321. කුටිදූසකජාතකං (4-3-1)

81. මනුස්සස්සෙව තෙ සීසං, හත්ථපාදා ච වානර;

අථ කෙන නු වණ්ණෙන, අගාරං තෙ න විජ්ජති.

82. මනුස්සස්සෙව මෙ සීසං, හත්ථපාදා ච සිඞ්ගිල [සිඞ්ගාල (ක.), පිඞ්ගල (ටීකා)];

යාහු සෙට්ඨා මනුස්සෙසු, සා මෙ පඤ්ඤා න විජ්ජති.

83. අනවට්ඨිතචිත්තස්ස, ලහුචිත්තස්ස දුබ්භිනො [දූභිනො (පී.)];

නිච්චං අද්ධුවසීලස්ස, සුඛභාවො [සුචිභාවො (සී.), සුඛභාගො (?)] න විජ්ජති.

84. සො කරස්සු ආනුභාවං, වීතිවත්තස්සු සීලියං;

සීතවාතපරිත්තාණං, කරස්සු කුටවං [කුටිකං (සී. ස්‍යා.)] කපීති.

කුටිදූසක [සිඞ්ගාලසකුණ (ක.)] ජාතකං පඨමං.