435. හලිද්දිරාගජාතකං (9)

78. සුතිතික්ඛං අරඤ්ඤම්හි, පන්තම්හි සයනාසනෙ;

යෙ ච ගාමෙ තිතික්ඛන්ති, තෙ උළාරතරා තයා.

79. අරඤ්ඤා ගාමමාගම්ම, කිංසීලං කිංවතං අහං;

පුරිසං තාත සෙවෙය්‍යං, තං මෙ අක්ඛාහි පුච්ඡිතො.

80. යො තෙ [යො තං (ස්‍යා. ජා. 1.4.190 අරඤ්ඤජාතකෙපි)] විස්සාසයෙ තාත, විස්සාසඤ්ච ඛමෙය්‍ය තෙ;

සුස්සූසී ච තිතික්ඛී ච, තං භජෙහි ඉතො ගතො.

81. යස්ස කායෙන වාචාය, මනසා නත්ථි දුක්කටං;

උරසීව පතිට්ඨාය, තං භජෙහි ඉතො ගතො.

82. යො ච ධම්මෙන චරති, චරන්තොපි න මඤ්ඤති;

විසුද්ධකාරිං සප්පඤ්ඤං, තං භජෙහි ඉතො ගතො.

83. හලිද්දිරාගං කපිචිත්තං, පුරිසං රාගවිරාගිනං;

තාදිසං තාත මා සෙවි, නිම්මනුස්සම්පි චෙ සියා.

84. ආසීවිසංව කුපිතං, මීළ්හලිත්තං මහාපථං;

ආරකා පරිවජ්ජෙහි, යානීව විසමං පථං.

85. අනත්ථා තාත වඩ්ඪන්ති, බාලං අච්චුපසෙවතො;

මාස්සු බාලෙන සංගච්ඡි, අමිත්තෙනෙව සබ්බදා.

86. තං තාහං තාත යාචාමි, කරස්සු වචනං මම;

මාස්සු බාලෙන සංගච්ඡි [සංගඤ්ඡි (සී. පී.)], දුක්ඛො බාලෙහි සඞ්ගමොති.

හලිද්දිරාගජාතකං නවමං.