතමං තං එකං අඞ්ගං ගහෙතබ්බ’’න්ති? ‘‘යථා, මහාරාජ, විච්ඡිකො නඞ්ගුලාවුධො නඞ්ගුලං උස්සාපෙත්වා චරති, එවමෙව ඛො, මහාරාජ, යොගිනා යොගාවචරෙන ඤාණාවුධෙන භවිතබ්බං, ඤාණං උස්සාපෙත්වා විහරිතබ්බං. ඉදං, මහාරාජ, විච්ඡිකස්ස එකං අඞ්ගං ගහෙතබ්බං. භාසිතම්පෙතං, මහාරාජ, ථෙරෙන උපසෙනෙන වඞ්ගන්තපුත්තෙන –

‘‘‘ඤාණඛග්ගං ගහෙත්වාන, විහරන්තො විපස්සකො;

පරිමුච්චති සබ්බභයා, දුප්පසහො ච සො භවෙ’’’ති.

විච්ඡිකඞ්ගපඤ්හො චතුත්ථො.