434. චක්කවාකජාතකං (8)

69. කාසායවත්ථෙ සකුණෙ වදාමි, දුවෙ දුවෙ නන්දමනෙ [නන්දිමනෙ (සී. පී.)] චරන්තෙ;

කං අණ්ඩජං අණ්ඩජා මානුසෙසු, ජාතිං පසංසන්ති තදිඞ්ඝ බ්‍රූථ.

70. අම්හෙ මනුස්සෙසු මනුස්සහිංස, අනුබ්බතෙ [අනුපුබ්බකෙ (ක.)] චක්කවාකෙ වදන්ති;

කල්‍යාණභාවම්හෙ [භාව’ම්හ (සී. පී.)] දිජෙසු සම්මතා, අභිරූපා [අභීතරූපා (සී. ස්‍යා. පී.)] විචරාම අණ්ණවෙ. ( ) [(න ඝාසහෙතූපි කරොම පාපං) (ක.)]

71. කිං අණ්ණවෙ කානි ඵලානි භුඤ්ජෙ, මංසං කුතො ඛාදථ චක්කවාකා;

කිං භොජනං භුඤ්ජථ වො අනොමා [අභිණ්හං (ක.)], බලඤ්ච වණ්ණො ච අනප්පරූපා [අනප්පරූපො (සී. ස්‍යා. පී.)].

72. න අණ්ණවෙ සන්ති ඵලානි ධඞ්ක, මංසං කුතො ඛාදිතුං චක්කවාකෙ;

සෙවාලභක්ඛම්හ [භක්ඛිම්හ (ක.)] අපාණභොජනා [අවාකභොජනා (සී. පී.)], න ඝාසහෙතූපි කරොම පාපං.

73. න මෙ ඉදං රුච්චති චක්කවාක, අස්මිං භවෙ භොජනසන්නිකාසො;

අහොසි පුබ්බෙ තතො මෙ අඤ්ඤථා, ඉච්චෙව මෙ විමති එත්ථ ජාතා.

74. අහම්පි මංසානි ඵලානි භුඤ්ජෙ, අන්නානි ච ලොණියතෙලියානි;

රසං මනුස්සෙසු ලභාමි භොත්තුං, සූරොව සඞ්ගාමමුඛං විජෙත්වා;

න ච මෙ තාදිසො වණ්ණො, චක්කවාක යථා තව.

75. අසුද්ධභක්ඛොසි ඛණානුපාතී, කිච්ඡෙන තෙ ලබ්භති අන්නපානං;

න තුස්සසී රුක්ඛඵලෙහි ධඞ්ක, මංසානි වා යානි සුසානමජ්ඣෙ.

76. යො සාහසෙන අධිගම්ම භොගෙ, පරිභුඤ්ජති ධඞ්ක ඛණානුපාතී;

තතො උපක්කොසති නං සභාවො, උපක්කුට්ඨො වණ්ණබලං ජහාති.

77. අප්පම්පි චෙ නිබ්බුතිං භුඤ්ජතී යදි, අසාහසෙන අපරූපඝාතී [අසාහසෙනානුපඝාතිනො (ක.)];

බලඤ්ච වණ්ණො ච තදස්ස හොති, න හි සබ්බො ආහාරමයෙන වණ්ණොති.

චක්කවාකජාතකං අට්ඨමං.