320. සුච්චජජාතකං (4-2-10)

77. සුච්චජං වත නච්චජි, වාචාය අදදං ගිරිං;

කිං හිතස්ස චජන්තස්ස, වාචාය අදද පබ්බතං.

78. යඤ්හි කයිරා තඤ්හි වදෙ, යං න කයිරා න තං වදෙ;

අකරොන්තං භාසමානං, පරිජානන්ති පණ්ඩිතා.

79. රාජපුත්ත නමො ත්‍යත්ථු, සච්චෙ ධම්මෙ ඨිතො චසි;

යස්ස තෙ බ්‍යසනං පත්තො, සච්චස්මිං රමතෙ මනො.

80. යා දලිද්දී දලිද්දස්ස, අඩ්ඪා අඩ්ඪස්ස කිත්තිම [කිත්තිමා (සී. ස්‍යා. පී.)];

සා හිස්ස පරමා භරියා, සහිරඤ්ඤස්ස ඉත්ථියොති.

සුච්චජජාතකං දසමං.

පුචිමන්දවග්ගො දුතියො.

තස්සුද්දානං –

අථ චොර සකස්සප ඛන්තීවරො, දුජ්ජීවිතතා ච වරා ඵරුසා;

අථ සස මතඤ්ච වසන්ත සුඛං, සුච්චජංවතනච්චජිනා ච දසාති.