416. පරන්තපජාතකං (7-2-11)

154. ආගමිස්සති මෙ පාපං, ආගමිස්සති මෙ භයං;

තදා හි චලිතා සාඛා, මනුස්සෙන මිගෙන වා.

155. භීරුයා නූන මෙ කාමො, අවිදූරෙ වසන්තියා;

කරිස්සති කිසං පණ්ඩුං, සාව සාඛා පරන්තපං.

156. සොචයිස්සති මං කන්තා, ගාමෙ වසමනින්දිතා;

කරිස්සති කිසං පණ්ඩුං, සාව සාඛා පරන්තපං.

157. තයා මං අසිතාපඞ්ගි [හසිතාපඞ්ගි (සී. ස්‍යා. පී.)], සිතානි [මිහිතානි (සී. ස්‍යා. පී.)] භණිතානි ච;

කිසං පණ්ඩුං කරිස්සන්ති, සාව සාඛා පරන්තපං.

158. අගමා නූන සො සද්දො, අසංසි නූන සො තව;

අක්ඛාතං නූන තං තෙන, යො තං සාඛමකම්පයි.

159. ඉදං ඛො තං සමාගම්ම, මම බාලස්ස චින්තිතං;

තදා හි චලිතා සාඛා, මනුස්සෙන මිගෙන වා.

160. තථෙව ත්වං අවෙදෙසි, අවඤ්චි [අවජ්ඣි (ක.)] පිතරං මම;

හන්ත්වා සාඛාහි ඡාදෙන්තො, ආගමිස්සති මෙ [තෙ (ස්‍යා. ක.)] භයන්ති.

පරන්තපජාතකං එකාදසමං.

ගන්ධාරවග්ගො දුතියො.

තස්සුද්දානං –

වරගාම මහාකපි භග්ගව ච, දළ්හධම්ම සකුඤ්ජර කෙසවරො;

උරගො විධුරො පුන ජාගරතං, අථ කොසලාධිප පරන්තප චාති.

අථ වග්ගුද්දානං –

අථ සත්තනිපාතම්හි, වග්ගං මෙ භණතො සුණ;

කුක්කු ච පුන ගන්ධාරො, ද්වෙව ගුත්තා මහෙසිනාති.

සත්තකනිපාතං නිට්ඨිතං.