436. සමුග්ගජාතකං (10)
87. කුතො නු ආගච්ඡථ භො තයො ජනා, ස්වාගතා එථ [ස්වාගතං එත්ථ (සී. පී.)] නිසීදථාසනෙ;
කච්චිත්ථ භොන්තො කුසලං අනාමයං, චිරස්සමබ්භාගමනං හි වො ඉධ.
88. අහමෙව එකො ඉධ මජ්ජ පත්තො, න චාපි මෙ දුතියො කොචි විජ්ජති;
කිමෙව සන්ධාය තෙ භාසිතං ඉසෙ, ‘‘කුතො නු ආගච්ඡථ භො තයො ජනා’’.
89. තුවඤ්ච එකො භරියා ච තෙ පියා, සමුග්ගපක්ඛිත්තනිකිණ්ණමන්තරෙ;
සා රක්ඛිතා කුච්ඡිගතාව [කුච්ඡිගතා ච (ක.)] තෙ සදා, වායුස්ස [හරිස්ස (ක.)] පුත්තෙන සහා තහිං රතා.
90. සංවිග්ගරූපො ඉසිනා වියාකතො [පබ්‍යාකතො (ක.), බ්‍යාකතො (ස්‍යා. පී.)], සො දානවො තත්ථ සමුග්ගමුග්ගිලි;
අද්දක්ඛි භරියං සුචි මාලධාරිනිං, වායුස්ස පුත්තෙන සහා තහිං රතං.
91. සුදිට්ඨරූපමුග්ගතපානුවත්තිනා [සුදිට්ඨරූපුග්ගතපානුවත්තිනා (සී. ස්‍යා. පී.)], හීනා නරා යෙ පමදාවසං ගතා;
යථා හවෙ පාණරිවෙත්ථ රක්ඛිතා, දුට්ඨා මයී අඤ්ඤමභිප්පමොදයි.
92. දිවා ච රත්තො ච මයා උපට්ඨිතා, තපස්සිනා ජොතිරිවා වනෙ වසං;
සා ධම්මමුක්කම්ම අධම්මමාචරි, අකිරියරූපො පමදාහි සන්ථවො.
93. සරීරමජ්ඣම්හි ඨිතාතිමඤ්ඤහං, මය්හං අයන්ති අසතිං අසඤ්ඤතං;
සා ධම්මමුක්කම්ම අධම්මමාචරි, අකිරියරූපො පමදාහි සන්ථවො.
94. සුරක්ඛිතං මෙති කථං නු විස්සසෙ, අනෙකචිත්තාසු න හත්ථි [අනෙකචිත්තා පුන හෙත්ථ (ක.)] රක්ඛණා;
එතා හි පාතාලපපාතසන්නිභා, එත්ථප්පමත්තො බ්‍යසනං නිගච්ඡති.
95. තස්මා හි තෙ සුඛිනො වීතසොකා, යෙ මාතුගාමෙහි චරන්ති නිස්සටා;
එතං සිවං උත්තමමාභිපත්ථයං, න මාතුගාමෙහි කරෙය්‍ය සන්ථවන්ති.
සමුග්ගජාතකං දසමං.