424. ආදිත්තජාතකං (8)
69. ආදිත්තස්මිං අගාරස්මිං, යං නීහරති භාජනං;
තං තස්ස හොති අත්ථාය, නො ච යං තත්ථ ඩය්හති.
70. එවාමාදීපිතො ලොකො, ජරාය මරණෙන ච;
නීහරෙථෙව දානෙන, දින්නං හොති සුනීහතං [සුනීභතං (සී. ස්‍යා. පී.), සුනිබ්භතං (ක.)].
71. යො ධම්මලද්ධස්ස දදාති දානං, උට්ඨානවීරියාධිගතස්ස ජන්තු;
අතික්කම්ම සො වෙතරණිං [වෙත්තරණිං (ක.)] යමස්ස, දිබ්බානි ඨානානි උපෙති මච්චො.
72. දානඤ්ච යුද්ධඤ්ච සමානමාහු, අප්පාපි සන්තා බහුකෙ ජිනන්ති;
අප්පම්පි චෙ සද්දහානො දදාති, තෙනෙව සො හොති සුඛී පරත්ථ.
73. විචෙය්‍ය දානං සුගතප්පසත්ථං, යෙ දක්ඛිණෙය්‍යා ඉධ ජීවලොකෙ;
එතෙසු දින්නානි මහප්ඵලානි, බීජානි වුත්තානි යථා සුඛෙත්තෙ.
74. යො පාණභූතානි අහෙඨයං චරං, පරූපවාදා න කරොති පාපං;
භීරුං පසංසන්ති න තත්ථ සූරං, භයා හි සන්තො න කරොන්ති පාපං.
75. හීනෙන බ්‍රහ්මචරියෙන, ඛත්තියෙ උපපජ්ජති;
මජ්ඣිමෙන ච දෙවත්තං, උත්තමෙන විසුජ්ඣති.
76. අද්ධා හි දානං බහුධා පසත්ථං, දානා ච ඛො ධම්මපදංව සෙය්‍යො;
පුබ්බෙව හි පුබ්බතරෙව සන්තො [පුබ්බෙ ච හි පුබ්බතරෙ ච සන්තො (සං. නි. 1.33)], නිබ්බානමෙවජ්ඣගමුං සපඤ්ඤාති.
ආදිත්තජාතකං අට්ඨමං.