9. නවකනිපාතො

427. ගිජ්ඣජාතකං (1)

1. පරිසඞ්කුපථො නාම, ගිජ්ඣපන්ථො සනන්තනො;

තත්‍රාසි මාතාපිතරො, ගිජ්ඣො පොසෙසි ජිණ්ණකෙ;

තෙසං අජගරමෙදං, අච්චහාසි බහුත්තසො [පහුත්තතො (ක. සී.), පහූතසො (ස්‍යා. පී.), බහුධසො (ක.)].

2. පිතා ච පුත්තං අවච, ජානං උච්චං පපාතිනං;

සුපත්තං ථාමසම්පන්නං [පක්ඛසම්පන්නං (සී. ස්‍යා. පී.)], තෙජස්සිං දූරගාමිනං.

3. පරිප්ලවන්තං පථවිං, යදා තාත විජානහි;

සාගරෙන පරික්ඛිත්තං, චක්කංව පරිමණ්ඩලං;

තතො තාත නිවත්තස්සු, මාස්සු එත්තො පරං ගමි.

4. උදපත්තොසි [උද්ධං පත්තොසි (ක. සී.)] වෙගෙන, බලී පක්ඛී දිජුත්තමො;

ඔලොකයන්තො වක්කඞ්ගො, පබ්බතානි වනානි ච.

5. අද්දස්ස පථවිං ගිජ්ඣො, යථාසාසි [යථාස්සාසි (ස්‍යා. අට්ඨ. පාඨන්තරං)] පිතුස්සුතං;

සාගරෙන පරික්ඛිත්තං, චක්කංව පරිමණ්ඩලං.

6. තඤ්ච සො සමතික්කම්ම, පරමෙවච්චවත්තථ [පරමෙව පවත්තථ (සී. ස්‍යා.)];

තඤ්ච වාතසිඛා තික්ඛා, අච්චහාසි බලිං දිජං.

7. නාසක්ඛාතිගතො පොසො, පුනදෙව නිවත්තිතුං;

දිජො බ්‍යසනමාපාදි, වෙරම්භානං [වෙරම්බානං (සී. පී.)] වසං ගතො.

8. තස්ස පුත්තා ච දාරා ච, යෙ චඤ්ඤෙ අනුජීවිනො;

සබ්බෙ බ්‍යසනමාපාදුං, අනොවාදකරෙ දිජෙ.

9. එවම්පි ඉධ වුඩ්ඪානං, යො වාක්‍යං නාවබුජ්ඣති;

අතිසීමචරො දිත්තො, ගිජ්ඣොවාතීතසාසනො;

ස වෙ බ්‍යසනං පප්පොති, අකත්වා වුඩ්ඪසාසනන්ති.

ගිජ්ඣජාතකං පඨමං.

428. කොසම්බියජාතකං (2)

10. පුථුසද්දො සමජනො, න බාලො කොචි මඤ්ඤථ;

සඞ්ඝස්මිං භිජ්ජමානස්මිං, නාඤ්ඤං භිය්‍යො අමඤ්ඤරුං.

11. පරිමුට්ඨා පණ්ඩිතාභාසා, වාචාගොචරභාණිනො;

යාවිච්ඡන්ති මුඛායාමං, යෙන නීතා න තං විදූ.

12. අක්කොච්ඡි මං අවධි මං, අජිනි මං අහාසි මෙ;

යෙ ච තං උපනය්හන්ති, වෙරං තෙසං න සම්මති.

13. අක්කොච්ඡි මං අවධි මං, අජිනි මං අහාසි මෙ;

යෙ ච තං නුපනය්හන්ති, වෙරං තෙසූපසම්මති.

14. න හි වෙරෙන වෙරානි, සම්මන්තීධ කුදාචනං;

අවෙරෙන ච සම්මන්ති, එස ධම්මො සනන්තනො.

15. පරෙ ච න විජානන්ති, මයමෙත්ථ යමාමසෙ;

යෙ ච තත්ථ විජානන්ති, තතො සම්මන්ති මෙධගා.

16. අට්ඨිච්ඡින්නා පාණහරා, ගවස්ස [ගවාස්ස (සී. ස්‍යා. පී.)] ධනහාරිනො;

රට්ඨං විලුම්පමානානං, තෙසම්පි හොති සඞ්ගති;

කස්මා තුම්හාක නො සියා.

17. සචෙ ලභෙථ නිපකං සහායං, සද්ධිංචරං සාධුවිහාරිධීරං;

අභිභුය්‍ය සබ්බානි පරිස්සයානි, චරෙය්‍ය තෙනත්තමනො සතීමා.

18. නො චෙ ලභෙථ නිපකං සහායං, සද්ධිංචරං සාධුවිහාරිධීරං;

රාජාව රට්ඨං විජිතං පහාය, එකො චරෙ මාතඞ්ගරඤ්ඤෙව නාගො.

19. එකස්ස චරිතං සෙය්‍යො, නත්ථි බාලෙ සහායතා;

එකො චරෙ න පාපානි කයිරා, අප්පොස්සුක්කො මාතඞ්ගරඤ්ඤෙව නාගොති.

කොසම්බියජාතකං දුතියං.

429. මහාසුවජාතකං (3)

20. දුමො යදා හොති ඵලූපපන්නො, භුඤ්ජන්ති නං විහඞ්ගමා [විහගා (සී. පී.)] සම්පතන්තා;

ඛීණන්ති ඤත්වාන දුමං ඵලච්චයෙ [ඤත්වා දුමප්ඵලච්චයෙන (ක.)], දිසොදිසං යන්ති තතො විහඞ්ගමා.

21. චර චාරිකං ලොහිතතුණ්ඩ මාමරි, කිං ත්වං සුව සුක්ඛදුමම්හි ඣායසි;

තදිඞ්ඝ මං බ්‍රූහි වසන්තසන්නිභ, කස්මා සුව සුක්ඛදුමං න රිඤ්චසි.

22. යෙ වෙ සඛීනං සඛාරො භවන්ති, පාණච්චයෙ [පාණං චජෙ (ක.), පාණච්චයෙ මරණකාලෙ ච සුඛදුක්ඛෙසු ච න ජහන්තීති සම්බන්ධො] දුක්ඛසුඛෙසු හංස;

ඛීණං අඛීණන්ති න තං ජහන්ති, සන්තො සතං ධම්මමනුස්සරන්තා.

23. සොහං සතං අඤ්ඤතරොස්මි හංස, ඤාතී ච මෙ හොති සඛා ච රුක්ඛො;

තං නුස්සහෙ ජීවිකත්ථො පහාතුං, ඛීණන්ති ඤත්වාන න හෙස ධම්මො [න සොස (ක.), න එස (ස්‍යා.)].

24. සාධු සක්ඛි කතං හොති, මෙත්ති සංසති සන්ථවො [මිත්තං සඞ්ගති සන්ධවො (ක.)];

සචෙතං ධම්මං රොචෙසි, පාසංසොසි විජානතං.

25. සො තෙ සුව වරං දම්මි, පත්තයාන විහඞ්ගම;

වරං වරස්සු වක්කඞ්ග, යං කිඤ්චි මනසිච්ඡසි.

26. වරඤ්ච මෙ හංස භවං දදෙය්‍ය, අයඤ්ච රුක්ඛො පුනරායුං ලභෙථ;

සො සාඛවා ඵලිමා සංවිරූළ්හො, මධුත්ථිකො තිට්ඨතු සොභමානො.

27. තං පස්ස සම්ම ඵලිමං උළාරං, සහාව තෙ හොතු උදුම්බරෙන;

සො සාඛවා ඵලිමා සංවිරූළ්හො, මධුත්ථිකො තිට්ඨතු සොභමානො.

28. එවං සක්ක සුඛී හොහි, සහ සබ්බෙහි ඤාතිභි;

යථාහමජ්ජ සුඛිතො, දිස්වාන සඵලං දුමං.

29. සුවස්ස ච වරං දත්වා, කත්වාන සඵලං දුමං;

පක්කාමි සහ භරියාය, දෙවානං නන්දනං වනන්ති.

මහාසුවජාතකං තතියං.

430. චූළසුවජාතකං (4)

30. සන්ති රුක්ඛා හරිපත්තා [හරිතපත්තා (සී. ස්‍යා. පී.)], දුමා නෙකඵලා බහූ;

කස්මා නු සුක්ඛෙ [සුක්ඛ (ක.)] කොළාපෙ, සුවස්ස නිරතො මනො.

31. ඵලස්ස උපභුඤ්ජිම්හා, නෙකවස්සගණෙ බහූ;

අඵලම්පි විදිත්වාන, සාව මෙත්ති යථා පුරෙ.

32. සුඛඤ්ච රුක්ඛං කොළාපං, ඔපත්තමඵලං දුමං;

ඔහාය සකුණා යන්ති, කිං දොසං පස්සසෙ දිජ.

33. යෙ ඵලත්ථා සම්භජන්ති, අඵලොති ජහන්ති නං;

අත්තත්ථපඤ්ඤා දුම්මෙධා, තෙ හොන්ති පක්ඛපාතිනො.

34. සාධු සක්ඛි කතං හොති, මෙත්ති සංසති සන්ථවො;

සචෙතං ධම්මං රොචෙසි, පාසංසොසි විජානතං.

35. සො තෙ සුව වරං දම්මි, පත්තයාන විහඞ්ගම;

වරං වරස්සු වක්කඞ්ග, යං කිඤ්චි මනසිච්ඡසි.

36. අපි නාම නං පස්සෙය්‍යං [අපි නාම නං පුන පස්සෙ (සී. ස්‍යා.)], සපත්තං සඵලං දුමං;

දලිද්දොව නිධි ලද්ධා, නන්දෙය්‍යාහං පුනප්පුනං.

37. තතො අමතමාදාය, අභිසිඤ්චි මහීරුහං;

තස්ස සාඛා විරූහිංසු [විරූළ්හස්ස (ක.)], සීතච්ඡායා මනොරමා.

38. එවං සක්ක සුඛී හොහි, සහ සබ්බෙහි ඤාතිභි;

යථාහමජ්ජ සුඛිතො, දිස්වාන සඵලං දුමං.

39. සුවස්ස ච වරං දත්වා, කත්වාන සඵලං දුමං;

පක්කාමි සහ භරියාය, දෙවානං නන්දනං වනන්ති.

චූළසුවජාතකං චතුත්ථං.

431. හරිතචජාතකං (5)

40. සුතං මෙතං මහාබ්‍රහ්මෙ, කාමෙ භුඤ්ජති හාරිතො;

කච්චෙතං වචනං තුච්ඡං, කච්චි සුද්ධො ඉරිය්‍යසි.

41. එවමෙතං මහාරාජ, යථා තෙ වචනං සුතං;

කුම්මග්ගං පටිපන්නොස්මි, මොහනෙය්‍යෙසු මුච්ඡිතො.

42. අදු [ආදු (සී. පී.)] පඤ්ඤා කිමත්ථියා, නිපුණා සාධුචින්තිනී [චින්තනී (සී. පී.)];

යාය උප්පතිතං රාගං, කිං මනො න විනොදයෙ.

43. චත්තාරොමෙ මහාරාජ, ලොකෙ අතිබලා භුසා;

රාගො දොසො මදො මොහො, යත්ථ පඤ්ඤා න ගාධති.

44. අරහා සීලසම්පන්නො, සුද්ධො චරති හාරිතො;

මෙධාවී පණ්ඩිතො චෙව, ඉති නො සම්මතො භවං.

45. මෙධාවීනම්පි හිංසන්ති, ඉසිං ධම්මගුණෙ රතං;

විතක්කා පාපකා රාජ, සුභා රාගූපසංහිතා.

46. උප්පන්නායං සරීරජො, රාගො වණ්ණවිදූසනො තව;

තං පජහ භද්දමත්ථු තෙ, බහුන්නාසි මෙධාවිසම්මතො.

47. තෙ අන්ධකාරකෙ [කරණෙ (සී. ස්‍යා. පී.)] කාමෙ, බහුදුක්ඛෙ මහාවිසෙ;

තෙසං මූලං ගවෙසිස්සං, ඡෙච්ඡං රාගං සබන්ධනං.

48. ඉදං වත්වාන හාරිතො, ඉසි සච්චපරක්කමො;

කාමරාගං විරාජෙත්වා, බ්‍රහ්මලොකූපගො අහූති.

හරිතචජාතකං [හාරිතජාතකං (සී. පී.)] පඤ්චමං.

432. පදකුසලමාණවජාතකං (6)

49. බහුස්සුතං චිත්තකථිං [චිත්තකථං (ස්‍යා. ක.)], ගඞ්ගා වහති පාටලිං [පාටලං (සී. පී.)];

වුය්හමානක භද්දන්තෙ, එකං මෙ දෙහි ගාථකං [ගීතකං (ක. අට්ඨ.)].

50. යෙන සිඤ්චන්ති දුක්ඛිතං, යෙන සිඤ්චන්ති ආතුරං;

තස්ස මජ්ඣෙ මරිස්සාමි, ජාතං සරණතො භයං.

51. යත්ථ බීජානි රූහන්ති, සත්තා යත්ථ පතිට්ඨිතා;

සා මෙ සීසං නිපීළෙති, ජාතං සරණතො භයං.

52. යෙන භත්තානි පච්චන්ති, සීතං යෙන විහඤ්ඤති;

සො මං ඩහති [දය්හති (ක.)] ගත්තානි, ජාතං සරණතො භයං.

53. යෙන භුත්තෙන [භත්තෙන (ස්‍යා. ක.)] යාපෙන්ති, පුථූ බ්‍රාහ්මණඛත්තියා;

සො මං භුත්තො බ්‍යාපාදෙති, ජාතං සරණතො භයං.

54. ගිම්හානං පච්ඡිමෙ මාසෙ, වාතමිච්ඡන්ති පණ්ඩිතා;

සො මං [සො මෙ (සී. පී.)] භඤ්ජති ගත්තානි, ජාතං සරණතො භයං.

55. යං නිස්සිතා ජගතිරුහං, ස්වායං අග්ගිං පමුඤ්චති;

දිසා භජථ වක්කඞ්ගා, ජාතං සරණතො භයං.

56. යමානයිං සොමනස්සං, මාලිනිං චන්දනුස්සදං;

සා මං ඝරා නිච්ඡුභති [නීහරති (සී. ස්‍යා.)], ජාතං සරණතො භයං.

57. යෙන ජාතෙන නන්දිස්සං, යස්ස ච භවමිච්ඡිසං;

සො මං ඝරා නිච්ඡුභති [නීහරති (සී. ස්‍යා.)], ජාතං සරණතො භයං.

58. සුණන්තු මෙ ජානපදා, නෙගමා ච සමාගතා;

යතොදකං තදාදිත්තං, යතො ඛෙමං තතො භයං.

59. රාජා විලුම්පතෙ රට්ඨං, බ්‍රාහ්මණො ච පුරොහිතො;

අත්තගුත්තා විහරථ, ජාතං සරණතො භයන්ති.

පදකුසලමාණවජාතකං ඡට්ඨං.

433. ලොමසකස්සපජාතකං (7)

60. අස්ස ඉන්දසමො රාජ, අච්චන්තං අජරාමරො;

සචෙ ත්වං යඤ්ඤං යාජෙය්‍ය, ඉසිං ලොමසකස්සපං.

61. සසමුද්දපරියායං, මහිං සාගරකුණ්ඩලං;

න ඉච්ඡෙ සහ නින්දාය, එවං සෙය්‍ය [සය්හ (සී. ස්‍යා. පී.)] විජානහි.

62. ධිරත්ථු තං යසලාභං, ධනලාභඤ්ච බ්‍රාහ්මණ;

යා වුත්ති විනිපාතෙන, අධම්මචරණෙන වා.

63. අපි චෙ පත්තමාදාය, අනගාරො පරිබ්බජෙ;

සායෙව ජීවිකා සෙය්‍යො, යා චාධම්මෙන එසනා.

64. අපි චෙ පත්තමාදාය, අනගාරො පරිබ්බජෙ;

අඤ්ඤං අහිංසයං ලොකෙ, අපි රජ්ජෙන තං වරං.

65. බලං චන්දො බලං සුරියො, බලං සමණබ්‍රාහ්මණා;

බලං වෙලා සමුද්දස්ස, බලාතිබලමිත්ථියො.

66. යථා උග්ගතපං සන්තං, ඉසිං ලොමසකස්සපං;

පිතු අත්ථා චන්දවතී, වාජපෙය්‍යං [වාචපෙය්‍යං (පී. ක.)] අයාජයි.