344. අම්බජාතකං (4-5-4)

173. යො නීලියං මණ්ඩයති, සණ්ඩාසෙන විහඤ්ඤති;

තස්ස සා වසමන්වෙතු, යා තෙ අම්බෙ අවාහරි.

174. වීසං වා පඤ්චවීසං [පණ්ණුවීසං (ක. සී. පී.)] වා, ඌනතිංසං ව ජාතියා;

තාදිසා පති මා ලද්ධා [පතිං මා ලද්ධා (පී.), පති මා’ලත්ථ (?)], යා තෙ අම්බෙ අවාහරි.

175. දීඝං ගච්ඡතු අද්ධානං, එකිකා අභිසාරිකා;

සඞ්කෙතෙ පති මා අද්ද [මා අද්දස (සී. පී.)], යා තෙ අම්බෙ අවාහරි.

176. අලඞ්කතා සුවසනා, මාලිනී චන්දනුස්සදා;

එකිකා සයනෙ සෙතු, යා තෙ අම්බෙ අවාහරීති.

අම්බජාතකං [අම්බචොරජාතකං (ක. සී. පී.)] චතුත්ථං.