4. අබ්භන්තරවග්ගො

281. අබ්භන්තරජාතකං (3-4-1)

91. අබ්භන්තරො නාම දුමො, යස්ස දිබ්‍යමිදං ඵලං;

භුත්වා දොහළිනී නාරී, චක්කවත්තිං විජායති.

92. ත්වම්පි [ත්වඤ්ච (සී. පී.), ත්වං හි (ක.)] භද්දෙ මහෙසීසි, සා චාපි [චාසි (සී. පී.)] පතිනො පියා;

ආහරිස්සති තෙ රාජා, ඉදං අබ්භන්තරං ඵලං.

93. භත්තුරත්ථෙ පරක්කන්තො, යං ඨානමධිගච්ඡති;

සූරො අත්තපරිච්චාගී, ලභමානො භවාමහන්ති.

අබ්භන්තරජාතකං පඨමං.

282. සෙය්‍යජාතකං (3-4-2)

94. සෙය්‍යංසො සෙය්‍යසො හොති, යො සෙය්‍යමුපසෙවති;

එකෙන සන්ධිං කත්වාන, සතං වජ්ඣෙ [මච්චෙ (ක.), බජ්ඣෙ (ක. අට්ඨ.)] අමොචයිං.

95. [කස්මා…පෙ… සග්ගං න ගච්ඡෙය්‍ය (කත්ථචි)] තස්මා සබ්බෙන ලොකෙන, සන්ධිං කත්වාන එකතො [එකකො (සී. ස්‍යා. පී.)];

පෙච්ච සග්ගං නිගච්ඡෙය්‍ය [කස්මා…පෙ… සග්ගං න ගච්ඡෙය්‍ය (කත්ථචි)], ඉදං සුණාථ කාසියා [කාසයො (සී. පී.)].

96. ඉදං වත්වා මහාරාජා, කංසො බාරාණසිග්ගහො;

ධනුං කණ්ඩඤ්ච [තූණිඤ්ච (සී. පී.)] නික්ඛිප්ප, සංයමං අජ්ඣුපාගමීති.

සෙය්‍යජාතකං දුතියං.

283. වඩ්ඪකීසූකරජාතකං (3-4-3)

97. වරං වරං ත්වං නිහනං පුරෙ චරි, අස්මිං පදෙසෙ අභිභුය්‍ය සූකරෙ;

සො දානි එකො බ්‍යපගම්ම ඣායසි, බලං නු තෙ බ්‍යග්ඝ න චජ්ජ විජ්ජති.

98. ඉමෙ සුදං [ඉමස්සු තා (ස්‍යා. ක.)] යන්ති දිසොදිසං පුරෙ, භයට්ටිතා ලෙණගවෙසිනො පුථු;

තෙ දානි සඞ්ගම්ම වසන්ති එකතො, යත්ථට්ඨිතා දුප්පසහජ්ජමෙ [දුප්පසහජ්ජිමෙ (ස්‍යා.)] මයා.

99. නමත්ථු සඞ්ඝාන සමාගතානං, දිස්වා සයං සඛ්‍ය වදාමි අබ්භුතං;

බ්‍යග්ඝං මිගා යත්ථ ජිනිංසු දාඨිනො, සාමග්ගියා දාඨබලෙසු මුච්චරෙති.

වඩ්ඪකීසූකරජාතකං තතියං.

284. සිරිජාතකං (3-4-4)

100. යං උස්සුකා සඞ්ඝරන්ති, අලක්ඛිකා බහුං ධනං;

සිප්පවන්තො අසිප්පා ච, ලක්ඛිවා තානි භුඤ්ජති.

101. සබ්බත්ථ කතපුඤ්ඤස්ස, අතිච්චඤ්ඤෙව පාණිනො;

උප්පජ්ජන්ති බහූ භොගා, අප්පනායතනෙසුපි.

102. කුක්කුටො [කුක්කුට (සී. පී.), කුක්කුටා (සී. නිස්සය, සද්දනීති)] මණයො දණ්ඩො, ථියො ච පුඤ්ඤලක්ඛණා;

උප්පජ්ජන්ති අපාපස්ස, කතපුඤ්ඤස්ස ජන්තුනොති.

සිරිජාතකං චතුත්ථං.

285. මණිසූකරජාතකං (3-4-5)

103. දරියා සත්ත වස්සානි, තිංසමත්තා වසාමසෙ;

හඤ්ඤාම [හඤ්ඡෙම (සී. පී.), හඤ්ඡාම (?)] මණිනො ආභං, ඉති නො මන්තනං අහු.

104. යාවතා මණිං ඝංසාම [යාව යාව නිඝංසාම (සී. පී.)], භිය්‍යො වොදායතෙ මණි;

ඉදඤ්ච දානි පුච්ඡාම, කිං කිච්චං ඉධ මඤ්ඤසි.

105. අයං මණි වෙළූරියො, අකාචො විමලො [විපුලො (ක.)] සුභො;

නාස්ස සක්කා සිරිං හන්තුං, අපක්කමථ සූකරාති.

මණිසූකර [මණිඝංස (ක.)] ජාතකං පඤ්චමං.

286. සාලූකජාතකං (3-4-6)

106. මා සාලූකස්ස පිහයි, ආතුරන්නානි භුඤ්ජති;

අප්පොස්සුක්කො භුසං ඛාද, එතං දීඝායුලක්ඛණං.

107. ඉදානි සො ඉධාගන්ත්වා, අතිථී යුත්තසෙවකො;

අථ දක්ඛසි සාලූකං, සයන්තං මුසලුත්තරං.

108. විකන්තං [විකත්තං (සී.), විකන්තියමානං ඡින්දියමානංති අත්ථො] සූකරං දිස්වා, සයන්තං මුසලුත්තරං;

ජරග්ගවා විචින්තෙසුං, වරම්හාකං භුසාමිවාති.

සාලූකජාතකං ඡට්ඨං.

287. ලාභගරහජාතකං (3-4-7)

109. නානුම්මත්තො නාපිසුණො, නානටො නාකුතූහලො;

මූළ්හෙසු ලභතෙ ලාභං, එසා තෙ අනුසාසනී.

110. ධිරත්ථු තං යසලාභං, ධනලාභඤ්ච බ්‍රාහ්මණ;

යා වුත්ති විනිපාතෙන, අධම්මචරණෙන [අධම්මචරියාය (සී. ස්‍යා.)] වා.

111. අපි චෙ පත්තමාදාය, අනගාරො පරිබ්බජෙ;

එසාව ජීවිකා සෙය්‍යො [සෙය්‍යා (සී. ස්‍යා. පී.)], යා චාධම්මෙන එසනාති.

ලාභගරහජාතකං සත්තමං.

288. මච්ඡුද්දානජාතකං (3-4-8)

112. අග්ඝන්ති මච්ඡා අධිකං සහස්සං, න සො අත්ථි යො ඉමං සද්දහෙය්‍ය;

මය්හඤ්ච අස්සු ඉධ සත්ත මාසා, අහම්පි තං මච්ඡුද්දානං කිණෙය්‍යං.

113. මච්ඡානං භොජනං දත්වා, මම දක්ඛිණමාදිසි;

තං දක්ඛිණං සරන්තියා, කතං අපචිතිං තයා.

114. පදුට්ඨචිත්තස්ස න ඵාති හොති, න චාපි තං [නං (සී. ස්‍යා.)] දෙවතා පූජයන්ති;

යො භාතරං පෙත්තිකං සාපතෙය්‍යං, අවඤ්චයී දුක්කටකම්මකාරීති.

මච්ඡුද්දානජාතකං අට්ඨමං.

289. නානාඡන්දජාතකං (3-4-9)

115. නානාඡන්දා මහාරාජ, එකාගාරෙ වසාමසෙ;

අහං ගාමවරං ඉච්ඡෙ, බ්‍රාහ්මණී ච ගවං සතං.

116. පුත්තො ච ආජඤ්ඤරථං, කඤ්ඤා ච මණිකුණ්ඩලං;

යා චෙසා පුණ්ණිකා ජම්මී, උදුක්ඛලංභිකඞ්ඛති.

117. බ්‍රාහ්මණස්ස ගාමවරං, බ්‍රාහ්මණියා ගවං සතං;

පුත්තස්ස ආජඤ්ඤරථං, කඤ්ඤාය මණිකුණ්ඩලං;

යඤ්චෙතං පුණ්ණිකං ජම්මිං, පටිපාදෙථුදුක්ඛලන්ති.

නානාඡන්දජාතකං නවමං.

290. සීලවීමංසකජාතකං (3-4-10)

118. සීලං කිරෙව කල්‍යාණං, සීලං ලොකෙ අනුත්තරං;

පස්ස ඝොරවිසො නාගො, සීලවාති න හඤ්ඤති.

119. සොහං සීලං සමාදිස්සං, ලොකෙ අනුමතං සිවං;

අරියවුත්තිසමාචාරො, යෙන වුච්චති සීලවා.

120. ඤාතීනඤ්ච පියො හොති, මිත්තෙසු ච විරොචති;

කායස්ස භෙදා සුගතිං, උපපජ්ජති සීලවාති.

සීලවීමංසකජාතකං දසමං.

අබ්භන්තරවග්ගො චතුත්ථො.

තස්සුද්දානං –

දුම කංසවරුත්තමබ්‍යග්ඝමිගා, මණයො මණි සාලුකමව්හයනො;

අනුසාසනියොපි ච මච්ඡවරො, මණිකුණ්ඩලකෙන කිරෙන දසාති.