5. චූළකුණාලවග්ගො

341. කණ්ඩරීජාතකං (4-5-1)

161. නරානමාරාමකරාසු නාරිසු, අනෙකචිත්තාසු අනිග්ගහාසු ච;

සබ්බත්ථ නාපීතිකරාපි [සබ්බ’ත්තනා’පීතිකරාපි (සී. ස්‍යා.)] චෙ සියා [සියුං (ස්‍යා.)], න විස්සසෙ තිත්ථසමා හි නාරියො.

162. යං වෙ [යඤ්ච (ස්‍යා. ක.)] දිස්වා කණ්ඩරීකින්නරානං [කින්නරකින්නරීනං (ස්‍යා.), කින්නරීකින්නරානං (ක.)], සබ්බිත්ථියො න රමන්ති අගාරෙ;

තං තාදිසං මච්චං චජිත්වා භරියා, අඤ්ඤං දිස්වා පුරිසං පීඨසප්පිං.

163. බකස්ස ච බාවරිකස්ස [පාවාරිකස්ස (සී.)] රඤ්ඤො, අච්චන්තකාමානුගතස්ස භරියා;

අවාචරී [අච්චාචරි (ස්‍යා.), අනාචරි (ක.)] පට්ඨවසානුගස්ස [බද්ධවසානුගස්ස (සී. ස්‍යා.), පත්තවසානුගතස්ස (ක.)], කං වාපි ඉත්ථී නාතිචරෙ තදඤ්ඤං.

164. පිඞ්ගියානී සබ්බලොකිස්සරස්ස, රඤ්ඤො පියා බ්‍රහ්මදත්තස්ස භරියා;

අවාචරී පට්ඨවසානුගස්ස, තං වාපි සා නාජ්ඣගා කාමකාමිනීති.

කණ්ඩරීජාතකං [කින්නරීජාතකං (ක. සී. ක.), කුණ්ඩලිකජාතකං (ස්‍යා.)] පඨමං.

342. වානරජාතකං (4-5-2)

165. අසක්ඛිං වත අත්තානං, උද්ධාතුං උදකා ථලං;

න දානාහං පුන තුය්හං, වසං ගච්ඡාමි වාරිජ.

166. අලමෙතෙහි අම්බෙහි, ජම්බූහි පනසෙහි ච;

යානි පාරං සමුද්දස්ස, වරං මය්හං උදුම්බරො.

167. යො ච උප්පතිතං අත්ථං, න ඛිප්පමනුබුජ්ඣති;

අමිත්තවසමන්වෙති, පච්ඡා ච අනුතප්පති.

168. යො ච උප්පතිතං අත්ථං, ඛිප්පමෙව නිබොධති;

මුච්චතෙ සත්තුසම්බාධා, න ච පච්ඡානුතප්පතීති.

වානරජාතකං දුතියං.

343. කුන්තිනීජාතකං (4-5-3)

169. අවසිම්හ තවාගාරෙ, නිච්චං සක්කතපූජිතා;

ත්වමෙව දානිමකරි, හන්ද රාජ වජාමහං.

170. යො වෙ කතෙ පටිකතෙ, කිබ්බිසෙ පටිකිබ්බිසෙ;

එවං තං සම්මතී වෙරං, වස කුන්තිනි මාගමා.

171. න කතස්ස ච කත්තා ච, මෙත්ති [මෙත්තී (පී.), මිත්තී (ක.)] සන්ධීයතෙ පුන;

හදයං නානුජානාති, ගච්ඡඤ්ඤෙව රථෙසභ.

172. කතස්ස චෙව කත්තා ච, මෙත්ති සන්ධීයතෙ පුන;

ධීරානං නො ච බාලානං, වස කුන්තිනි මාගමාති.

කුන්තිනීජාතකං තතියං.

344. අම්බජාතකං (4-5-4)

173. යො නීලියං මණ්ඩයති, සණ්ඩාසෙන විහඤ්ඤති;

තස්ස සා වසමන්වෙතු, යා තෙ අම්බෙ අවාහරි.

174. වීසං වා පඤ්චවීසං [පණ්ණුවීසං (ක. සී. පී.)] වා, ඌනතිංසං ව ජාතියා;

තාදිසා පති මා ලද්ධා [පතිං මා ලද්ධා (පී.), පති මා’ලත්ථ (?)], යා තෙ අම්බෙ අවාහරි.

175. දීඝං ගච්ඡතු අද්ධානං, එකිකා අභිසාරිකා;

සඞ්කෙතෙ පති මා අද්ද [මා අද්දස (සී. පී.)], යා තෙ අම්බෙ අවාහරි.

176. අලඞ්කතා සුවසනා, මාලිනී චන්දනුස්සදා;

එකිකා සයනෙ සෙතු, යා තෙ අම්බෙ අවාහරීති.

අම්බජාතකං [අම්බචොරජාතකං (ක. සී. පී.)] චතුත්ථං.

345. ගජකුම්භජාතකං (4-5-5)

177. වනං යදග්ගි දහති, පාවකො කණ්හවත්තනී;

කථං කරොසි පචලක, එවං දන්ධපරක්කමො.

178. බහූනි රුක්ඛඡිද්දානි, පථබ්‍යා විවරානි ච;

තානි චෙ නාභිසම්භොම, හොති නො කාලපරියායො.

179. යො දන්ධකාලෙ තරති, තරණීයෙ ච දන්ධති;

සුක්ඛපණ්ණංව අක්කම්ම, අත්ථං භඤ්ජති අත්තනො.

180. යො දන්ධකාලෙ දන්ධෙති, තරණීයෙ ච තාරයි;

සසීව රත්තිං විභජං, තස්සත්ථො පරිපූරතීති.

ගජකුම්භජාතකං පඤ්චමං.

346. කෙසවජාතකං (4-5-6)

181. මනුස්සින්දං ජහිත්වාන, සබ්බකාමසමිද්ධිනං;

කථං නු භගවා කෙසී, කප්පස්ස රමති අස්සමෙ [රමතස්සමෙ (ක.)].

182. සාදූනී [සාධූනි (ක. සී. ස්‍යා. ක.)] රමණීයානි, සන්ති වක්ඛා මනොරමා;

සුභාසිතානි කප්පස්ස, නාරද රමයන්ති මං.

183. සාලීනං ඔදනං භුඤ්ජෙ, සුචිං මංසූපසෙචනං;

කථං සාමාකනීවාරං, අලොණං ඡාදයන්ති තං.

184. සාදුං වා [අසාදුං (පී.)] යදි වාසාදුං, අප්පං වා යදි වා බහුං;

විස්සත්ථො යත්ථ භුඤ්ජෙය්‍ය, විස්සාසපරමා රසාති.

කෙසවජාතකං [කෙසීජාතකං (ක.)] ඡට්ඨං.

347. අයකූටජාතකං (4-5-7)

185. සබ්බායසං කූටමතිප්පමාණං, පග්ගය්හ යො [සො (පී.)] තිට්ඨසි අන්තලික්ඛෙ;

රක්ඛාය මෙ [මං (සී.)] ත්වං විහිතො නුසජ්ජ, උදාහු මෙ චෙතයසෙ [වායමසෙ (සී. ස්‍යා.)] වධාය.

186. දූතො අහං රාජිධ රක්ඛසානං, වධාය තුය්හං පහිතොහමස්මි;

ඉන්දො ච තං රක්ඛති දෙවරාජා, තෙනුත්තමඞ්ගං න තෙ [න හි (ක. සී. පී.), තෙ න (ක.)] ඵාලයාමි.

187. සචෙ ච මං රක්ඛති දෙවරාජා, දෙවානමින්දො මඝවා සුජම්පති;

කාමං පිසාචා විනදන්තු සබ්බෙ, න සන්තසෙ රක්ඛසියා පජාය.

188. කාමං කන්දන්තු [කන්තන්තු (ක.), කණ්ඩන්තු (ස්‍යා.)] කුම්භණ්ඩා, සබ්බෙ පංසුපිසාචකා;

නාලං පිසාචා යුද්ධාය, මහතී සා විභිංසිකාති [විභෙසිකාති (ස්‍යා.), විහෙසිකාති (පී.)].

අයකූටජාතකං සත්තමං.

348. අරඤ්ඤජාතකං (4-5-8)

189. අරඤ්ඤා ගාමමාගම්ම, කිංසීලං කිංවතං අහං;

පුරිසං තාත සෙවෙය්‍යං, තං මෙ අක්ඛාහි පුච්ඡිතො.

190. යො තං විස්සාසයෙ තාත, විස්සාසඤ්ච ඛමෙය්‍ය තෙ;

සුස්සූසී ච තිතික්ඛී ච, තං භජෙහි ඉතො [තං භජෙය්‍යාසිතො (ක.)] ගතො.

191. යස්ස කායෙන වාචාය, මනසා නත්ථි දුක්කටං;

උරසීව පතිට්ඨාය, තං භජෙහි ඉතො ගතො.

192. හලිද්දිරාගං කපිචිත්තං, පුරිසං රාගවිරාගිනං;

තාදිසං තාත මා සෙවි, නිම්මනුස්සම්පි චෙ සියාති.

අරඤ්ඤජාතකං අට්ඨමං.

349. සන්ධිභෙදජාතකං (4-5-9)

193. නෙව ඉත්ථීසු සාමඤ්ඤං, නාපි භක්ඛෙසු සාරථි;

අථස්ස සන්ධිභෙදස්ස, පස්ස යාව සුචින්තිතං.

194. අසි තික්ඛොව මංසම්හි, පෙසුඤ්ඤං පරිවත්තති;

යත්ථූසභඤ්ච සීහඤ්ච, භක්ඛයන්ති මිගාධමා.

195. ඉමං සො සයනං සෙති, යමිමං [යයිමං (සී. පී.), යිමං (ක.)] පස්සසි සාරථි;

යො වාචං සන්ධිභෙදස්ස, පිසුණස්ස නිබොධති.

196. තෙ ජනා සුඛමෙධන්ති, නරා සග්ගගතාරිව;

යෙ වාචං සන්ධිභෙදස්ස, නාවබොධන්ති සාරථීති.

සන්ධිභෙදජාතකං නවමං.

350. දෙවතාපඤ්හජාතකං (4-5-10)

197. හන්ති හත්ථෙහි පාදෙහි, මුඛඤ්ච පරිසුම්භති;

ස වෙ රාජ පියො හොති, කං තෙන ත්වාභිපස්සසි [මභිපස්සසි (සී.)].

198. අක්කොසති යථාකාමං, ආගමඤ්චස්ස ඉච්ඡති;

ස වෙ රාජ පියො හොති, කං තෙන ත්වාභිපස්සසි.

199. අබ්භක්ඛාති අභූතෙන, අලිකෙනාභිසාරයෙ;

ස වෙ රාජ පියො හොති, කං තෙන ත්වාභිපස්සසි.

200. හරං අන්නඤ්ච පානඤ්ච, වත්ථසෙනාසනානි ච;

අඤ්ඤදත්ථුහරා සන්තා, තෙ වෙ රාජ පියා හොන්ති;

කං තෙන ත්වාභිපස්සසීති.

දෙවතාපඤ්හජාතකං දසමං.

චූළකුණාලවග්ගො පඤ්චමො.

තස්සුද්දානං –

නරානං අසක්ඛිවසිම්හවරො, නීලියමග්ගිවරඤ්ච පුන;

පුන රසායසකූටවරො, තථාරඤ්ඤ සාරථි හන්ති දසාති.

අථ වග්ගුද්දානං –

කාලිඞ්ගං [විවරං (බහූසු)] පුචිමන්දඤ්ච, කුටිදූසක කොකිලා [කුටිදූසං බහුභාණකං (බහූසු)];

චූළකුණාලවග්ගො සො, පඤ්චමො සුප්පකාසිතොති.

චතුක්කනිපාතං නිට්ඨිතං.