426. දීපිජාතකං (10)

88. ඛමනීයං යාපනීයං, කච්චි මාතුල තෙ සුඛං;

සුඛං තෙ අම්මා අවච, සුඛකාමාව [සුඛකාමා හි (සී. ස්‍යා. පී.)] තෙ මයං.

89. නඞ්ගුට්ඨං මෙ අවක්කම්ම [අපක්කම්ම (ක.)], හෙඨයිත්වාන [පොථයිත්වාන (ක.)] එළිකෙ [එළකි (ස්‍යා.), එළිකි (පී.)];

සාජ්ජ මාතුලවාදෙන, මුඤ්චිතබ්බා නු මඤ්ඤසි.

90. පුරත්ථාමුඛො නිසින්නොසි, අහං තෙ මුඛමාගතා;

පච්ඡතො තුය්හං නඞ්ගුට්ඨං, කථං ඛ්වාහං අවක්කමිං [අපක්කමිං (ක.)].

91. යාවතා චතුරො දීපා, සසමුද්දා සපබ්බතා;

තාවතා මය්හං නඞ්ගුට්ඨං, කථං ඛො ත්වං විවජ්ජයි.

92. පුබ්බෙව මෙතමක්ඛිංසු [මෙතං අක්ඛංසු (සී. පී.)], මාතා පිතා ච භාතරො;

දීඝං දුට්ඨස්ස නඞ්ගුට්ඨං, සාම්හි වෙහායසාගතා.

93. තඤ්ච දිස්වාන ආයන්තිං, අන්තලික්ඛස්මි එළිකෙ;

මිගසඞ්ඝො පලායිත්ථ, භක්ඛො මෙ නාසිතො තයා.

94. ඉච්චෙවං විලපන්තියා, එළකියා රුහග්ඝසො;

ගලකං අන්වාවමද්දි, නත්ථි දුට්ඨෙ සුභාසිතං.

95. නෙව දුට්ඨෙ නයො අත්ථි, න ධම්මො න සුභාසිතං;

නික්කමං දුට්ඨෙ යුඤ්ජෙථ, සො ච සබ්භිං න රඤ්ජතීති.

දීපිජාතකං දසමං.

අට්ඨකනිපාතං නිට්ඨිතං.