515. සම්භවජාතකං (5)

138. රජ්ජඤ්ච පටිපන්නාස්ම, ආධිපච්චං සුචීරත;

මහත්තං පත්තුමිච්ඡාමි, විජෙතුං පථවිං ඉමං.

139. ධම්මෙන නො අධම්මෙන, අධම්මො මෙ න රුච්චති;

කිච්චොව ධම්මො චරිතො, රඤ්ඤො හොති සුචීරත.

140. ඉධ චෙවානින්දිතා යෙන, පෙච්ච යෙන අනින්දිතා;

යසං දෙවමනුස්සෙසු, යෙන පප්පොමු [පප්පෙමු (සී. අට්ඨ.)] බ්‍රාහ්මණ.

141. යොහං අත්ථඤ්ච ධම්මඤ්ච, කත්තුමිච්ඡාමි බ්‍රාහ්මණ;

තං ත්වං අත්ථඤ්ච ධම්මඤ්ච, බ්‍රාහ්මණක්ඛාහි පුච්ඡිතො.

142. නාඤ්ඤත්‍ර විධුරා රාජ, එතදක්ඛාතුමරහති;

යං ත්වං අත්ථඤ්ච ධම්මඤ්ච, කත්තුමිච්ඡසි ඛත්තිය.

143. එහි ඛො පහිතො ගච්ඡ, විධුරස්ස උපන්තිකං;

නික්ඛඤ්චිමං [නික්ඛං රත්ත (සී.), නික්ඛමිමං (පී.)] සුවණ්ණස්ස, හරං ගච්ඡ සුචීරත;

අභිහාරං ඉමං දජ්ජා, අත්ථධම්මානුසිට්ඨියා.

144. ස්වාධිප්පාගා භාරද්වාජො, විධුරස්ස උපන්තිකං;

තමද්දස මහාබ්‍රහ්මා, අසමානං සකෙ ඝරෙ.

145. රඤ්ඤොහං පහිතො දූතො, කොරබ්‍යස්ස යසස්සිනො;

‘‘අත්ථං ධම්මඤ්ච පුච්ඡෙසි’’, ඉච්චබ්‍රවි යුධිට්ඨිලො;

තං ත්වං අත්ථඤ්ච ධම්මඤ්ච, විධුරක්ඛාහි පුච්ඡිතො.

146. ගඞ්ගං මෙ පිදහිස්සන්ති, න තං සක්කොමි බ්‍රාහ්මණ;

අපිධෙතුං මහාසින්ධුං, තං කථං සො භවිස්සති.

147. න තෙ සක්කොමි අක්ඛාතුං, අත්ථං ධම්මඤ්ච පුච්ඡිතො;

භද්‍රකාරො ච මෙ පුත්තො, ඔරසො මම අත්‍රජො;

තං ත්වං අත්ථඤ්ච ධම්මඤ්ච, ගන්ත්වා පුච්ඡස්සු බ්‍රාහ්මණ.

148. ස්වාධිප්පාගා භාරද්වාජො, භද්‍රකාරස්සුපන්තිකං [භද්‍රකාරස්ස සන්තිකං (සී. ස්‍යා.)];

තමද්දස මහාබ්‍රහ්මා, නිසින්නං සම්හි වෙස්මනි.

149. රඤ්ඤොහං පහිතො දූතො, කොරබ්‍යස්ස යසස්සිනො;

‘‘අත්ථං ධම්මඤ්ච පුච්ඡෙසි’’, ඉච්චබ්‍රවි යුධිට්ඨිලො;

තං ත්වං අත්ථඤ්ච ධම්මඤ්ච, භද්‍රකාර පබ්‍රූහි [බ්‍රවීහි (සී. පී.)] මෙ.

150. මංසකාජං [මංසකාචං (පී.)] අවහාය, ගොධං අනුපතාමහං;

න තෙ සක්කොමි අක්ඛාතුං, අත්ථං ධම්මඤ්ච පුච්ඡිතො.

151. සඤ්චයො [සඤ්ජයො (සී. ස්‍යා. පී.)] නාම මෙ භාතා, කනිට්ඨො මෙ සුචීරත;

තං ත්වං අත්ථඤ්ච ධම්මඤ්ච, ගන්ත්වා පුච්ඡස්සු බ්‍රාහ්මණ.

152. ස්වාධිප්පාගා භාරද්වාජො, සඤ්චයස්ස උපන්තිකං;

තමද්දස මහාබ්‍රහ්මා, නිසින්නං සම්හි වෙස්මනි [පරිසති (ස්‍යා.), පරීසති (පී.)].

153. රඤ්ඤොහං පහිතො දූතො, කොරබ්‍යස්ස යසස්සිනො;

‘‘අත්ථං ධම්මඤ්ච පුච්ඡෙසි’’, ඉච්චබ්‍රවි යුධිට්ඨිලො;

තං ත්වං අත්ථඤ්ච ධම්මඤ්ච, සඤ්චයක්ඛාහි පුච්ඡිතො.

154. සදා මං ගිලතෙ [ගිලතී (සී.), ගිලති (පී.)] මච්චු, සායං පාතො සුචීරත;

න තෙ සක්කොමි අක්ඛාතුං, අත්ථං ධම්මඤ්ච පුච්ඡිතො.

155. සම්භවො නාම මෙ භාතා, කනිට්ඨො මෙ සුචීරත;

තං ත්වං අත්ථඤ්ච ධම්මඤ්ච, ගන්ත්වා පුච්ඡස්සු බ්‍රාහ්මණ.

156. අබ්භුතො වත භො ධම්මො, නායං අස්මාක රුච්චති;

තයො ජනා පිතාපුත්තා, තෙසු පඤ්ඤාය නො විදූ.

157. න තං සක්කොථ අක්ඛාතුං, අත්ථං ධම්මඤ්ච පුච්ඡිතා;

කථං නු දහරො ජඤ්ඤා, අත්ථං ධම්මඤ්ච පුච්ඡිතො.

158. මා නං දහරොති උඤ්ඤාසි [මඤ්ඤාසි (ස්‍යා. ක.)], අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

159. යථාපි චන්දො විමලො, ගච්ඡං ආකාසධාතුයා;

සබ්බෙ තාරාගණෙ ලොකෙ, ආභාය අතිරොචති.

160. එවම්පි දහරූපෙතො, පඤ්ඤායොගෙන සම්භවො;

මා නං දහරොති උඤ්ඤාසි, අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

161. යථාපි රම්මකො මාසො, ගිම්හානං හොති බ්‍රාහ්මණ;

අතෙවඤ්ඤෙහි මාසෙහි, දුමපුප්ඵෙහි සොභති.

162. එවම්පි දහරූපෙතො, පඤ්ඤායොගෙන සම්භවො;

මා නං දහරොති උඤ්ඤාසි, අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

163. යථාපි හිමවා බ්‍රහ්මෙ, පබ්බතො ගන්ධමාදනො;

නානාරුක්ඛෙහි සඤ්ඡන්නො, මහාභූතගණාලයො;

ඔසධෙහි ච දිබ්බෙහි, දිසා භාති පවාති ච.

164. එවම්පි දහරූපෙතො, පඤ්ඤායොගෙන සම්භවො;

මා නං දහරොති උඤ්ඤාසි, අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

165. යථාපි පාවකො බ්‍රහ්මෙ, අච්චිමාලී යසස්සිමා;

ජලමානො වනෙ ගච්ඡෙ [චරං කච්ඡෙ (පී.)], අනලො කණ්හවත්තනී.

166. ඝතාසනො ධූමකෙතු, උත්තමාහෙවනන්දහො;

නිසීථෙ [නිස්සීවෙ (ස්‍යා.), නිසිවෙ (ක.)] පබ්බතග්ගස්මිං, පහූතෙධො [බහුතෙජො (ස්‍යා. ක.)] විරොචති.

167. එවම්පි දහරූපෙතො, පඤ්ඤායොගෙන සම්භවො;

මා නං දහරොති උඤ්ඤාසි, අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

168. ජවෙන භද්‍රං ජානන්ති, බලිබද්දඤ්ච [බලිවද්දඤ්ච (සී. පී.)] වාහියෙ;

දොහෙන ධෙනුං ජානන්ති, භාසමානඤ්ච පණ්ඩිතං.

169. එවම්පි දහරූපෙතො, පඤ්ඤායොගෙන සම්භවො;

මා නං දහරොති උඤ්ඤාසි, අපුච්ඡිත්වාන සම්භවං;

පුච්ඡිත්වා සම්භවං ජඤ්ඤා, අත්ථං ධම්මඤ්ච බ්‍රාහ්මණ.

170. ස්වාධිප්පාගා භාරද්වාජො, සම්භවස්ස උපන්තිකං;

තමද්දස මහාබ්‍රහ්මා, කීළමානං බහීපුරෙ.

171. රඤ්ඤොහං පහිතො දූතො, කොරබ්‍යස්ස යසස්සිනො;

‘‘අත්ථං ධම්මඤ්ච පුච්ඡෙසි’’, ඉච්චබ්‍රවි යුධිට්ඨිලො;

තං ත්වං අත්ථඤ්ච ධම්මඤ්ච, සම්භවක්ඛාහි පුච්ඡිතො.

172. තග්ඝ තෙ අහමක්ඛිස්සං, යථාපි කුසලො තථා;

රාජා ච ඛො තං ජානාති, යදි කාහති වා න වා.

173. ‘‘අජ්ජ සුවෙ’’ති සංසෙය්‍ය, රඤ්ඤා පුට්ඨො සුචීරත;

මා කත්වා අවසී රාජා, අත්ථෙ ජාතෙ යුධිට්ඨිලො.

174. අජ්ඣත්තඤ්ඤෙව සංසෙය්‍ය, රඤ්ඤා පුට්ඨො සුචීරත;

කුම්මග්ගං න නිවෙසෙය්‍ය, යථා මූළ්හො අචෙතසො [අචෙතනො (ක.)].

175. අත්තානං නාතිවත්තෙය්‍ය, අධම්මං න සමාචරෙ;

අතිත්ථෙ නප්පතාරෙය්‍ය, අනත්ථෙ න යුතො සියා.

176. යො ච එතානි ඨානානි, කත්තුං ජානාති ඛත්තියො;

සදා සො වඩ්ඪතෙ රාජා, සුක්කපක්ඛෙව චන්දිමා.

177. ඤාතීනඤ්ච පියො හොති, මිත්තෙසු ච විරොචති;

කායස්ස භෙදා සප්පඤ්ඤො, සග්ගං සො උපපජ්ජතීති.

සම්භවජාතකං පඤ්චමං.