517. දකරක්ඛසජාතකං (7)

224. සචෙ වො වුය්හමානානං, සත්තන්නං උදකණ්ණවෙ;

මනුස්සබලිමෙසානො, නාවං ගණ්හෙය්‍ය රක්ඛසො;

අනුපුබ්බං කථං දත්වා, මුඤ්චෙසි දකරක්ඛසා [දකරක්ඛතො (පී.)].

225. මාතරං පඨමං දජ්ජං, භරියං දත්වාන භාතරං;

තතො සහායං දත්වාන, පඤ්චමං දජ්ජං [දජ්ජ (ස්‍යා.)] බ්‍රාහ්මණං;

ඡට්ඨාහං දජ්ජමත්තානං, නෙව දජ්ජං මහොසධං.

226. පොසෙතා තෙ ජනෙත්තී ච, දීඝරත්තානුකම්පිකා;

ඡබ්භී තයි පදුස්සති [පදුට්ඨස්මිං (සී. ස්‍යා.)], පණ්ඩිතා අත්ථදස්සිනී;

අඤ්ඤං උපනිසං කත්වා, වධා තං පරිමොචයි.

227. තං තාදිසිං [තාදිසං (ක.)] පාණදදිං, ඔරසං ගබ්භධාරිනිං [ගබ්භධාරිණිං (සී. ස්‍යා.)];

මාතරං කෙන දොසෙන, දජ්ජාසි දකරක්ඛිනො [දකරක්ඛතො (පී.)].

228. දහරා වියලඞ්කාරං, ධාරෙති අපිළන්ධනං;

දොවාරිකෙ අනීකට්ඨෙ, අතිවෙලං පජග්ඝති [සඤ්ජග්ඝති (ක.)].

229. අථොපි පටිරාජූනං, සයං දූතානි සාසති;

මාතරං තෙන දොසෙන, දජ්ජාහං දකරක්ඛිනො.

230. ඉත්ථිගුම්බස්ස පවරා, අච්චන්තං පියභාණිනී [අච්චන්තපියවාදිනී (සී. පී.)];

අනුග්ගතා [අනුබ්බතා (ස්‍යා.), අනුපුබ්බතා (ක.)] සීලවතී, ඡායාව අනපායිනී.

231. අක්කොධනා පුඤ්ඤවතී [පඤ්ඤවතී (සී. පී.)], පණ්ඩිතා අත්ථදස්සිනී;

උබ්බරිං [උප්පරිං (සී.)] කෙන දොසෙන, දජ්ජාසි දකරක්ඛිනො.

232. ඛිඩ්ඩාරතිසමාපන්නං, අනත්ථවසමාගතං;

සා මං සකාන පුත්තානං, අයාචං යාචතෙ ධනං.

233. සොහං දදාමි සාරත්තො [සාරතො (ස්‍යා.)], බහුං උච්චාවචං ධනං;

සුදුච්චජං චජිත්වාන, පච්ඡා සොචාමි දුම්මනො;

උබ්බරිං තෙන දොසෙන, දජ්ජාහං දකරක්ඛිනො.

234. යෙනොචිතා ජනපදා [ජානපදා (සී. ස්‍යා. පී.)], ආනීතා ච පටිග්ගහං;

ආභතං පරරජ්ජෙභි, අභිට්ඨාය බහුං ධනං.

235. ධනුග්ගහානං පවරං, සූරං තිඛිණමන්තිනං;

භාතරං කෙන දොසෙන, දජ්ජාසි දකරක්ඛිනො.

236. යෙනොචිතා [මයොචිතා (සී.), මයාචිතා (පී.)] ජනපදා, ආනීතා ච පටිග්ගහං;

ආභතං පරරජ්ජෙභි, අභිට්ඨාය බහුං ධනං.

237. ධනුග්ගහානං පවරො, සූරො තිඛිණමන්ති ච [තිඛිණමන්තිනො (ක.)];

මයායං [මයා සො (සී. පී.)] සුඛිතො රාජා, අතිමඤ්ඤති දාරකො.

238. උපට්ඨානම්පි මෙ අය්‍යෙ, න සො එති යථා පුරෙ;

භාතරං තෙන දොසෙන, දජ්ජාහං දකරක්ඛිනො.

239. එකරත්තෙන උභයො, ත්වඤ්චෙව ධනුසෙඛ ච [ධනුසෙඛවා (සී. ස්‍යා. පී.)];

උභො ජාතෙත්ථ පඤ්චාලා, සහායා සුසමාවයා.

240. චරියා තං අනුබන්ධිත්ථො [අනුබන්ධො (ක.)], එකදුක්ඛසුඛො තව;

උස්සුක්කො තෙ දිවාරත්තිං, සබ්බකිච්චෙසු බ්‍යාවටො;

සහායං කෙන දොසෙන, දජ්ජාසි දකරක්ඛිනො.

241. චරියා මං අයං [චරියාය අයං (සී. පී.)] අය්‍යෙ, පජග්ඝිත්ථො [සඤ්ජග්ඝිත්ථො (ස්‍යා.)] මයා සහ;

අජ්ජාපි තෙන වණ්ණෙන, අතිවෙලං පජග්ඝති.

242. උබ්බරියාපිහං අය්‍යෙ, මන්තයාමි රහොගතො;

අනාමන්තො [අනාමන්තා (සී.)] පවිසති, පුබ්බෙ අප්පටිවෙදිතො.

243. ලද්ධද්වාරො [ලද්ධවාරො (සී. පී.)] කතොකාසො, අහිරිකං අනාදරං;

සහායං තෙන දොසෙන, දජ්ජාහං දකරක්ඛිනො.

244. කුසලො සබ්බනිමිත්තානං, රුතඤ්ඤූ [රුදඤ්ඤූ (සී. ස්‍යා. පී.)] ආගතාගමො;

උප්පාතෙ සුපිනෙ යුත්තො, නිය්‍යානෙ ච පවෙසනෙ.

245. පට්ඨො [පද්ධො (සී. පී.)] භූමන්තලික්ඛස්මිං, නක්ඛත්තපදකොවිදො;

බ්‍රාහ්මණං කෙන දොසෙන, දජ්ජාසි දකරක්ඛිනො.

246. පරිසායම්පි මෙ අය්‍යෙ, උම්මීලිත්වා උදික්ඛති;

තස්මා අච්චභමුං ලුද්දං, දජ්ජාහං දකරක්ඛිනො.

247. සසමුද්දපරියායං, මහිං සාගරකුණ්ඩලං;

වසුන්ධරං ආවසසි, අමච්චපරිවාරිතො.

248. චාතුරන්තො මහාරට්ඨො, විජිතාවී මහබ්බලො;

පථබ්‍යා එකරාජාසි, යසො තෙ විපුලං ගතො.

249. සොළසිත්ථිසහස්සානි, ආමුත්තමණිකුණ්ඩලා;

නානාජනපදා නාරී, දෙවකඤ්ඤූපමා සුභා.

250. එවං සබ්බඞ්ගසම්පන්නං, සබ්බකාමසමිද්ධිනං;

සුඛිතානං පියං දීඝං, ජීවිතං ආහු ඛත්තිය.

251. අථ ත්වං කෙන වණ්ණෙන, කෙන වා පන හෙතුනා;

පණ්ඩිතං අනුරක්ඛන්තො, පාණං චජසි දුච්චජං.

252. යතොපි ආගතො අය්‍යෙ, මම හත්ථං මහොසධො;

නාභිජානාමි ධීරස්ස, අනුමත්තම්පි දුක්කටං.

253. සචෙ ච කිස්මිචි කාලෙ, මරණං මෙ පුරෙ සියා;

සො මෙ පුත්තෙ [පුත්තෙ ච මෙ (සී. ස්‍යා. පී.] පපුත්තෙ ච, සුඛාපෙය්‍ය මහොසධො.

254. අනාගතං පච්චුප්පන්නං, සබ්බමත්ථම්පි පස්සති [සබ්බමත්ථං විපස්සති (සී. ස්‍යා. පී.)];

අනාපරාධකම්මන්තං, න දජ්ජං දකරක්ඛිනො.

255. ඉදං සුණාථ පඤ්චාලා, චූළනෙය්‍යස්ස [චූළනීයස්ස (සී.)] භාසිතං;

පණ්ඩිතං අනුරක්ඛන්තො, පාණං චජති දුච්චජං.

256. මාතු භරියාය භාතුච්ච, සඛිනො බ්‍රාහ්මණස්ස ච;

අත්තනො චාපි පඤ්චාලො, ඡන්නං චජති ජීවිතං.

257. එවං මහත්ථිකා [ඛහිද්ධියා (ස්‍යා.), මහිද්ධිකා (ක.)] පඤ්ඤා, නිපුණා සාධුචින්තිනී;

දිට්ඨධම්මහිතත්ථාය, සම්පරායසුඛාය චාති.

දකරක්ඛසජාතකං සත්තමං.