410. සොමදත්තජාතකං (7-2-5)
105. යො මං පුරෙ පච්චුඩ්ඩෙති [පච්චුදෙති (සී. ස්‍යා. පී.), පච්චුට්ඨෙති (ක.)], අරඤ්ඤෙ දූරමායතො;
සො න දිස්සති මාතඞ්ගො, සොමදත්තො කුහිං ගතො.
106. අයං වා සො මතො සෙති, අල්ලසිඞ්ගංව වච්ඡිතො [අල්ලපිඞ්කව ඡිජ්ජිතො (සී. පී.), අල්ලපීතංව විච්ඡිතො (ස්‍යා.)];
භුම්‍යා නිපතිතො සෙති, අමරා වත කුඤ්ජරො.
107. අනගාරියුපෙතස්ස, විප්පමුත්තස්ස තෙ සතො;
සමණස්ස න තං සාධු, යං පෙතමනුසොචසි.
108. සංවාසෙන හවෙ සක්ක, මනුස්සස්ස මිගස්ස වා;
හදයෙ ජායතෙ පෙමං, තං න සක්කා අසොචිතුං.
109. මතං මරිස්සං රොදන්ති, යෙ රුදන්ති ලපන්ති ච;
තස්මා ත්වං ඉසි මා රොදි, රොදිතං මොඝමාහු සන්තො.
110. කන්දිතෙන හවෙ බ්‍රහ්මෙ, මතො පෙතො සමුට්ඨහෙ;
සබ්බෙ සඞ්ගම්ම රොදාම, අඤ්ඤමඤ්ඤස්ස ඤාතකෙ.
111. ආදිත්තං වත මං සන්තං, ඝතසිත්තංව පාවකං;
වාරිනා විය ඔසිඤ්චං, සබ්බං නිබ්බාපයෙ දරං.
112. අබ්බහී වත මෙ සල්ලං, යමාසි හදයස්සිතං;
යො මෙ සොකපරෙතස්ස, පුත්තසොකං අපානුදි.
113. සොහං අබ්බූළ්හසල්ලොස්මි, වීතසොකො අනාවිලො;
න සොචාමි න රොදාමි, තව සුත්වාන වාසවාති.
සොමදත්තජාතකං පඤ්චමං.