469. මහාකණ්හජාතකං (6)

61. කණ්හො කණ්හො ච ඝොරො ච, සුක්කදාඨො පභාසවා [පතාපවා (සී. ස්‍යා. පී.)];

බද්ධො පඤ්චහි රජ්ජූහි, කිං රවි [ධීර (සී. පී.), වීර (ස්‍යා.)] සුනඛො තව.

62. නායං මිගානමත්ථාය, උසීනක [උසීනර (සී. පී.), උසීන්නර (ස්‍යා.)] භවිස්සති;

මනුස්සානං අනයො හුත්වා, තදා කණ්හො පමොක්ඛති.

63. පත්තහත්ථා සමණකා, මුණ්ඩා සඞ්ඝාටිපාරුතා;

නඞ්ගලෙහි කසිස්සන්ති, තදා කණ්හො පමොක්ඛති.

64. තපස්සිනියො [තපනීයා (ක.) දුතියන්තපදානි හෙතානි] පබ්බජිතා, මුණ්ඩා සඞ්ඝාටිපාරුතා;

යදා ලොකෙ ගමිස්සන්ති, තදා කණ්හො පමොක්ඛති.

65. දීඝොත්තරොට්ඨා ජටිලා, පඞ්කදන්තා රජස්සිරා;

ඉණං චොදාය [වොදාය (සී. පී.), චොදය (ස්‍යා.)] ගච්ඡන්ති, තදා කණ්හො පමොක්ඛති.

66. අධිච්ච වෙදෙ [වෙදං (ක.)] සාවිත්තිං, යඤ්ඤතන්තඤ්ච [තන්ත්‍රඤ්ච (සී. ස්‍යා. පී.)] බ්‍රාහ්මණා;

භතිකාය යජිස්සන්ති, තදා කණ්හො පමොක්ඛති.

67. මාතරං පිතරඤ්චාපි, ජිණ්ණකං ගතයොබ්බනං;

පහූ සන්තො [සන්තා (සී.)] න භරන්ති, තදා කණ්හො පමොක්ඛති.

68. මාතරං පිතරඤ්චාපි, ජිණ්ණකං ගතයොබ්බනං;

බාලා තුම්හෙති වක්ඛන්ති, තදා කණ්හො පමොක්ඛති.

69. ආචරියභරියං සඛිං [ආචරියභරියං සඛාභරියං (සී. පී.)], මාතුලානිං පිතුච්ඡකිං [පිතුච්ඡයං (සී.), පිතුච්ඡසං (පී.)];

යදා ලොකෙ ගමිස්සන්ති, තදා කණ්හො පමොක්ඛති.

70. අසිචම්මං ගහෙත්වාන, ඛග්ගං පග්ගය්හ බ්‍රාහ්මණා;

පන්ථඝාතං කරිස්සන්ති, තදා කණ්හො පමොක්ඛති.

71. සුක්කච්ඡවී වෙධවෙරා, ථූලබාහූ අපාතුභා;

මිත්තභෙදං කරිස්සන්ති, තදා කණ්හො පමොක්ඛති.

72. මායාවිනො නෙකතිකා, අසප්පුරිසචින්තකා;

යදා ලොකෙ භවිස්සන්ති, තදා කණ්හො පමොක්ඛතීති.

මහාකණ්හජාතකං ඡට්ඨං.