425. අට්ඨානජාතකං (9)
77. ගඞ්ගා කුමුදිනී සන්තා, සඞ්ඛවණ්ණා ච කොකිලා;
ජම්බු තාලඵලං දජ්ජා, අථ නූන තදා සියා.
78. යදා කච්ඡපලොමානං, පාවාරො තිවිධො සියා;
හෙමන්තිකං පාවුරණං [පාපුරණං (සී. ස්‍යා. පී.)], අථ නූන තදා සියා.
79. යදා මකසපාදානං [දාඨානං (සී. පී.)], අට්ටාලො සුකතො සියා;
දළ්හො ච අවිකම්පී ච [අප්පකම්පී ච (සී. පී.)], අථ නූන තදා සියා.
80. යදා සසවිසාණානං, නිස්සෙණී සුකතා සියා;
සග්ගස්සාරොහණත්ථාය, අථ නූන තදා සියා.
81. යදා නිස්සෙණිමාරුය්හ, චන්දං ඛාදෙය්‍යු මූසිකා;
රාහුඤ්ච පරිපාතෙය්‍යුං [පරිබාහෙය්‍යුං (ස්‍යා.)], අථ නූන තදා සියා.
82. යදා සුරාඝටං පිත්වා, මක්ඛිකා ගණචාරිණී;
අඞ්ගාරෙ වාසං කප්පෙය්‍යුං, අථ නූන තදා සියා.
83. යදා බිම්බොට්ඨසම්පන්නො, ගද්‍රභො සුමුඛො සියා;
කුසලො නච්චගීතස්ස, අථ නූන තදා සියා.
84. යදා කාකා උලූකා ච, මන්තයෙය්‍යුං රහොගතා;
අඤ්ඤමඤ්ඤං පිහයෙය්‍යුං, අථ නූන තදා සියා.
85. යදා මුළාල [පුලස (සී. පී.), පුලාස (ස්‍යා.)] පත්තානං, ඡත්තං ථිරතරං සියා;
වස්සස්ස පටිඝාතාය, අථ නූන තදා සියා.
86. යදා කුලකො [කුලුඞ්කො (සී. පී.), කුලුකො (ස්‍යා.)] සකුණො, පබ්බතං ගන්ධමාදනං;
තුණ්ඩෙනාදාය ගච්ඡෙය්‍ය, අථ නූන තදා සියා.
87. යදා සාමුද්දිකං නාවං, ස-යන්තං ස-වටාකරං [සපටාකාරං (ක.)];
චෙටො ආදාය ගච්ඡෙය්‍ය, අථ නූන තදා සියාති.
අට්ඨානජාතකං නවමං.