516. මහාකපිජාතකං (6)

178. බාරාණස්‍යං [බාරාණස්සං (සී. පී.)] අහූ රාජා, කාසීනං රට්ඨවඩ්ඪනො;

මිත්තාමච්චපරිබ්‍යූළ්හො, අගමාසි මිගාජිනං [මිගාජිරං (සී.), මිගාචිරං (පී.)].

179. තත්ථ බ්‍රාහ්මණමද්දක්ඛි, සෙතං චිත්‍රං කිලාසිනං;

විද්ධස්තං කොවිළාරංව, කිසං ධමනිසන්ථතං.

180. පරමකාරුඤ්ඤතං පත්තං, දිස්වා කිච්ඡගතං නරං;

අවච බ්‍යම්හිතො රාජා, ‘‘යක්ඛානං කතමො නුසි.

181. ‘‘හත්ථපාදා ච තෙ සෙතා, තතො සෙතතරං [සෙතතරො (පී.)] සිරො;

ගත්තං කම්මාසවණ්ණං තෙ, කිලාසබහුලො චසි.

182. ‘‘වට්ටනාවළි [වට්ඨනාවලි (පී.)] සඞ්කාසා, පිට්ඨි තෙ නින්නතුන්නතා;

කාළපබ්බාව [කාළපබ්බා ච (ස්‍යා.), කාළා පබ්බා ච (පී.)] තෙ අඞ්ගා, නාඤ්ඤං පස්සාමි එදිසං.

183. ‘‘උග්ඝට්ටපාදො තසිතො, කිසො ධමනිසන්ථතො;

ඡාතො ආතත්තරූපොසි [ආදිත්තරූපොසි (ක.), අතිත්තරූපොසි (ස්‍යා. ක. අට්ඨ.)], කුතොසි කත්ථ ගච්ඡසි.

184. ‘‘දුද්දසී අප්පකාරොසි, දුබ්බණ්ණො භීමදස්සනො;

ජනෙත්ති යාපි තෙ මාතා, න තං ඉච්ඡෙය්‍ය පස්සිතුං.

185. ‘‘කිං කම්මමකරං [කම්මමකරා (සී. ස්‍යා. පී.)] පුබ්බෙ, කං අවජ්ඣං අඝාතයි;

කිබ්බිසං යං කරිත්වාන, ඉදං දුක්ඛං උපාගමි’’.

186. තග්ඝ තෙ අහමක්ඛිස්සං, යථාපි කුසලො තථා;

සච්චවාදිඤ්හි ලොකස්මිං, පසංසන්තීධ පණ්ඩිතා.

187. එකො චරං ගොගවෙසො, මූළ්හො අච්චසරිං වනෙ;

අරඤ්ඤෙ ඉරීණෙ [ඊරිණෙ (සී. ස්‍යා. පී.)] විවනෙ, නානාකුඤ්ජරසෙවිතෙ.

188. වාළමිගානුචරිතෙ, විප්පනට්ඨොස්මි කානනෙ;

අචරිං තත්ථ සත්තාහං, ඛුප්පිපාස [ඛුප්පිපාසා (සී. පී.)] සමප්පිතො.

189. තත්ථ තින්දුකමද්දක්ඛිං, විසමට්ඨං බුභුක්ඛිතො;

පපාතමභිලම්බන්තං, සම්පන්නඵලධාරිනං.

190. වාතස්සිතානි භක්ඛෙසිං, තානි රුච්චිංසු මෙ භුසං;

අතිත්තො රුක්ඛමාරූහිං [මාරුය්හ (සී. ස්‍යා.)], තත්ථ හෙස්සාමි ආසිතො.

191. එකං මෙ භක්ඛිතං ආසි, දුතියං අභිපත්ථිතං;

තතො සා භඤ්ජථ සාඛා, ඡින්නා ඵරසුනා විය.

192. සොහං සහාව සාඛාහි, උද්ධංපාදො අවංසිරො;

අප්පතිට්ඨෙ අනාලම්බෙ, ගිරිදුග්ගස්මි පාපතං.

193. යස්මා ච වාරි ගම්භීරං, තස්මා න සමපජ්ජිසං [සමපජ්ජසිං (සී.), සමභජ්ජිසං (පී.)];

තත්ථ සෙසිං නිරානන්දො, අනූනා [අනාථො (සී.)] දස රත්තියො.

194. අථෙත්ථ කපි මාගඤ්ඡි [මාගච්ඡි (ස්‍යා. ක.)], ගොනඞ්ගුලො දරීචරො;

සාඛාහි සාඛං විචරන්තො, ඛාදමානො දුමප්ඵලං.

195. සො මං දිස්වා කිසං පණ්ඩුං, කාරුඤ්ඤමකරං මයි;

අම්භො කො නාම සො එත්ථ, එවං දුක්ඛෙන අට්ටිතො.

196. මනුස්සො අමනුස්සො වා, අත්තානං මෙ පවෙදය;

තස්සඤ්ජලිං පණාමෙත්වා, ඉදං වචනමබ්‍රවිං.

197. මනුස්සොහං බ්‍යසම්පත්තො [වසම්පත්තො (ස්‍යා. ක.)], සා මෙ නත්ථි ඉතො ගති;

තං වො වදාමි භද්දං වො, ත්වඤ්ච මෙ සරණං භව.

198. ගරුං [ගරු (සී. පී.)] සිලං ගහෙත්වාන, විචරී [විචරි (පී.)] පබ්බතෙ කපි;

සිලාය යොග්ගං කත්වාන, නිසභො එතදබ්‍රවි.

199. එහි මෙ පිට්ඨිමාරුය්හ, ගීවං ගණ්හාහි බාහුභි;

අහං තං උද්ධරිස්සාමි, ගිරිදුග්ගත වෙගසා.

200. තස්ස තං වචනං සුත්වා, වානරින්දස්ස සිරීමතො;

පිට්ඨිමාරුය්හ ධීරස්ස, ගීවං බාහාහි අග්ගහිං.

201. සො මං තතො සමුට්ඨාසි, තෙජස්සී [තෙජසී (ස්‍යා. පී. ක.)] බලවා කපි;

විහඤ්ඤමානො කිච්ඡෙන, ගිරිදුග්ගත වෙගසා.

202. උද්ධරිත්වාන මං සන්තො, නිසභො එතදබ්‍රවි;

ඉඞ්ඝ මං සම්ම රක්ඛස්සු, පස්සුපිස්සං මුහුත්තකං.

203. සීහා බ්‍යග්ඝා ච දීපී ච, අච්ඡකොකතරච්ඡයො;

තෙ මං පමත්තං හිංසෙය්‍යුං, තෙ ත්වං දිස්වා නිවාරය [දිස්වාන වාරය (පී.)].

204. එවං මෙ පරිත්තාතූන [පරිත්තාතුන (ක.)], පස්සුපි සො මුහුත්තකං;

තදාහං පාපිකං දිට්ඨිං, පටිලච්ඡිං අයොනිසො.

205. භක්ඛො අයං මනුස්සානං, යථා චඤ්ඤෙ වනෙ මිගා;

යං නූනිමං වධිත්වාන, ඡාතො ඛාදෙය්‍ය වානරං.

206. අසිතො [ආසිකො (පී.)] ච ගමිස්සාමි, මංසමාදාය සම්බලං;

කන්තාරං නිත්ථරිස්සාමි, පාථෙය්‍යං මෙ භවිස්සති.

207. තතො සිලං ගහෙත්වාන, මත්ථකං සන්නිතාළයිං;

මම ගත්ත [භත්ත (සී. ස්‍යා.), හත්ථ (පී.)] කිලන්තස්ස, පහාරො දුබ්බලො අහු.

208. සො ච වෙගෙනුදප්පත්තො, කපි රුහිර [රුධිර (සී.)] මක්ඛිතො;

අස්සුපුණ්ණෙහි නෙත්තෙහි, රොදන්තො මං උදික්ඛති.

209. මාය්‍යොමං කරි භද්දන්තෙ, ත්වඤ්ච නාමෙදිසං කරි;

ත්වඤ්ච ඛො නාම දීඝාවු [දීඝායු (පී.)], අඤ්ඤෙ [අඤ්ඤං (පී.)] වාරෙතුමරහසි.

210. අහො වත රෙ පුරිස, තාව දුක්කරකාරක;

එදිසා විසමා දුග්ගා, පපාතා උද්ධතො [උද්ධටො (පී.)] මයා.

211. ආනීතො පරලොකාව, දුබ්භෙය්‍යං මං අමඤ්ඤථ;

තං තෙන පාපධම්මෙන, පාපං පාපෙන චින්තිතං.

212. මා හෙව ත්වං අධම්මට්ඨ, වෙදනං කටුකං ඵුසි;

මා හෙව පාපකම්මං තං, ඵලං වෙළුංව තං වධි.

213. තයිමෙ නත්ථි විස්සාසො, පාපධම්ම අසඤ්ඤත [පාපධම්මං අමඤ්ඤථ (පී.)];

එහි මෙ පිට්ඨිතො ගච්ඡ, දිස්සමානොව සන්තිකෙ.

214. මුත්තොසි හත්ථා වාළානං, පත්තොසි මානුසිං පදං;

එස මග්ගො අධම්මට්ඨ, තෙන ගච්ඡ යථාසුඛං.

215. ඉදං වත්වා ගිරිචරො, රහදෙ [රුහිරං (ස්‍යා. ක.)] පක්ඛල්‍ය මත්ථකං;

අස්සූනි සම්පමජ්ජිත්වා, තතො පබ්බතමාරුහි.

216. සොහං තෙනාභිසත්තොස්මි, පරිළාහෙන අට්ටිතො;

ඩය්හමානෙන ගත්තෙන, වාරිං පාතුං උපාගමිං.

217. අග්ගිනා විය සන්තත්තො, රහදො රුහිරමක්ඛිතො;

පුබ්බලොහිතසඞ්කාසො, සබ්බො මෙ සමපජ්ජථ.

218. යාවන්තො උදබින්දූනි, කායස්මිං නිපතිංසු මෙ;

තාවන්තො ගණ්ඩ [ගණ්ඩූ (සී. පී.), ගණ්ඩු (ස්‍යා.)] ජායෙථ, අද්ධබෙලුවසාදිසා.

219. පභින්නා පග්ඝරිංසු මෙ, කුණපා පුබ්බලොහිතා;

යෙන යෙනෙව ගච්ඡාමි, ගාමෙසු නිගමෙසු ච.

220. දණ්ඩහත්ථා නිවාරෙන්ති, ඉත්ථියො පුරිසා ච මං;

ඔක්කිතා [ඔකිණ්ණා (සී.)] පූතිගන්ධෙන, මාස්සු ඔරෙන ආගමා [මාගමා (සී. පී.)].

221. එතාදිසං ඉදං දුක්ඛං, සත්ත වස්සානි දානි මෙ;

අනුභොමි සකං කම්මං, පුබ්බෙ දුක්කටමත්තනො.

222. තං වො වදාමි භද්දන්තෙ [භද්දං වො (සී. පී.)], යාවන්තෙත්ථ සමාගතා;

මාස්සු මිත්තාන [මිත්තානං (සී. පී.)] දුබ්භිත්ථො, මිත්තදුබ්භො හි පාපකො.

223. කුට්ඨී කිලාසී භවති, යො මිත්තානිධ දුබ්භති [යො මිත්තානං ඉධද්දුභි (සී. අට්ඨ.), යො මිත්තානං ඉධ දුබ්භති (පී.)];

කායස්ස භෙදා මිත්තද්දු [මිත්තදුබ්භී (ස්‍යා. ක.)], නිරයං සොපපජ්ජතීති [සො උපපජ්ජතීති (සී. ස්‍යා. පී.)].

මහාකපිජාතකං ඡට්ඨං.