518. පණ්ඩරනාගරාජජාතකං (8)

258. විකිණ්ණවාචං අනිගුය්හ [අනිගූළ්හ (පී.)] මන්තං, අසඤ්ඤතං අපරිචක්ඛිතාරං [අපරිරක්ඛිතාරං (ක.)];

භයං තමන්වෙති සයං අබොධං, නාගං යථා පණ්ඩරකං සුපණ්ණො [සුවණ්ණො (ක.)].

259. යො ගුය්හමන්තං පරිරක්ඛනෙය්‍යං, මොහා නරො සංසති හාසමානො [භාසමානො (පී.)];

තං භින්නමන්තං භයමන්වෙති ඛිප්පං, නාගං යථා පණ්ඩරකං සුපණ්ණො.

260. නානුමිත්තො ගරුං අත්ථං, ගුය්හං වෙදිතුමරහති;

සුමිත්තො ච අසම්බුද්ධං, සම්බුද්ධං වා අනත්ථ වා.

261. විස්සාසමාපජ්ජිමහං අචෙලං [අචෙලො (සී. පී.)], සමණො අයං සම්මතො භාවිතත්තො;

තස්සාහමක්ඛිං විවරිං [විවරං (සී.)] ගුය්හමත්ථං, අතීතමත්ථො කපණං [කපණො (පී.)] රුදාමි.

262. තස්සාහං පරමං [පුරිමං (සී.)] බ්‍රහ්මෙ ගුය්හං, වාචඤ්හි මං නාසක්ඛිං [නාසක්ඛි (පී.)] සංයමෙතුං;

තප්පක්ඛතො හි භයමාගතං මමං, අතීතමත්ථො කපණං රුදාමි.

263. යො වෙ නරො සුහදං මඤ්ඤමානො, ගුය්හමත්ථං සංසති දුක්කුලීනෙ;

දොසා භයා අථවා රාගරත්තා [රාගරත්තො (සී. ස්‍යා. පී.)], පල්ලත්ථිතො [පල්ලිත්ථො (පී.), පල්ලත්තිතො (ක.)] බාලො අසංසයං සො.

264. තිරොක්ඛවාචො අසතං පවිට්ඨො, යො සඞ්ගතීසු මුදීරෙති වාක්‍යං;

ආසීවිසො දුම්මුඛොත්‍යාහු තං නරං, ආරා ආරා [ආරා අරා (පී.)] සංයමෙ තාදිසම්හා.

265. අන්නං පානං කාසික [කාසිකං (පී.)] චන්දනඤ්ච, මනාපිත්ථියො මාලමුච්ඡාදනඤ්ච;

ඔහාය ගච්ඡාමසෙ සබ්බකාමෙ, සුපණ්ණ පාණූපගතාව ත්‍යම්හා.

266. කො නීධ තිණ්ණං ගරහං උපෙති, අස්මිංධ ලොකෙ පාණභූ නාගරාජ;

සමණො සුපණ්ණො අථ වා ත්වමෙව, කිං කාරණා පණ්ඩරකග්ගහීතො.

267. සමණොති මෙ සම්මතත්තො අහොසි, පියො ච මෙ මනසා භාවිතත්තො;

තස්සාහමක්ඛිං විවරිං ගුය්හමත්ථං, අතීතමත්ථො කපණං රුදාමි.

268. න චත්ථි සත්තො අමරො පථබ්‍යා, පඤ්ඤාවිධා නත්ථි න නින්දිතබ්බා;

සච්චෙන ධම්මෙන ධිතියා [ධියා (සී. පී.)] දමෙන, අලබ්භමබ්‍යාහරතී නරො ඉධ.

269. මාතාපිතා පරමා බන්ධවානං, නාස්ස තතියො අනුකම්පකත්ථි;

තෙසම්පි ගුය්හං පරමං න සංසෙ, මන්තස්ස භෙදං පරිසඞ්කමානො.

270. මාතාපිතා භගිනී භාතරො ච, සහායා වා යස්ස හොන්ති සපක්ඛා;

තෙසම්පි ගුය්හං පරමං න සංසෙ, මන්තස්ස භෙදං පරිසඞ්කමානො.

271. භරියා චෙ පුරිසං වජ්ජා, කොමාරී පියභාණිනී;

පුත්තරූපයසූපෙතා, ඤාතිසඞ්ඝපුරක්ඛතා, තස්සාපි ගුය්හං පරමං න සංසෙ;

මන්තස්ස භෙදං පරිසඞ්කමානො.

272. න ගුය්හමත්ථං [ගුය්හත්ථං (ක.)] විවරෙය්‍ය, රක්ඛෙය්‍ය නං යථා නිධිං;

න හි පාතුකතො සාධු, ගුය්හො අත්ථො පජානතා.

273. ථියා ගුය්හං න සංසෙය්‍ය, අමිත්තස්ස ච පණ්ඩිතො;

යො චාමිසෙන සංහීරො, හදයත්ථෙනො ච යො නරො.

274. ගුය්හමත්ථං අසම්බුද්ධං, සම්බොධයති යො නරො;

මන්තභෙදභයා තස්ස, දාසභූතො තිතික්ඛති.

275. යාවන්තො පුරිසස්සත්ථං, ගුය්හං ජානන්ති මන්තිනං;

තාවන්තො තස්ස උබ්බෙගා, තස්මා ගුය්හං න විස්සජෙ.

276. විවිච්ච භාසෙය්‍ය දිවා රහස්සං, රත්තිං ගිරං නාතිවෙලං පමුඤ්චෙ;

උපස්සුතිකා හි සුණන්ති මන්තං, තස්මා මන්තො ඛිප්පමුපෙති භෙදං.

277. යථාපි අස්ස [අයො (ස්‍යා.), අය (ක.)] නගරං මහන්තං, අද්වාරකං [ආළාරකං (පී.)] ආයසං භද්දසාලං;

සමන්තඛාතාපරිඛාඋපෙතං, එවම්පි මෙ තෙ ඉධ ගුය්හමන්තා.

278. යෙ ගුය්හමන්තා අවිකිණ්ණවාචා, දළ්හා සදත්ථෙසු නරා දුජිව්හ [දුජිව්හා (ස්‍යා. පී.)];

ආරා අමිත්තා බ්‍යවජන්ති තෙහි, ආසීවිසා වා රිව සත්තුසඞ්ඝා [සත්තසඞ්ඝා (සී. ස්‍යා.)].

279. හිත්වා ඝරං පබ්බජිතො අචෙලො, නග්ගො මුණ්ඩො චරති ඝාසහෙතු;

තම්හි [තම්හී (පී.)] නු ඛො විවරිං ගුය්හමත්ථං, අත්ථා ච ධම්මා ච අපග්ගතම්හා [අපාගතම්හා (සී.), අපගතම්හා (ස්‍යා.), අවාගතම්හා (පී.)].

280. කථංකරො හොති සුපණ්ණරාජ, කිංසීලො කෙන වතෙන වත්තං;

සමණො චරං හිත්වා මමායිතානි, කථංකරො සග්ගමුපෙති ඨානං.

281. හිරියා තිතික්ඛාය දමෙනුපෙතො [දමෙන ඛන්තියා (සී. ස්‍යා. පී.)], අක්කොධනො පෙසුණියං පහාය;

සමණො චරං හිත්වා මමායිතානි, එවංකරො සග්ගමුපෙති ඨානං.

282. මාතාව පුත්තං තරුණං තනුජ්ජං [තනූජං (සී.)], සම්ඵස්සතා [සම්පස්ස තං (සී. පී.)] සබ්බගත්තං ඵරෙති;

එවම්පි මෙ ත්වං පාතුරහු දිජින්ද, මාතාව පුත්තං අනුකම්පමානො.

283. හන්දජ්ජ ත්වං මුඤ්ච [මුච්ච (සී.)] වධා දුජිව්හ, තයො හි පුත්තා න හි අඤ්ඤො අත්ථි;

අන්තෙවාසී දින්නකො අත්‍රජො ච, රජ්ජස්සු [රජස්සු (සී. ස්‍යා. පී.)] පුත්තඤ්ඤතරො මෙ අහොසි.

284. ඉච්චෙව වාක්‍යං විසජ්ජී සුපණ්ණො, භුම්‍යං පතිට්ඨාය දිජො දුජිව්හං;

මුත්තජ්ජ ත්වං සබ්බභයාතිවත්තො, ථලූදකෙ හොහි මයාභිගුත්තො.

285. ආතඞ්කිනං යථා කුසලො භිසක්කො, පිපාසිතානං රහදොව සීතො;

වෙස්මං යථා හිමසීතට්ටිතානං [හිමසිසිරට්ටිතානං (පී.)], එවම්පි තෙ සරණමහං භවාමි.

286. සන්ධිං කත්වා අමිත්තෙන, අණ්ඩජෙන ජලාබුජ;

විවරිය දාඨං සෙසි, කුතො තං භයමාගතං.

287. සඞ්කෙථෙව අමිත්තස්මිං, මිත්තස්මිම්පි න විස්සසෙ;

අභයා භයමුප්පන්නං, අපි මූලානි කන්තති.

288. කථං නු විස්සසෙ ත්‍යම්හි, යෙනාසි කලහො කතො;

නිච්චයත්තෙන ඨාතබ්බං, සො දිසබ්භි [සො දිසම්හි (පී.)] න රජ්ජති.

289. විස්සාසයෙ න ච තං [නං (සී. ස්‍යා. පී.)] විස්සයෙය්‍ය, අසඞ්කිතො සඞ්කිතො ච [අසඞ්කිතො ච සඞ්කිතො (සී. පී.)] භවෙය්‍ය;

තථා තථා විඤ්ඤූ පරක්කමෙය්‍ය, යථා යථා භාවං පරො න ජඤ්ඤා.

290. තෙ දෙවවණ්ණා [දෙවවණ්ණී (පී.)] සුඛුමාලරූපා, උභො සමා සුජයා [සුජයො (සී. ස්‍යා. පී.)] පුඤ්ඤඛන්ධා [පුඤ්ඤගන්ධා (පී.)];

උපාගමුං කරම්පියං [කාදම්බියං (සී.), කාරම්බියං (පී.)] අචෙලං, මිස්සීභූතා අස්සවාහාව නාගා.

291. තතො හවෙ පණ්ඩරකො අචෙලං, සයමෙවුපාගම්ම ඉදං අවොච;

මුත්තජ්ජහං සබ්බභයාතිවත්තො, න හි [හ (පී.)] නූන තුය්හං මනසො පියම්හා.

292. පියො හි මෙ ආසි සුපණ්ණරාජා, අසංසයං පණ්ඩරකෙන සච්චං;

සො රාගරත්තොව අකාසිමෙතං, පාපකම්මං [පාපං කම්මං (සී. පී.)] සම්පජානො න මොහා.

293. න මෙ පියං අප්පියං වාපි හොති, සම්පස්සතො ලොකමිමං පරඤ්ච;

සුසඤ්ඤතානඤ්හි වියඤ්ජනෙන, අසඤ්ඤතො ලොකමිමං චරාසි.

294. අරියාවකාසොසි අනරියොවාසි [අනරියො චාසි (සී. පී.)], අසඤ්ඤතො සඤ්ඤතසන්නිකාසො;

කණ්හාභිජාතිකොසි අනරියරූපො, පාපං බහුං දුච්චරිතං අචාරි.

295. අදුට්ඨස්ස තුවං දුබ්භි, දුබ්භී [දූභි, දූභී (පී.)] ච පිසුණො චසි;

එතෙන සච්චවජ්ජෙන, මුද්ධා තෙ ඵලතු සත්තධා.

296. තස්මා හි මිත්තානං න දුබ්භිතබ්බං, මිත්තදුබ්භා [මිත්තදුබ්භා හි (ස්‍යා.)] පාපියො නත්ථි අඤ්ඤො;

ආසිත්තසත්තො නිහතො පථබ්‍යා, ඉන්දස්ස වාක්‍යෙන හි සංවරො හතොති.

පණ්ඩරනාගරාජජාතකං [පණ්ඩරකජාතකං (සී. ස්‍යා. පී.)] අට්ඨමං.