514. ඡද්දන්තජාතකං (4)

97. කිං නු සොචසිනුච්චඞ්ගි, පණ්ඩූසි වරවණ්ණිනි;

මිලායසි විසාලක්ඛි, මාලාව පරිමද්දිතා.

98. දොහළො මෙ මහාරාජ, සුපිනන්තෙනුපජ්ඣගා [නු’පච්චගා (සී. ස්‍යා. පී.)];

න සො සුලභරූපොව, යාදිසො මම දොහළො.

99. යෙ කෙචි මානුසා කාමා, ඉධ ලොකස්මි නන්දනෙ;

සබ්බෙ තෙ පචුරා මය්හං, අහං තෙ දම්මි දොහළං.

100. ලුද්දා දෙව සමායන්තු, යෙ කෙචි විජිතෙ තව;

එතෙසං අහමක්ඛිස්සං, යාදිසො මම දොහළො.

101. ඉමෙ තෙ ලුද්දකා දෙවි, කතහත්ථා විසාරදා;

වනඤ්ඤූ ච මිගඤ්ඤූ ච, මමත්ථෙ [මම තෙ (පී.)] චත්තජීවිතා.

102. ලුද්දපුත්තා නිසාමෙථ, යාවන්තෙත්ථ සමාගතා;

ඡබ්බිසාණං ගජං සෙතං, අද්දසං සුපිනෙ අහං;

තස්ස දන්තෙහි මෙ අත්ථො, අලාභෙ නත්ථි ජීවිතං.

103. න නො පිතූනං න පිතාමහානං, දිට්ඨො සුතො කුඤ්ජරො ඡබ්බිසාණො;

යමද්දසා සුපිනෙ රාජපුත්තී, අක්ඛාහි නො යාදිසො හත්ථිනාගො.

104. දිසා චතස්සො විදිසා චතස්සො, උද්ධං අධො දස දිසා ඉමායො;

කතමං දිසං තිට්ඨති නාගරාජා, යමද්දසා සුපිනෙ ඡබ්බිසාණං.

105. ඉතො උජුං උත්තරියං දිසායං, අතික්කම්ම සො සත්තගිරී බ්‍රහන්තෙ;

සුවණ්ණපස්සො නාම ගිරී උළාරො, සුපුප්ඵිතො [සම්පුප්ඵිතො (ස්‍යා.)] කිම්පුරිසානුචිණ්ණො.

106. ආරුය්හ සෙලං භවනං කින්නරානං, ඔලොකය පබ්බතපාදමූලං;

අථ දක්ඛසී මෙඝසමානවණ්ණං, නිග්‍රොධරාජං අථ සහස්සපාදං [පොරං (ක.)].

107. තත්ථච්ඡතී කුඤ්ජරො ඡබ්බිසාණො, සබ්බසෙතො දුප්පසහො පරෙභි;

රක්ඛන්ති නං අට්ඨසහස්සනාගා, ඊසාදන්තා වාතජවප්පහාරිනො.

108. තිට්ඨන්ති තෙ තුමූලං [තුමූල (ස්‍යා.), භිමූල (පී. ක.)] පස්සසන්තා, කුප්පන්ති වාතස්සපි එරිතස්ස;

මනුස්සභූතං පන තත්ථ දිස්වා, භස්මං කරෙය්‍යුං නාස්ස රජොපි තස්ස.

109. බහූ හිමෙ රාජකුලම්හි සන්ති, පිළන්ධනා ජාතරූපස්ස දෙවී;

මුත්තාමණීවෙළුරියාමයා ච, කිං කාහසි දන්තපිළන්ධනෙන;

මාරෙතුකාමා කුඤ්ජරං ඡබ්බිසාණං, උදාහු ඝාතෙස්සසි ලුද්දපුත්තෙ.

110. සා ඉස්සිතා දුක්ඛිතා චස්මි ලුද්ද, උද්ධඤ්ච සුස්සාමි අනුස්සරන්තී;

කරොහි මෙ ලුද්දක එතමත්ථං, දස්සාමි තෙ ගාමවරානි පඤ්ච.

111. කත්ථච්ඡතී කත්ථමුපෙති ඨානං, වීථිස්ස කා න්හාන [නහාන (සී. පී.)] ගතස්ස හොති;

කථඤ්හි සො න්හායති [නහායති (සී. පී.)] නාගරාජා, කථං විජානෙමු ගතිං ගජස්ස.

112. තත්ථෙව සා පොක්ඛරණී අදූරෙ [අවිදූරෙ (ස්‍යා. ක.)], රම්මා සුතිත්ථා ච මහොදිකා [මහොදකා (ස්‍යා. ක.)] ච;

සම්පුප්ඵිතා භමරගණානුචිණ්ණා [කිණ්ණා (කත්ථචි)], එත්ථ හි සො න්හායති නාගරාජා.

113. සීසං නහාතුප්පල [නහාතො උප්පල (සී. ස්‍යා. පී.)] මාලභාරී, සබ්බසෙතො පුණ්ඩරීකත්තචඞ්ගී;

ආමොදමානො ගච්ඡති සන්නිකෙතං, පුරක්ඛත්වා මහෙසිං සබ්බභද්දං.

114. තත්ථෙව සො උග්ගහෙත්වාන වාක්‍යං, ආදාය තූණිඤ්ච ධනුඤ්ච ලුද්දො;

විතුරියති [විතුරිය සො (සී. අට්ඨ.)] සත්තගිරී බ්‍රහන්තෙ, සුවණ්ණපස්සං නාම ගිරිං උළාරං.

115. ආරුය්හ සෙලං භවනං කින්නරානං, ඔලොකයී පබ්බතපාදමූලං;

තත්ථද්දසා මෙඝසමානවණ්ණං, නිග්‍රොධරාජං අට්ඨසහස්සපාදං.

116. තත්ථද්දසා කුඤ්ජරං ඡබ්බිසාණං, සබ්බසෙතං දුප්පසහං පරෙභි;

රක්ඛන්ති නං අට්ඨසහස්සනාගා, ඊසාදන්තා වාතජවප්පහාරිනො.

117. තත්ථද්දසා පොක්ඛරණිං අදූරෙ, රම්මං සුතිත්ථඤ්ච මහොදිකඤ්ච;

සම්පුප්ඵිතං භමරගණානුචිණ්ණං, යත්ථ හි සො න්හායති නාගරාජා.

118. දිස්වාන නාගස්ස ගතිං ඨිතිඤ්ච, වීථිස්ස යා න්හානගතස්ස හොති;

ඔපාතමාගච්ඡි අනරියරූපො, පයොජිතො චිත්තවසානුගාය.

119. ඛණිත්වාන කාසුං ඵලකෙහි ඡාදයි, අත්තානමොධාය ධනුඤ්ච ලුද්දො;

පස්සාගතං පුථුසල්ලෙන නාගං, සමප්පයී දුක්කටකම්මකාරී.

120. විද්ධො ච නාගො කොඤ්චමනාදි ඝොරං, සබ්බෙ ච [සබ්බෙව (සී. ස්‍යා. පී.)] නාගා නින්නදුං [නින්නාදු (ස්‍යා.), නින්නාදං (ක.)] ඝොරරූපං;

තිණඤ්ච කට්ඨඤ්ච රණං [චුණ්ණං (ක. සී. පී.)] කරොන්තා, ධාවිංසු තෙ අට්ඨදිසා සමන්තතො.

121. වධිස්සමෙතන්ති [වධිස්සමෙනන්ති (ස්‍යා.)] පරාමසන්තො, කාසාවමද්දක්ඛි ධජං ඉසීනං;

දුක්ඛෙන ඵුට්ඨස්සුදපාදි සඤ්ඤා, අරහද්ධජො සබ්භි අවජ්ඣරූපො.

122. අනික්කසාවො කාසාවං, යො වත්ථං පරිදහිස්සති [පරිදහෙස්සති (සී. පී.), පරිධස්සති (කත්ථචි)];

අපෙතො දමසච්චෙන, න සො කාසාවමරහති.

123. යො ච වන්තකසාවස්ස, සීලෙසු සුසමාහිතො;

උපෙතො දමසච්චෙන, ස වෙ කාසාවමරහති.

124. සමප්පිතො පුථුසල්ලෙන නාගො, අදුට්ඨචිත්තො ලුද්දකමජ්ඣභාසි;

කිමත්ථයං කිස්ස වා සම්ම හෙතු, මමං වධී කස්ස වායං පයොගො.

125. කාසිස්ස රඤ්ඤො මහෙසී භදන්තෙ, සා පූජිතා රාජකුලෙ සුභද්දා;

තං අද්දසා සා ච මමං අසංසි, දන්තෙහි අත්ථොති ච මං [අත්ථොති මමං (ස්‍යා. ක.)] අවොච.

126. බහූ හි මෙ දන්තයුගා උළාරා, යෙ මෙ පිතූනඤ්ච [පිතුන්නම්පි (පී.)] පිතාමහානං;

ජානාති සා කොධනා රාජපුත්තී, වධත්ථිකා වෙරමකාසි බාලා.

127. උට්ඨෙහි ත්වං ලුද්ද ඛරං ගහෙත්වා, දන්තෙ ඉමෙ ඡින්ද පුරා මරාමි;

වජ්ජාසි තං කොධනං රාජපුත්තිං, ‘‘නාගො හතො හන්ද ඉමස්ස දන්තා’’.

128. උට්ඨාය සො ලුද්දො ඛරං ගහෙත්වා, ඡෙත්වාන දන්තානි ගජුත්තමස්ස;

වග්ගූ සුභෙ අප්පටිමෙ පථබ්‍යා, ආදාය පක්කාමි තතො හි ඛිප්පං.

129. භයට්ටිතා [භයද්දිතා (සී. පී.)] නාගවධෙන අට්ටා, යෙ තෙ නාගා අට්ඨ දිසා විධාවුං;

අදිස්වාන [අදිස්ව (සී. පී.)] පොසං ගජපච්චමිත්තං, පච්චාගමුං යෙන සො නාගරාජා.

130. තෙ තත්ථ කන්දිත්වා රොදිත්වාන [රොදිත්ව (සී. පී.)] නාගා, සීසෙ සකෙ පංසුකං ඔකිරිත්වා;

අගමංසු තෙ සබ්බෙ සකං නිකෙතං, පුරක්ඛත්වා මහෙසිං සබ්බභද්දං.

131. ආදාය දන්තානි ගජුත්තමස්ස, වග්ගූ සුභෙ අප්පටිමෙ පථබ්‍යා;

සුවණ්ණරාජීහි සමන්තමොදරෙ, සො ලුද්දකො කාසිපුරං උපාගමි;

උපනෙසි සො රාජකඤ්ඤාය දන්තෙ, නාගො හතො හන්ද ඉමස්ස දන්තා.

132. දිස්වාන දන්තානි ගජුත්තමස්ස, භත්තුප්පියස්ස පුරිමාය ජාතියා;

තත්ථෙව තස්සා හදයං අඵාලි, තෙනෙව සා කාලමකාසි බාලා.

133. සම්බොධිපත්තො ස [ච (සී. ස්‍යා.), ව (පී.)] මහානුභාවො, සිතං අකාසි පරිසාය මජ්ඣෙ;

පුච්ඡිංසු භික්ඛූ සුවිමුත්තචිත්තා, නාකාරණෙ පාතුකරොන්ති බුද්ධා.

134. යමද්දසාථ දහරිං කුමාරිං, කාසායවත්ථං අනගාරියං චරන්තිං;

සා ඛො තදා රාජකඤ්ඤා අහොසි, අහං තදා නාගරාජා අහොසිං.

135. ආදාය දන්තානි ගජුත්තමස්ස, වග්ගූ සුභෙ අප්පටිමෙ පථබ්‍යා;

යො ලුද්දකො කාසිපුරං උපාගමි, සො ඛො තදා දෙවදත්තො අහොසි.

136. අනාවසූරං චිරරත්තසංසිතං, උච්චාවචං [උචං නීචං (සී. ස්‍යා. පී.)] චරිතමිදං පුරාණං;

වීතද්දරො වීතසොකො විසල්ලො, සයං අභිඤ්ඤාය අභාසි බුද්ධො.

137. අහං වො තෙන කාලෙන, අහොසිං තත්ථ භික්ඛවො;

නාගරාජා තදා හොමි [හොසිං (සී. ස්‍යා. පී.)], එවං ධාරෙථ ජාතකන්ති.

ඡද්දන්තජාතකං චතුත්ථං.