415. කුම්මාසපිණ්ඩිජාතකං (7-2-10)

142. න කිරත්ථි අනොමදස්සිසු, පාරිචරියා බුද්ධෙසු අප්පිකා [අප්පකා (ක.)];

සුක්ඛාය අලොණිකාය ච, පස්සඵලං කුම්මාසපිණ්ඩියා.

143. හත්ථිගවස්සා චිමෙ බහූ [හත්ථිගවාස්සා ච මෙ බහූ (සී.), හත්ථී ගවාස්සා චිමෙ බහූ (ස්‍යා.), හත්ථී ගවාස්සා ච මෙ බහූ (පී.)], ධනධඤ්ඤං පථවී ච කෙවලා;

නාරියො චිමා අච්ඡරූපමා, පස්සඵලං කුම්මාසපිණ්ඩියා.

144. අභික්ඛණං රාජකුඤ්ජර, ගාථා භාසසි කොසලාධිප;

පුච්ඡාමි තං රට්ඨවඩ්ඪන, බාළ්හං පීතිමනො පභාසසි.

145. ඉමස්මිඤ්ඤෙව නගරෙ, කුලෙ අඤ්ඤතරෙ අහුං;

පරකම්මකරො ආසිං, භතකො සීලසංවුතො.

146. කම්මාය නික්ඛමන්තොහං, චතුරො සමණෙද්දසං;

ආචාරසීලසම්පන්නෙ, සීතිභූතෙ අනාසවෙ.

147. තෙසු චිත්තං පසාදෙත්වා, නිසීදෙත්වා [නිසාදෙත්වා (?)] පණ්ණසන්ථතෙ;

අදං බුද්ධාන කුම්මාසං, පසන්නො සෙහි පාණිභි.

148. තස්ස කම්මස්ස කුසලස්ස, ඉදං මෙ එදිසං ඵලං;

අනුභොමි ඉදං රජ්ජං, ඵීතං ධරණිමුත්තමං.

149. දදං භුඤ්ජ මා ච පමාදො [දද භුඤ්ජ ච මා ච පමාදො (සී. පී.)], චක්කං වත්තය කොසලාධිප;

මා රාජ අධම්මිකො අහු, ධම්මං පාලය කොසලාධිප.

150. සොහං තදෙව පුනප්පුනං, වටුමං ආචරිස්සාමි සොභනෙ;

අරියාචරිතං සුකොසලෙ, අරහන්තො මෙ මනාපාව පස්සිතුං.

151. දෙවී විය අච්ඡරූපමා, මජ්ඣෙ නාරිගණස්ස සොභසි;

කිං කම්මමකාසි භද්දකං, කෙනාසි වණ්ණවතී සුකොසලෙ.

152. අම්බට්ඨකුලස්ස ඛත්තිය, දාස්‍යාහං පරපෙසියා අහුං;

සඤ්ඤතා ච [සඤ්ඤතා (සී. පී.)] ධම්මජීවිනී, සීලවතී ච අපාපදස්සනා.

153. උද්ධටභත්තං අහං තදා, චරමානස්ස අදාසි භික්ඛුනො;

විත්තා සුමනා සයං අහං, තස්ස කම්මස්ස ඵලං මමෙදිසන්ති.

කුම්මාසපිණ්ඩිජාතකං දසමං.