316. සසපණ්ඩිතජාතකං (4-2-6)

61. සත්ත මෙ රොහිතා මච්ඡා, උදකා ථලමුබ්භතා;

ඉදං බ්‍රාහ්මණ මෙ අත්ථි, එතං භුත්වා වනෙ වස.

62. දුස්ස මෙ ඛෙත්තපාලස්ස, රත්තිභත්තං අපාභතං;

මංසසූලා ච ද්වෙ ගොධා, එකඤ්ච දධිවාරකං;

ඉදං බ්‍රාහ්මණ මෙ අත්ථි, එතං භුත්වා වනෙ වස.

63. අම්බපක්කං දකං [අම්බපක්කොදකං (සී. පී.)] සීතං, සීතච්ඡායා මනොරමා [සීතච්ඡායං මනොරමං (සී. ස්‍යා. පී.)];

ඉදං බ්‍රාහ්මණ මෙ අත්ථි, එතං භුත්වා වනෙ වස.

64. න සසස්ස තිලා අත්ථි, න මුග්ගා නපි තණ්ඩුලා;

ඉමිනා අග්ගිනා පක්කං, මමං [මංසං (ක.)] භුත්වා වනෙ වසාති.

සසපණ්ඩිතජාතකං ඡට්ඨං.