283. වඩ්ඪකීසූකරජාතකං (3-4-3)
97. වරං වරං ත්වං නිහනං පුරෙ චරි, අස්මිං පදෙසෙ අභිභුය්‍ය සූකරෙ;
සො දානි එකො බ්‍යපගම්ම ඣායසි, බලං නු තෙ බ්‍යග්ඝ න චජ්ජ විජ්ජති.
98. ඉමෙ සුදං [ඉමස්සු තා (ස්‍යා. ක.)] යන්ති දිසොදිසං පුරෙ, භයට්ටිතා ලෙණගවෙසිනො පුථු;
තෙ දානි සඞ්ගම්ම වසන්ති එකතො, යත්ථට්ඨිතා දුප්පසහජ්ජමෙ [දුප්පසහජ්ජිමෙ (ස්‍යා.)] මයා.
99. නමත්ථු සඞ්ඝාන සමාගතානං, දිස්වා සයං සඛ්‍ය වදාමි අබ්භුතං;
බ්‍යග්ඝං මිගා යත්ථ ජිනිංසු දාඨිනො, සාමග්ගියා දාඨබලෙසු මුච්චරෙති.
වඩ්ඪකීසූකරජාතකං තතියං.