535. සුධාභොජනජාතකං (3)

192. ‘‘නෙව කිණාමි නපි වික්කිණාමි, න චාපි මෙ සන්නිචයො ච අත්ථි [ඉධත්ථි (ස්‍යා.)];

සුකිච්ඡරූපං වතිදං පරිත්තං, පත්ථොදනො නාලමයං දුවින්නං’’.

193. ‘‘අප්පම්හා අප්පකං දජ්ජා, අනුමජ්ඣතො මජ්ඣකං;

බහුම්හා බහුකං දජ්ජා, අදානං නුපපජ්ජති [න උපපජ්ජති (සී. පී.)].

194. ‘‘තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ [අරියං මග්ගං සමාරුහ (සී. පී.)], නෙකාසී ලභතෙ සුඛං’’.

195. ‘‘මොඝඤ්චස්ස හුතං හොති, මොඝඤ්චාපි සමීහිතං;

අතිථිස්මිං යො නිසින්නස්මිං, එකො භුඤ්ජති භොජනං.

196. ‘‘තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං’’.

197. ‘‘සච්චඤ්චස්ස හුතං හොති, සච්චඤ්චාපි සමීහිතං;

අතිථිස්මිං යො නිසින්නස්මිං, නෙකො භුඤ්ජති භොජනං.

198. ‘‘තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං’’.

199. ‘‘සරඤ්ච ජුහති පොසො, බහුකාය ගයාය ච;

දොණෙ තිම්බරුතිත්ථස්මිං, සීඝසොතෙ මහාවහෙ.

200. ‘‘අත්‍ර චස්ස හුතං හොති, අත්‍ර චස්ස සමීහිතං;

අතිථිස්මිං යො නිසින්නස්මිං, නෙකො භුඤ්ජති භොජනං.

201. ‘‘තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං’’.

202. ‘‘බළිසඤ්හි සො නිගිලති [නිග්ගිලති (සී. පී.)], දීඝසුත්තං සබන්ධනං;

අතිථිස්මිං යො නිසින්නස්මිං, එකො භුඤ්ජති භොජනං.

203. ‘‘තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං’’.

204. ‘‘උළාරවණ්ණා වත බ්‍රාහ්මණා ඉමෙ, අයඤ්ච වො සුනඛො කිස්ස හෙතු;

උච්චාවචං වණ්ණනිභං විකුබ්බති, අක්ඛාථ නො බ්‍රාහ්මණා කෙ නු තුම්හෙ’’.

205. ‘‘චන්දො ච සූරියො ච [සූරියො ච (ක.)] උභො ඉධාගතා, අයං පන මාතලි දෙවසාරථි;

සක්කොහමස්මි තිදසානමින්දො, එසො ච ඛො පඤ්චසිඛොති වුච්චති.

206. ‘‘පාණිස්සරා මුදිඞ්ගා ච [මුතිඞ්ගා ච (සී. ස්‍යා. පී.)], මුරජාලම්බරානි ච;

සුත්තමෙනං පබොධෙන්ති, පටිබුද්ධො ච නන්දති’’.

207. ‘‘යෙ කෙචිමෙ මච්ඡරිනො කදරියා, පරිභාසකා සමණබ්‍රාහ්මණානං;

ඉධෙව නික්ඛිප්ප සරීරදෙහං, කායස්ස භෙදා නිරයං වජන්ති’’.

208. ‘‘යෙ කෙචිමෙ සුග්ගතිමාසමානා [සුග්ගතිමාසසානා (සී. පී.), සුග්ගතාසිසමානා (ක.)], ධම්මෙ ඨිතා සංයමෙ සංවිභාගෙ;

ඉධෙව නික්ඛිප්ප සරීරදෙහං, කායස්ස භෙදා සුගතිං වජන්ති’’.

209. ‘‘ත්වං නොසි ඤාති පුරිමාසු ජාතිසු, සො මච්ඡරී රොසකො [කොසියො (ස්‍යා. ක.)] පාපධම්මො;

තවෙව අත්ථාය ඉධාගතම්හා, මා පාපධම්මො නිරයං ගමිත්ථ’’ [අපත්ථ (ක. සී. ස්‍යා. පී.)].

210. ‘‘අද්ධා හි මං වො හිතකාමා, යං මං සමනුසාසථ;

සොහං තථා කරිස්සාමි, සබ්බං වුත්තං හිතෙසිභි.

211. ‘‘එසාහමජ්ජෙව උපාරමාමි, න චාපිහං [න චාපහං (සී. පී.)] කිඤ්චි කරෙය්‍ය පාපං;

න චාපි මෙ කිඤ්චි අදෙය්‍යමත්ථි, න චාපිදත්වා උදකං පිවාමි [උදකම්පහං පිබෙ (සී.)].

212. ‘‘එවඤ්ච මෙ දදතො සබ්බකාලං [සබ්බකාලෙ (ක.)], භොගා ඉමෙ වාසව ඛීයිස්සන්ති;

තතො අහං පබ්බජිස්සාමි සක්ක, හිත්වාන කාමානි යථොධිකානි’’.

213. ‘‘නගුත්තමෙ ගිරිවරෙ ගන්ධමාදනෙ, මොදන්ති තා දෙවවරාභිපාලිතා;

අථාගමා ඉසිවරො සබ්බලොකගූ, සුපුප්ඵිතං දුමවරසාඛමාදිය.

214. ‘‘සුචිං සුගන්ධං තිදසෙහි සක්කතං, පුප්ඵුත්තමං අමරවරෙහි සෙවිතං;

අලද්ධ මච්චෙහි ව දානවෙහි වා, අඤ්ඤත්‍ර දෙවෙහි තදාරහං හිදං [හිතං (ස්‍යා.)].

215. ‘‘තතො චතස්සො කනකත්තචූපමා, උට්ඨාය නාරියො පමදාධිපා මුනිං;

ආසා ච සද්ධා ච සිරී තතො හිරී, ඉච්චබ්‍රවුං නාරදදෙව බ්‍රාහ්මණං.

216. ‘‘සචෙ අනුද්දිට්ඨං තයා මහාමුනි, පුප්ඵං ඉමං පාරිඡත්තස්ස බ්‍රහ්මෙ;

දදාහි නො සබ්බා ගති තෙ ඉජ්ඣතු, තුවම්පි නො හොහි යථෙව වාසවො.

217. ‘‘තං යාචමානාභිසමෙක්ඛ නාරදො, ඉච්චබ්‍රවී සංකලහං උදීරයි;

න මය්හමත්ථත්ථි ඉමෙහි කොචි නං, යායෙව වො සෙය්‍යසි සා පිළන්ධථ’’ [පිළය්හථ (සී. පී.)].

218. ‘‘ත්වං නොත්තමෙවාභිසමෙක්ඛ නාරද, යස්සිච්ඡසි තස්සා අනුප්පවෙච්ඡසු;

යස්සා හි නො නාරද ත්වං පදස්සසි, සායෙව නො හෙහිති සෙට්ඨසම්මතා’’.

219. ‘‘අකල්ලමෙතං වචනං සුගත්තෙ, කො බ්‍රාහ්මණො සංකලහං උදීරයෙ;

ගන්ත්වාන භූතාධිපමෙව පුච්ඡථ, සචෙ න ජානාථ ඉධුත්තමාධමං’’.

220. ‘‘තා නාරදෙන පරමප්පකොපිතා, උදීරිතා වණ්ණමදෙන මත්තා;

සකාසෙ [සකාසං (ක.)] ගන්ත්වාන සහස්සචක්ඛුනො, පුච්ඡිංසු භූතාධිපං කා නු සෙය්‍යසි’’.

221. ‘‘තා දිස්වා ආයත්තමනා පුරින්දදො, ඉච්චබ්‍රවී දෙවවරො කතඤ්ජලී;

සබ්බාව වො හොථ සුගත්තෙ සාදිසී, කො නෙව භද්දෙ කලහං උදීරයි’’.

222. ‘‘යො සබ්බලොකච්චරිතො [සබ්බලොකං චරකො (සී. ස්‍යා. පී.)] මහාමුනි, ධම්මෙ ඨිතො නාරදො [නාරද (ස්‍යා.)] සච්චනික්කමො;

සො නොබ්‍රවි [බ්‍රවී (සී. ස්‍යා. පී.)] ගිරිවරෙ ගන්ධමාදනෙ, ගන්ත්වාන භූතාධිපමෙව පුච්ඡථ;

සචෙ න ජානාථ ඉධුත්තමාධමං’’.

223. ‘‘අසු [අසූ (ස්‍යා.)] බ්‍රහාරඤ්ඤචරො මහාමුනි, නාදත්වා භත්තං වරගත්තෙ භුඤ්ජති;

විචෙය්‍ය දානානි දදාති කොසියො, යස්සා හි සො දස්සති සාව සෙය්‍යසි’’.

224. ‘‘අසූ හි යො සම්මති දක්ඛිණං දිසං, ගඞ්ගාය තීරෙ හිමවන්තපස්සනි [හිමවන්තපස්මනි (සී. පී. ක.)];

ස කොසියො දුල්ලභපානභොජනො, තස්ස සුධං පාපය දෙවසාරථි’’.

225. ‘‘ස [සො (ස්‍යා.)] මාතලී දෙවවරෙන පෙසිතො, සහස්සයුත්තං අභිරුය්හ සන්දනං;

සුඛිප්පමෙව [ස ඛිප්පමෙව (සී. පී.)] උපගම්ම අස්සමං, අදිස්සමානො මුනිනො සුධං අදා’’.

226. ‘‘උදග්ගිහුත්තං උපතිට්ඨතො හි මෙ, පභඞ්කරං ලොකතමොනුදුත්තමං;

සබ්බානි භූතානි අධිච්ච [අතිච්ච (සී. පී.)] වාසවො, කො නෙව මෙ පාණිසු කිං සුධොදහි.

227. ‘‘සඞ්ඛූපමං සෙතමතුල්‍යදස්සනං, සුචිං සුගන්ධං පියරූපමබ්භුතං;

අදිට්ඨපුබ්බං මම ජාතු චක්ඛුභි [ජාතචක්ඛුහි (සී. පී.)], කා දෙවතා පාණිසු කිං සුධොදහි’’.

228. ‘‘අහං මහින්දෙන මහෙසි පෙසිතො, සුධාභිහාසිං තුරිතො මහාමුනි;

ජානාසි මං මාතලි දෙවසාරථි, භුඤ්ජස්සු භත්තුත්තම මාභිවාරයි [මා විචාරයි (සී. පී.)].

229. ‘‘භුත්තා ච සා ද්වාදස හන්ති පාපකෙ, ඛුදං පිපාසං අරතිං දරක්ලමං [දරථං කිලං (ස්‍යා.), දරථක්ඛමං (ක.)];

කොධූපනාහඤ්ච විවාදපෙසුණං, සීතුණ්හතන්දිඤ්ච රසුත්තමං ඉදං’’.

230. ‘‘න කප්පතී මාතලි මය්හ භුඤ්ජිතුං, පුබ්බෙ අදත්වා ඉති මෙ වතුත්තමං;

න චාපි එකාස්නමරීයපූජිතං [එකාසනං අරියපූජිතං (සී. පී.)], අසංවිභාගී ච සුඛං න වින්දති’’.

231. ‘‘ථීඝාතකා යෙ චිමෙ පාරදාරිකා, මිත්තද්දුනො යෙ ච සපන්ති සුබ්බතෙ;

සබ්බෙ ච තෙ මච්ඡරිපඤ්චමාධමා, තස්මා අදත්වා උදකම්පි නාස්නියෙ [නාස්මියෙ (සී. පී.)].

232. ‘‘සො හිත්ථියා වා පුරිසස්ස වා පන, දස්සාමි දානං විදුසම්පවණ්ණිතං;

සද්ධා වදඤ්ඤූ ඉධ වීතමච්ඡරා, භවන්ති හෙතෙ සුචිසච්චසම්මතා’’ [සම්මසම්මතා (සී.)].

233. ‘‘අතො මතා [මුතා (සී. පී.)] දෙවවරෙන පෙසිතා, කඤ්ඤා චතස්සො කනකත්තචූපමා;

ආසා ච සද්ධා ච සිරී තතො හිරී [සිරී හිරී තතො (පී.)], තං අස්සමං ආගමු [ආගමුං (සී. පී. ක.)] යත්ථ කොසියො.

234. ‘‘තා දිස්වා සබ්බො පරමප්පමොදිතො [සබ්බා පරමප්පමොදිතා (ස්‍යා.)], සුභෙන වණ්ණෙන සිඛාරිවග්ගිනො;

කඤ්ඤා චතස්සො චතුරො චතුද්දිසා, ඉච්චබ්‍රවී මාතලිනො ච සම්මුඛා.

235. ‘‘පුරිමං දිසං කා ත්වං පභාසි දෙවතෙ, අලඞ්කතා තාරවරාව ඔසධී;

පුච්ඡාමි තං කඤ්චනවෙල්ලිවිග්ගහෙ, ආචික්ඛ මෙ ත්වං කතමාසි දෙවතා.

236. ‘‘සිරාහ දෙවීමනුජෙභි [මනුජෙසු (සී. ස්‍යා. පී.)] පූජිතා, අපාපසත්තූපනිසෙවිනී සදා;

සුධාවිවාදෙන තවන්තිමාගතා, තං මං සුධාය වරපඤ්ඤ භාජය.

237. ‘‘යස්සාහමිච්ඡාමි සුධං [සුඛං (පී.)] මහාමුනි, සො [ස (සී. පී.)] සබ්බකාමෙහි නරො පමොදති;

සිරීති මං ජානහි ජූහතුත්තම, තං මං සුධාය වරපඤ්ඤ භාජය’’.

238. ‘‘සිප්පෙන විජ්ජාචරණෙන බුද්ධියා, නරා උපෙතා පගුණා සකම්මුනා [සකම්මනා (සී. පී.)];

තයා විහීනා න ලභන්ති කිඤ්චනං [කිඤ්චිනං (ක.)], තයිදං න සාධු යදිදං තයා කතං.

239. ‘‘පස්සාමි පොසං අලසං මහග්ඝසං, සුදුක්කුලීනම්පි අරූපිමං නරං;

තයානුගුත්තො සිරි ජාතිමාමපි [ජාතිමං අපි (සී.)], පෙසෙති දාසං විය භොගවා සුඛී.

240. ‘‘තං තං අසච්චං අවිභජ්ජසෙවිනිං, ජානාමි මූළ්හං විදුරානුපාතිනිං;

න තාදිසී අරහති ආසනූදකං, කුතො සුධා ගච්ඡ න මය්හ රුච්චසි’’.

241. ‘‘කා සුක්කදාඨා පටිමුක්කකුණ්ඩලා, චිත්තඞ්ගදා කම්බුවිමට්ඨධාරිනී;

ඔසිත්තවණ්ණං පරිදය්හ සොභසි, කුසග්ගිරත්තං අපිළය්හ මඤ්ජරිං.

242. ‘‘මිගීව භන්තා සරචාපධාරිනා, විරාධිතා මන්දමිව උදික්ඛසි;

කො තෙ දුතීයො ඉධ මන්දලොචනෙ, න භායසි එකිකා කානනෙ වනෙ’’.

243. ‘‘න මෙ දුතීයො ඉධ මත්ථි කොසිය, මසක්කසාරප්පභවම්හි දෙවතා;

ආසා සුධාසාය තවන්තිමාගතා, තං මං සුධාය වරපඤ්ඤ භාජය’’.

244. ‘‘ආසාය යන්ති වාණිජා ධනෙසිනො, නාවං සමාරුය්හ පරෙන්ති අණ්ණවෙ;

තෙ තත්ථ සීදන්ති අථොපි එකදා, ජීනාධනා එන්ති විනට්ඨපාභතා.

245. ‘‘ආසාය ඛෙත්තානි කසන්ති කස්සකා, වපන්ති බීජානි කරොන්තුපායසො;

ඊතීනිපාතෙන අවුට්ඨිතාය [අවුට්ඨිකාය (සී. පී.)] වා, න කිඤ්චි වින්දන්ති තතො ඵලාගමං.

246. ‘‘අථත්තකාරානි කරොන්ති භත්තුසු, ආසං පුරක්ඛත්වා නරා සුඛෙසිනො;

තෙ භත්තුරත්ථා අතිගාළ්හිතා පුන, දිසා පනස්සන්ති අලද්ධ කිඤ්චනං.

247. ‘‘හිත්වාන [ජහිත්ව (සී. ස්‍යා. පී.)] ධඤ්ඤඤ්ච ධනඤ්ච ඤාතකෙ, ආසාය සග්ගාධිමනා සුඛෙසිනො;

තපන්ති ලූඛම්පි තපං චිරන්තරං, කුමග්ගමාරුය්හ [කුම්මග්ගමාරුය්හ (සී. ස්‍යා. පී.)] පරෙන්ති දුග්ගතිං.

248. ‘‘ආසා විසංවාදිකසම්මතා ඉමෙ, ආසෙ සුධාසං [සුධාය (ස්‍යා පී. ක.)] විනයස්සු අත්තනි;

න තාදිසී අරහති ආසනූදකං, කුතො සුධා ගච්ඡ න මය්හ රුච්චසි’’.

249. ‘‘දද්දල්ලමානා යසසා යසස්සිනී, ජිඝඤ්ඤනාමව්හයනං දිසං පති;

පුච්ඡාමි තං කඤ්චනවෙල්ලිවිග්ගහෙ, ආචික්ඛ මෙ ත්වං කතමාසි දෙවතා’’.

250. ‘‘සද්ධාහ දෙවීමනුජෙහි [දෙවීමනුජෙසු (සී. ස්‍යා. පී.)] පූජිතා, අපාපසත්තූපනිසෙවිනී සදා;

සුධාවිවාදෙන තවන්තිමාගතා, තං මං සුධාය වරපඤ්ඤ භාජය’’.

251. ‘‘දානං දමං චාගමථොපි සංයමං, ආදාය සද්ධාය කරොන්ති හෙකදා;

ථෙය්‍යං මුසා කූටමථොපි පෙසුණං, කරොන්ති හෙකෙ පුන විච්චුතා තයා.

252. ‘‘භරියාසු පොසො සදිසීසු පෙක්ඛවා [පෙඛවා (පී.)], සීලූපපන්නාසු පතිබ්බතාසුපි;

විනෙත්වාන [විනෙත්වා (සී. ස්‍යා. පී.)] ඡන්දං කුලිත්ථියාසුපි [කුලධීතියාසුපි (සී. පී.)], කරොති සද්ධං පුන [පන (සී. පී.)] කුම්භදාසියා.

253. ‘‘ත්වමෙව සද්ධෙ පරදාරසෙවිනී, පාපං කරොසි කුසලම්පි රිඤ්චසි;

න තාදිසී අරහති ආසනූදකං, කුතො සුධා ගච්ඡ න මය්හ රුච්චසි’’.

254. ‘‘ජිඝඤ්ඤරත්තිං අරුණස්මිමූහතෙ, යා දිස්සති උත්තමරූපවණ්ණිනී;

තථූපමා මං පටිභාසි දෙවතෙ, ආචික්ඛ මෙ ත්වං කතමාසි අච්ඡරා.

255. ‘‘කාලා නිදාඝෙරිව අග්ගිජාරිව [අග්ගජාතිව (සී.), අග්ගිජාතිව (පී.)], අනිලෙරිතා ලොහිතපත්තමාලිනී;

කා තිට්ඨසි මන්දමිගාවලොකයං [මන්දමිවාවලොකයං (සී. පී.)], භාසෙසමානාව ගිරං න මුඤ්චසි’’.

256. ‘‘හිරාහ දෙවීමනුජෙහි පූජිතා, අපාපසත්තූපනිසෙවිනී සදා;

සුධාවිවාදෙන තවන්තිමාගතා, සාහං න සක්කොමි සුධම්පි යාචිතුං;

කොපීනරූපා විය යාචනිත්ථියා’’.

257. ‘‘ධම්මෙන ඤායෙන සුගත්තෙ ලච්ඡසි, එසො හි ධම්මො න හි යාචනා සුධා;

තං තං අයාචන්තිමහං නිමන්තයෙ, සුධාය යඤ්චිච්ඡසි තම්පි දම්මි තෙ.

258. ‘‘සා ත්වං මයා අජ්ජ සකම්හි අස්සමෙ, නිමන්තිතා කඤ්චනවෙල්ලිවිග්ගහෙ;

තුවඤ්හි මෙ සබ්බරසෙහි පූජියා, තං පූජයිත්වාන සුධම්පි අස්නියෙ’’.

259. ‘‘සා කොසියෙනානුමතා ජුතීමතා, අද්ධා හිරි රම්මං පාවිසි යස්සමං;

උදකවන්තං [උදඤ්ඤවන්තං (සී. පී.)] ඵලමරියපූජිතං, අපාපසත්තූපනිසෙවිතං සදා.

260. ‘‘රුක්ඛග්ගහානා බහුකෙත්ථ පුප්ඵිතා, අම්බා පියාලා පනසා ච කිංසුකා;

සොභඤ්ජනා ලොද්දමථොපි පද්මකා, කෙකා ච භඞ්ගා තිලකා සුපුප්ඵිතා.

261. ‘‘සාලා කරෙරී බහුකෙත්ථ ජම්බුයො, අස්සත්ථනිග්‍රොධමධුකවෙතසා [වෙදිසා (ක.)];

උද්දාලකා පාටලි සින්දුවාරකා [සින්දුවාරිතා (බහූසු)], මනුඤ්ඤගන්ධා මුචලින්දකෙතකා.

262. ‘‘හරෙණුකා වෙළුකා කෙණු [වෙණු (සී. පී.)] තින්දුකා, සාමාකනීවාරමථොපි චීනකා;

මොචා කදලී බහුකෙත්ථ සාලියො, පවීහයො ආභූජිනො ච [ආභුජිනොපි (සී. ස්‍යා.)] තණ්ඩුලා.

263. ‘‘තස්සෙවුත්තරපස්සෙන [තස්ස ච උත්තරෙ පස්සෙ (සී. පී.), තස්ස ච උත්තරපස්සෙන (ස්‍යා.)], ජාතා පොක්ඛරණී සිවා;

අකක්කසා අපබ්භාරා, සාධු අප්පටිගන්ධිකා.

264. ‘‘තත්ථ මච්ඡා සන්නිරතා, ඛෙමිනො බහුභොජනා;

සිඞ්ගූ සවඞ්කා සංකුලා [සකුලා (සී. ස්‍යා. පී.)], සතවඞ්කා ච රොහිතා;

ආළිගග්ගරකාකිණ්ණා, පාඨීනා කාකමච්ඡකා.