323. බ්රහ්මදත්තජාතකං (4-3-3)
89. ද්වයං යාචනකො රාජ, බ්රහ්මදත්ත නිගච්ඡති;
අලාභං ධනලාභං වා, එවං ධම්මා හි යාචනා.
90. යාචනං රොදනං ආහු, පඤ්චාලානං රථෙසභ;
යො යාචනං පච්චක්ඛාති, තමාහු පටිරොදනං.
91. මා මද්දසංසු රොදන්තං, පඤ්චාලා සුසමාගතා;
තුවං වා පටිරොදන්තං, තස්මා ඉච්ඡාමහං රහො.
92. දදාමි තෙ බ්රාහ්මණ රොහිණීනං, ගවං සහස්සං සහ පුඞ්ගවෙන;
අරියො හි අරියස්ස කථං න දජ්ජා [දජ්ජෙ (සී.), දජ්ජං (?)], සුත්වාන ගාථා තව ධම්මයුත්තාති.
බ්රහ්මදත්තජාතකං තතියං.