3. මුසාවාදගරුලහුභාවපඤ්හො

3. ‘‘භන්තෙ නාගසෙන, භාසිතම්පෙතං භගවතා ‘සම්පජානමුසාවාදෙ පාරාජිකො හොතී’ති. පුන ච භණිතං ‘සම්පජානමුසාවාදෙ ලහුකං ආපත්තිං ආපජ්ජති එකස්ස සන්තිකෙ දෙසනාවත්ථුක’න්ති. භන්තෙ නාගසෙන, කො පනෙත්ථ විසෙසො, කිං කාරණං, යඤ්චෙකෙන මුසාවාදෙන උච්ඡිජ්ජති, යඤ්චෙකෙන මුසාවාදෙන සතෙකිච්ඡො හොති? යදි, භන්තෙ නාගසෙන, භගවතා භණිතං ‘සම්පජානමුසාවාදෙ පාරාජිකො හොතී’ති, තෙන හි ‘සම්පජානමුසාවාදෙ ලහුකං ආපත්තිං ආපජ්ජති එකස්ස සන්තිකෙ දෙසනාවත්ථුක’න්ති යං වචනං, තං මිච්ඡා. යදි තථාගතෙන භණිතං ‘සම්පජානමුසාවාදෙ ලහුකං ආපත්තිං ආපජ්ජති එකස්ස සන්තිකෙ දෙසනාවත්ථුක’න්ති, තෙන හි ‘සම්පජානමුසාවාදෙ පාරාජිකො හොතී’ති තම්පි වචනං මිච්ඡා. අයම්පි උභතො කොටිකො පඤ්හො තවානුප්පත්තො, සො තයා නිබ්බාහිතබ්බො’’ති.

‘‘භාසිතම්පෙතං, මහාරාජ, භගවතා ‘සම්පජානමුසාවාදෙ පාරාජිකො හොතී’ති. භණිතඤ්ච ‘සම්පජානමුසාවාදෙ ලහුකං ආපත්තිං ආපජ්ජති එකස්ස සන්තිකෙ දෙසනාවත්ථුක’න්ති, තඤ්ච පන වත්ථුවසෙන ගරුකලහුකං හොති. තං කිං මඤ්ඤසි, මහාරාජ, ඉධ කොචි පුරිසො පරස්ස පාණිනා පහාරං දදෙය්‍ය, තස්ස තුම්හෙ කිං දණ්ඩං ධාරෙථා’’ති? ‘‘යදි සො, භන්තෙ, ආහ ‘නක්ඛමාමී’ති, තස්ස මයං අක්ඛමමානෙ කහාපණං හරාපෙමා’’ති ‘‘ඉධ පන, මහාරාජ, සො යෙව පුරිසො තව පාණිනා පහාරං දදෙය්‍ය, තස්ස පන කො දණ්ඩො’’ති? ‘‘හත්ථම්පිස්ස, භන්තෙ, ඡෙදාපෙය්‍යාම, පාදම්පි ඡෙදාපෙය්‍යාම, යාව සීසං කළීරච්ඡෙජ්ජං ඡෙදාපෙය්‍යාම, සබ්බම්පි තං ගෙහං විලුම්පාපෙය්‍යාම, උභතොපක්ඛෙ [උභතොපස්සෙ (සී. පී. ක.)] යාව සත්තමං කුලං සමුග්ඝාතාපෙය්‍යාමා’’ති. ‘‘කො පනෙත්ථ, මහාරාජ, විසෙසො, කිං කාරණං, යං එකස්ස පාණිප්පහාරෙ සුඛුමො කහාපණො දණ්ඩො, යං තව පාණිප්පහාරෙ හත්ථච්ඡෙජ්ජං පාදච්ඡෙජ්ජං යාව කළීරච්ඡෙජ්ජං සබ්බගෙහාදානං උභතොපක්ඛෙ යාව සත්තමකුලා සමුග්ඝාතො’’ති? ‘‘මනුස්සන්තරෙන, භන්තෙ’’ති. ‘‘එවමෙව ඛො, මහාරාජ, සම්පජානමුසාවාදො වත්ථුවසෙන ගරුකලහුකො හොතී’’ති. ‘‘සාධු, භන්තෙ නාගසෙන, එවමෙතං තථා සම්පටිච්ඡාමී’’ති.

මුසාවාදගරුලහුභාවපඤ්හො තතියො.