513. ජයද්දිසජාතකං (3)

64. චිරස්සං වත මෙ උදපාදි අජ්ජ, භක්ඛො මහා සත්තමිභත්තකාලෙ;

කුතොසි කො වාසි තදිඞ්ඝ බ්‍රූහි, ආචික්ඛ ජාතිං විදිතො යථාසි.

65. පඤ්චාලරාජා මිගවං පවිට්ඨො, ජයද්දිසො නාම යදිස්සුතො තෙ;

චරාමි කච්ඡානි වනානි චාහං, පසදං ඉමං ඛාද මමජ්ජ මුඤ්ච.

66. සෙනෙව ත්වං පණසි සස්සමානො [සය්හමානො (ස්‍යා. ක.)], මමෙස භක්ඛො පසදො යං වදෙසි;

තං ඛාදියාන පසදං ජිඝඤ්ඤං [ජිඝච්ඡං (?)], ඛාදිස්සං පච්ඡා න විලාපකාලො.

67. න චත්ථි මොක්ඛො මම නික්කයෙන [වික්කයෙන (සී.)], ගන්ත්වාන පච්චාගමනාය පණ්හෙ;

තං සඞ්කරං [සඞ්ගරං (සී. ස්‍යා. පී.)] බ්‍රාහ්මණස්සප්පදාය, සච්චානුරක්ඛී පුනරාවජිස්සං.

68. කිං කම්මජාතං අනුතප්පතෙ ත්වං [අනුතප්පතී තං (සී. පී.)], පත්තං සමීපං මරණස්ස රාජ;

ආචික්ඛ මෙ තං අපි සක්කුණෙමු, අනුජානිතුං ආගමනාය පණ්හෙ.

69. කතා මයා බ්‍රාහ්මණස්ස ධනාසා, තං සඞ්කරං පටිමුක්කං න මුත්තං;

තං සඞ්කරං බ්‍රාහ්මණස්සප්පදාය, සච්චානුරක්ඛී පුනරාවජිස්සං.

70. යා තෙ කතා බ්‍රාහ්මණස්ස ධනාසා, තං සඞ්කරං පටිමුක්කං න මුත්තං;

තං සඞ්කරං බ්‍රාහ්මණස්සප්පදාය, සච්චානුරක්ඛී පුනරාවජස්සු.

71. මුත්තො ච සො පොරිසාදස්ස [පුරිසාදස්ස (පී.)] හත්ථා, ගන්ත්වා සකං මන්දිරං කාමකාමී;

තං සඞ්කරං බ්‍රාහ්මණස්සප්පදාය, ආමන්තයී පුත්තමලීනසත්තං [සත්තුං (ස්‍යා. පී. ක.)].

72. අජ්ජෙව රජ්ජං අභිසිඤ්චයස්සු, ධම්මං චර සෙසු පරෙසු චාපි;

අධම්මකාරො ච තෙ මාහු රට්ඨෙ, ගච්ඡාමහං පොරිසාදස්ස ඤත්තෙ [ඤන්තෙ (ස්‍යා.)].

73. කිං කම්ම කුබ්බං තව දෙව පාව [දෙවපාදෙ (සී. ස්‍යා. පී.)], නාරාධයී තං තදිච්ඡාමි සොතුං;

යමජ්ජ රජ්ජම්හි උදස්සයෙ තුවං, රජ්ජම්පි නිච්ඡෙය්‍යං තයා විනාහං.

74. න කම්මුනා වා වචසා ව තාත, අපරාධිතොහං තුවියං සරාමි;

සන්ධිඤ්ච [සද්ධිං ච (ක.)] කත්වා පුරිසාදකෙන, සච්චානුරක්ඛී පුනාහං ගමිස්සං.

75. අහං ගමිස්සාමි ඉධෙව හොහි, නත්ථි තතො ජීවතො විප්පමොක්ඛො;

සචෙ තුවං ගච්ඡසියෙව රාජ, අහම්පි ගච්ඡාමි උභො න හොම.

76. අද්ධා හි තාත සතානෙස ධම්මො, මරණා ච මෙ දුක්ඛතරං තදස්ස;

කම්මාසපාදො තං යදා පචිත්වා, පසය්හ ඛාදෙ භිදා රුක්ඛසූලෙ.

77. පාණෙන තෙ පාණමහං නිමිස්සං, මා ත්වං අගා පොරිසාදස්ස ඤත්තෙ;

එතඤ්ච තෙ පාණමහං නිමිස්සං, තස්මා මතං ජීවිතස්ස වණ්ණෙමි [වරෙමි (සී.)].

78. තතො හවෙ ධිතිමා රාජපුත්තො, වන්දිත්වා මාතු ච පිතු ච [වන්දිත්ථ මාතුච්ච පිතුච්ච (සී. පී.)] පාදෙ;

දුඛිනිස්ස මාතා නිපතා [නිපතී (සී. පී.)] පථබ්‍යා, පිතාස්ස පග්ගය්හ භුජානි කන්දති.

79. තං ගච්ඡන්තං තාව පිතා විදිත්වා, පරම්මුඛො වන්දති පඤ්ජලීකො;

සොමො ච රාජා වරුණො ච රාජා, පජාපතී චන්දිමා සූරියො ච;

එතෙහි ගුත්තො පුරිසාදකම්හා, අනුඤ්ඤාතො සොත්ථි පච්චෙහි තාත.

80. යං දණ්ඩකිරඤ්ඤො ගතස්ස [යං දණ්ඩකාරඤ්ඤගතස්ස (පී.)] මාතා, රාමස්සකාසි සොත්ථානං සුගුත්තා;

තං තෙ අහං සොත්ථානං කරොමි, එතෙන සච්චෙන සරන්තු දෙවා;

අනුඤ්ඤාතො සොත්ථි පච්චෙහි පුත්ත.

81. ආවී රහො වාපී මනොපදොසං, නාහං සරෙ ජාතු මලීනසත්තෙ;

එතෙන සච්චෙන සරන්තු දෙවා, අනුඤ්ඤාතො සොත්ථි පච්චෙහි භාතික [භාත (සී.), භාතා (ස්‍යා. පී.)].

82. යස්මා ච මෙ අනධිමනොසි සාමි, න චාපි මෙ මනසා අප්පියොසි;

එතෙන සච්චෙන සරන්තු දෙවා, අනුඤ්ඤාතො සොත්ථි පච්චෙහි සාමි.

83. බ්‍රහා උජූ චාරුමුඛො කුතොසි, න මං පජානාසි වනෙ වසන්තං;

ලුද්දං මං ඤත්වා ‘‘පුරිසාදකො’’ති, කො සොත්ථි මාජානමිධා’වජෙය්‍ය.

84. ජානාමි ලුද්ද පුරිසාදකො ත්වං, න තං න ජානාමි වනෙ වසන්තං;

අහඤ්ච පුත්තොස්මි ජයද්දිසස්ස, මමජ්ජ ඛාද පිතුනො පමොක්ඛා.

85. ජානාමි පුත්තොති [පුත්තොසි (ස්‍යා. ක.)] ජයද්දිසස්ස, තථා හි වො මුඛවණ්ණො උභින්නං;

සුදුක්කරඤ්ඤෙව [සුදුක්කරඤ්චෙව (ස්‍යා. පී. ක.)] කතං තවෙදං, යො මත්තුමිච්ඡෙ පිතුනො පමොක්ඛා.

86. න දුක්කරං කිඤ්චි මහෙත්ථ මඤ්ඤෙ, යො මත්තුමිච්ඡෙ පිතුනො පමොක්ඛා;

මාතු ච [මාතුච්ච (සී.)] හෙතු පරලොක ගන්ත්වා [ගම්‍යා (සී. ස්‍යා.), ගම්‍ය (පී.)], සුඛෙන සග්ගෙන ච සම්පයුත්තො.

87. අහඤ්ච ඛො අත්තනො පාපකිරියං, ආවී රහො වාපි සරෙ න ජාතු;

සඞ්ඛාතජාතීමරණොහමස්මි, යථෙව මෙ ඉධ තථා පරත්ථ.

88. ඛාදජ්ජ මං දානි මහානුභාව, කරස්සු කිච්චානි ඉමං සරීරං;

රුක්ඛස්ස වා තෙ පපතාමි අග්ගා, ඡාදයමානො මය්හං ත්වමදෙසි මංසං.

89. ඉදඤ්ච තෙ රුච්චති රාජපුත්ත, චජෙසි [චජාසි (සී. පී.)] පාණං පිතුනො පමොක්ඛා;

තස්මා හි සො [තස්මාතිහ (සී. ස්‍යා.)] ත්වං තරමානරූපො, සම්භඤ්ජ කට්ඨානි ජලෙහි අග්ගිං.

90. තතො හවෙ ධිතිමා රාජපුත්තො, දාරුං සමාහත්වා මහන්තමග්ගිං;

සන්දීපයිත්වා පටිවෙදයිත්ථ, ආදීපිතො දානි මහායමග්ගි [මයා යක්ඛමග්ගි (ක.)].

91. ඛාදජ්ජ මං දානි පසය්හකාරී, කිං මං මුහුං පෙක්ඛසි හට්ඨලොමො;

තථා තථා තුය්හමහං කරොමි, යථා යථා මං ඡාදයමානො අදෙසි.

92. කො තාදිසං අරහති ඛාදිතායෙ, ධම්මෙ ඨිතං සච්චවාදිං වදඤ්ඤුං;

මුද්ධාපි තස්ස විඵලෙය්‍ය සත්තධා, යො තාදිසං සච්චවාදිං අදෙය්‍ය.

93. ඉදඤ්හි සො බ්‍රාහ්මණං මඤ්ඤමානො, සසො අවාසෙසි සකෙ සරීරෙ;

තෙනෙව සො චන්දිමා දෙවපුත්තො, සසත්ථුතො [සසට්ඨකො (ස්‍යා.)] කාමදුහජ්ජ [කාමරුහජ්ජ (ක.)] යක්ඛ.

94. චන්දො යථා රාහුමුඛා පමුත්තො, විරොචතෙ පන්නරසෙව භාණුමා [භානුමා (සී. පී.)];

එවං තුවං පොරිසාදා පමුත්තො, විරොච කපිලෙ [කම්පිල්ල (සී. පී.), කපිල්ලෙ (ස්‍යා.)] මහානුභාව;

ආමොදයං පිතරං මාතරඤ්ච, සබ්බො ච තෙ නන්දතු ඤාතිපක්ඛො.

95. තතො හවෙ ධිතිමා රාජපුත්තො, කතඤ්ජලී පරියාය [පරියගා (සී.), පග්ගය්හ (ස්‍යා. පී.)] පොරිසාදං;

අනුඤ්ඤාතො සොත්ථි සුඛී අරොගො, පච්චාගමා [පච්චාග (පී.)] කපිලමලීනසත්තා [කම්පිල්ල’මලීනසත්තො (සී. පී.), කපිල’මලීනසත්තා (ක.)].

96. තං නෙගමා ජානපදා ච සබ්බෙ, හත්ථාරොහා රථිකා පත්තිකා ච;

නමස්සමානා පඤ්ජලිකා උපාගමුං, නමත්ථු තෙ දුක්කරකාරකොසීති.

ජයද්දිසජාතකං [ජයදිසජාතකං (ක.)] තතියං.