350. දෙවතාපඤ්හජාතකං (4-5-10)

197. හන්ති හත්ථෙහි පාදෙහි, මුඛඤ්ච පරිසුම්භති;

ස වෙ රාජ පියො හොති, කං තෙන ත්වාභිපස්සසි [මභිපස්සසි (සී.)].

198. අක්කොසති යථාකාමං, ආගමඤ්චස්ස ඉච්ඡති;

ස වෙ රාජ පියො හොති, කං තෙන ත්වාභිපස්සසි.

199. අබ්භක්ඛාති අභූතෙන, අලිකෙනාභිසාරයෙ;

ස වෙ රාජ පියො හොති, කං තෙන ත්වාභිපස්සසි.

200. හරං අන්නඤ්ච පානඤ්ච, වත්ථසෙනාසනානි ච;

අඤ්ඤදත්ථුහරා සන්තා, තෙ වෙ රාජ පියා හොන්ති;

කං තෙන ත්වාභිපස්සසීති.

දෙවතාපඤ්හජාතකං දසමං.

චූළකුණාලවග්ගො පඤ්චමො.

තස්සුද්දානං –

නරානං අසක්ඛිවසිම්හවරො, නීලියමග්ගිවරඤ්ච පුන;

පුන රසායසකූටවරො, තථාරඤ්ඤ සාරථි හන්ති දසාති.

අථ වග්ගුද්දානං –

කාලිඞ්ගං [විවරං (බහූසු)] පුචිමන්දඤ්ච, කුටිදූසක කොකිලා [කුටිදූසං බහුභාණකං (බහූසු)];

චූළකුණාලවග්ගො සො, පඤ්චමො සුප්පකාසිතොති.

චතුක්කනිපාතං නිට්ඨිතං.