3. උදපානවග්ගො

271. උදපානදූසකජාතකං (3-3-1)

61. ආරඤ්ඤිකස්ස ඉසිනො, චිරරත්තං තපස්සිනො;

කිච්ඡාකතං උදපානං, කථං සම්ම අවාහසි [අවාහයි (සී. පී.), අපාහසි (ස්‍යා.)].

62. එස ධම්මො සිඞ්ගාලානං, යං පිත්වා ඔහදාමසෙ;

පිතුපිතාමහං ධම්මො, න තං [න නං (සී. පී.)] උජ්ඣාතුමරහසි.

63. යෙසං වො එදිසො ධම්මො, අධම්මො පන කීදිසො;

මා වො ධම්මං අධම්මං වා, අද්දසාම කුදාචනන්ති.

උදපානදූසකජාතකං පඨමං.

272. බ්‍යග්ඝජාතකං (3-3-2)

64. යෙන මිත්තෙන සංසග්ගා, යොගක්ඛෙමො විහිය්‍යති;

පුබ්බෙවජ්ඣාභවං තස්ස, රුක්ඛෙ අක්ඛීව පණ්ඩිතො.

65. යෙන මිත්තෙන සංසග්ගා, යොගක්ඛෙමො පවඩ්ඪති;

කරෙය්‍යත්තසමං වුත්තිං, සබ්බකිච්චෙසු පණ්ඩිතො.

66. එථ බ්‍යග්ඝා නිවත්තව්හො, පච්චුපෙථ [පච්චමෙථ (සී. පී.)] මහාවනං;

මා වනං ඡින්දි නිබ්‍යග්ඝං, බ්‍යග්ඝා මාහෙසු නිබ්බනාති.

බ්‍යග්ඝජාතකං දුතියං.

273. කච්ඡපජාතකං (3-3-3)

67. කො නු උද්ධිතභත්තොව [උද්දිතභත්තොව (සී.), වඩ්ඪිතභත්තොව (ස්‍යා.)], පූරහත්ථොව බ්‍රාහ්මණො;

කහං නු භික්ඛං අචරි, කං සද්ධං උපසඞ්කමි.

68. අහං කපිස්මි දුම්මෙධො, අනාමාසානි ආමසිං;

ත්වං මං මොචය භද්දන්තෙ, මුත්තො ගච්ඡෙය්‍ය පබ්බතං.

69. කච්ඡපා කස්සපා හොන්ති, කොණ්ඩඤ්ඤා හොන්ති මක්කටා;

මුඤ්ච කස්සප කොණ්ඩඤ්ඤං, කතං මෙථුනකං තයාති.

කච්ඡපජාතකං තතියං.

274. ලොලජාතකං (3-3-4)

70. කායං බලාකා සිඛිනී, චොරී ලඞ්ඝිපිතාමහා;

ඔරං බලාකෙ ආගච්ඡ, චණ්ඩො මෙ වායසො සඛා.

71. නාහං බලාකා සිඛිනී, අහං ලොලොස්මි වායසො;

අකත්වා වචනං තුය්හං, පස්ස ලූනොස්මි ආගතො.

72. පුනපාපජ්ජසී සම්ම, සීලඤ්හි තව තාදිසං;

න හි මානුසකා භොගා, සුභුඤ්ජා හොන්ති පක්ඛිනාති.

ලොලජාතකං චතුත්ථං.

275. රුචිරජාතකං (3-3-5)

73. කායං බලාකා රුචිරා, කාකනීළස්මිමච්ඡති;

චණ්ඩො කාකො සඛා මය්හං, යස්ස [තස්ස (සී. පී.)] චෙතං කුලාවකං.

74. නනු මං සම්ම ජානාසි, දිජ සාමාකභොජන;

අකත්වා වචනං තුය්හං, පස්ස ලූනොස්මි ආගතො.

75. පුනපාපජ්ජසී සම්ම, සීලඤ්හි තව තාදිසං;

න හි මානුසකා භොගා, සුභුඤ්ජා හොන්ති පක්ඛිනාති.

රුචිරජාතකං පඤ්චමං.

276. කුරුධම්මජාතකං (3-3-6)

76. තව සද්ධඤ්ච සීලඤ්ච, විදිත්වාන ජනාධිප;

වණ්ණං අඤ්ජනවණ්ණෙන, කාලිඞ්ගස්මිං නිමිම්හසෙ [විනිම්හසෙ (ස්‍යා.), වනිම්හසෙ (ක.)].

77. අන්නභච්චා චභච්චා ච, යොධ උද්දිස්ස ගච්ඡති;

සබ්බෙ තෙ අප්පටික්ඛිප්පා, පුබ්බාචරියවචො ඉදං.

78. දදාමි වො බ්‍රාහ්මණා නාගමෙතං, රාජාරහං රාජභොග්ගං යසස්සිනං;

අලඞ්කතං හෙමජාලාභිඡන්නං, සසාරථිං ගච්ඡථ යෙන කාමන්ති.

කුරුධම්මජාතකං [කුරුධම්මජාතකං (සී. ස්‍යා. පී.)] ඡට්ඨං.

277. රොමකජාතකං (3-3-7)

79. වස්සානි පඤ්ඤාස සමාධිකානි, වසිම්හ සෙලස්ස ගුහාය රොමක;

අසඞ්කමානා අභිනිබ්බුතත්තා [අභිනිබ්බුතචිත්තා (ස්‍යා. ක.)], හත්ථත්ත [හත්ථත්ථ (ස්‍යා.)] මායන්ති මමණ්ඩජා පුරෙ.

80. තෙ දානි වක්කඞ්ග කිමත්ථමුස්සුකා, භජන්ති අඤ්ඤං ගිරිකන්දරං දිජා;

න නූන මඤ්ඤන්ති මමං යථා පුරෙ, චිරප්පවුත්ථා අථ වා න තෙ ඉමෙ.

81. ජානාම තං න මයං සම්පමූළ්හා [න මය’මස්ම මූළ්හා (සී. පී.)], සොයෙව ත්වං තෙ මයමස්ම නාඤ්ඤෙ;

චිත්තඤ්ච තෙ අස්මිං ජනෙ පදුට්ඨං, ආජීවිකා [ආජීවක (සී. ස්‍යා.), ආජීවික (පී.)] තෙන තමුත්තසාමාති.

රොමකජාතකං සත්තමං.

278. මහිංසරාජජාතකං (3-3-8)

82. කිමත්ථ [කමත්ථ (සී. පී.)] මභිසන්ධාය, ලහුචිත්තස්ස දුබ්භිනො [දූභිනො (සී. පී.)];

සබ්බකාමදදස්සෙව [දුහස්සෙව (සී. ස්‍යා. පී.), රහස්සෙව (ක.)], ඉමං දුක්ඛං තිතික්ඛසි.

83. සිඞ්ගෙන නිහනාහෙතං, පදසා ච අධිට්ඨහ;

භිය්‍යො [භීයො (සී.)] බාලා පකුජ්ඣෙය්‍යුං, නො චස්ස පටිසෙධකො.

84. මමෙවායං මඤ්ඤමානො, අඤ්ඤෙපෙවං [අඤ්ඤම්පෙවං (සී. ස්‍යා. පී.)] කරිස්සති;

තෙ නං තත්ථ වධිස්සන්ති, සා මෙ මුත්ති භවිස්සතීති.

මහිංසරාජජාතකං [මහිසජාතකං (සී. ස්‍යා. පී.)] අට්ඨමං.

279. සතපත්තජාතකං (3-3-9)

85. යථා මාණවකො පන්ථෙ, සිඞ්ගාලිං වනගොචරිං;

අත්ථකාමං පවෙදෙන්තිං [පවදන්තිං (පී.)], අනත්ථකාමාති මඤ්ඤති;

අනත්ථකාමං සතපත්තං, අත්ථකාමොති මඤ්ඤති.

86. එවමෙව ඉධෙකච්චො, පුග්ගලො හොති තාදිසො;

හිතෙහි වචනං වුත්තො, පටිගණ්හාති වාමතො.

87. යෙ ච ඛො නං පසංසන්ති, භයා උක්කංසයන්ති වා [ච (සී. පී.)];

තඤ්හි සො මඤ්ඤතෙ මිත්තං, සතපත්තංව මාණවොති.

සතපත්තජාතකං නවමං.

280. පුටදූසකජාතකං (3-3-10)

88. අද්ධා හි නූන මිගරාජා, පුටකම්මස්ස කොවිදො;

තථා හි පුටං දූසෙති, අඤ්ඤං නූන කරිස්සති.

89. න මෙ මාතා වා පිතා වා, පුටකම්මස්ස කොවිදො;

කතං කතං ඛො දූසෙම, එවං ධම්මමිදං කුලං.

90. යෙසං වො එදිසො ධම්මො, අධම්මො පන කීදිසො;

මා වො ධම්මං අධම්මං වා, අද්දසාම කුදාචනන්ති.

පුටදූසකජාතකං දසමං.

උදපානවග්ගො [අරඤ්ඤවග්ගො (සී. පී. ක.)] තතියො.

තස්සුද්දානං –

උදපානවරං වනබ්‍යග්ඝ කපි, සිඛිනී ච බලාක රුචිරවරො;

සුජනාධිපරොමකදූස පුන, සතපත්තවරො පුටකම්ම දසාති.