297. කාමවිලාපජාතකං (3-5-7)

139. උච්චෙ සකුණ ඩෙමාන, පත්තයාන විහඞ්ගම;

වජ්ජාසි ඛො ත්වං වාමූරුං, චිරං ඛො සා කරිස්සති [සරිස්සති (ක.)].

140. ඉදං ඛො සා න ජානාති, අසිං සත්තිඤ්ච ඔඩ්ඩිතං;

සා චණ්ඩී කාහති කොධං, තං මෙ තපති නො ඉදං [නො ඉධ (සී. ස්‍යා. පී.)].

141. එස උප්පලසන්නාහො, නික්ඛඤ්චුස්සීසකොහිතං [නික්ඛමුස්සීසකෙ කතං (සී. පී.), නික්ඛඤ්චුස්සීසකෙ කතං (ස්‍යා.)];

කාසිකඤ්ච මුදුං වත්ථං, තප්පෙතු ධනිකා පියාති [ධනකාමියාති (ස්‍යා. පී.), ධනකාමිකාති (සී.)].

කාමවිලාපජාතකං සත්තමං.