409. දළ්හධම්මජාතකං (7-2-4)

98. අහං චෙ දළ්හධම්මස්ස [දළ්හධම්මාය (පී.)], වහන්ති නාභිරාධයිං;

ධරන්තී උරසි සල්ලං, යුද්ධෙ වික්කන්තචාරිනී.

99. නූන රාජා න ජානාති [න හ නූන රාජා ජානාති (සී. පී.)], මම වික්කමපොරිසං;

සඞ්ගාමෙ සුකතන්තානි, දූතවිප්පහිතානි ච.

100. සා නූනාහං මරිස්සාමි, අබන්ධු අපරායිනී [අපරායිණී (සී.), අපරායණී (?)];

තදා හි [තථා හි (පී.)] කුම්භකාරස්ස, දින්නා ඡකණහාරිකා.

101. යාවතාසීසතී පොසො, තාවදෙව පවීණති;

අත්ථාපායෙ ජහන්ති නං, ඔට්ඨිබ්‍යාධිංව ඛත්තියො.

102. යො පුබ්බෙ කතකල්‍යාණො, කතත්ථො නාවබුජ්ඣති;

අත්ථා තස්ස පලුජ්ජන්ති, යෙ හොන්ති අභිපත්ථිතා.

103. යො පුබ්බෙ කතකල්‍යාණො, කතත්ථො මනුබුජ්ඣති;

අත්ථා තස්ස පවඩ්ඪන්ති, යෙ හොන්ති අභිපත්ථිතා.

104. තං වො වදාමි භද්දන්තෙ [භද්දං වො (සී. ස්‍යා. පී.)], යාවන්තෙත්ථ සමාගතා;

සබ්බෙ කතඤ්ඤුනො හොථ, චිරං සග්ගම්හි ඨස්සථාති.

දළ්හධම්මජාතකං චතුත්ථං.