423. ඉන්ද්‍රියජාතකං (7)
60. යො ඉන්ද්‍රියානං කාමෙන, වසං නාරද ගච්ඡති;
සො පරිච්චජ්ජුභො ලොකෙ, ජීවන්තොව විසුස්සති [ජීවන්තොපිවිසුස්සති (ස්‍යා.), ජීවන්තො වාපි සුස්සති (ක.)].
61. සුඛස්සානන්තරං දුක්ඛං, දුක්ඛස්සානන්තරං සුඛං;
සොසි [සොපි (ස්‍යා. පී. ක.)] පත්තො සුඛා [සුඛ (ස්‍යා.), සුඛං (ක.)] දුක්ඛං, පාටිකඞ්ඛ වරං සුඛං.
62. කිච්ඡකාලෙ කිච්ඡසහො, යො කිච්ඡං නාතිවත්තති;
ස කිච්ඡන්තං සුඛං ධීරො, යොගං සමධිගච්ඡති.
63. න හෙව කාමාන කාමා, නානත්ථා නාත්ථකාරණා;
න කතඤ්ච නිරඞ්කත්වා, ධම්මා චවිතුමරහසි.
64. දක්ඛං ගහපතී [ගහපතං (සී. ස්‍යා. පී.), ගහවතං (?)] සාධු, සංවිභජ්ජඤ්ච භොජනං;
අහාසො අත්ථලාභෙසු, අත්ථබ්‍යාපත්ති අබ්‍යථො.
65. එත්තාවතෙතං පණ්ඩිච්චං, අපි සො [අසිතො (සී. ස්‍යා. පී.)] දවිලො [දෙවලො (සී. පී.)] බ්‍රවි;
න යිතො කිඤ්චි පාපියො, යො ඉන්ද්‍රියානං වසං වජෙ.
66. අමිත්තානංව හත්ථත්ථං, සිවි පප්පොති මාමිව;
කම්මං විජ්ජඤ්ච දක්ඛෙය්‍යං, විවාහං සීලමද්දවං;
එතෙ ච යසෙ හාපෙත්වා, නිබ්බත්තො සෙහි කම්මෙහි.
67. සොහං සහස්සජීනොව අබන්ධු අපරායණො;
අරියධම්මා අපක්කන්තො, යථා පෙතො තථෙවහං.
68. සුඛකාමෙ දුක්ඛාපෙත්වා, ආපන්නොස්මි පදං ඉමං;
සො සුඛං නාධිගච්ඡාමි, ඨිතො [චිතො (පී. සී. අට්ඨ.)] භාණුමතාමිවාති.
ඉන්ද්‍රියජාතකං සත්තමං.