470. කොසියජාතකං (7)

73. නෙව කිණාමි නපි වික්කිණාමි, න චාපි මෙ සන්නිචයො ච අත්ථි [ඉධත්ථි (ස්‍යා.)];

සුකිච්ඡරූපං වතිදං පරිත්තං, පත්ථොදනො නාලමයං දුවින්නං.

74. අප්පම්හා අප්පකං දජ්ජා, අනුමජ්ඣතො මජ්ඣකං;

බහුම්හා බහුකං දජ්ජා, අදානං නුපපජ්ජති [න උපපජ්ජති (සී. පී.), නූපපජ්ජති (ස්‍යා.)].

75. තං තං වදාමි කොසිය, දෙහි දානානි භුඤ්ජ ච.

අරියමග්ගං සමාරූහ [අරියං මග්ගං සමාරුහ (සී. පී.)], නෙකාසී ලභතෙ සුඛං.

76. මොඝඤ්චස්ස හුතං හොති, මොඝඤ්චාපි සමීහිතං;

අතිථිස්මිං යො නිසින්නස්මිං, එකො භුඤ්ජති භොජනං.

77. තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං.

78. සච්චඤ්චස්ස හුතං හොති, සච්චඤ්චාපි සමීහිතං;

අතිථිස්මිං යො නිසින්නස්මිං, නෙකො භුඤ්ජති භොජනං.

79. තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං.

80. සරඤ්ච ජුහති පොසො, බහුකාය ගයාය ච;

දොණෙ තිම්බරුතිත්ථස්මිං, සීඝසොතෙ මහාවහෙ.

81. අත්‍ර චස්ස හුතං හොති, අත්‍ර චස්ස සමීහිතං;

අතිථිස්මිං යො නිසින්නස්මිං, නෙකො භුඤ්ජති භොජනං.

82. තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං.

83. බළිසඤ්හි සො නිගිලති [නිග්ගිලති (සී. පී.)], දීඝසුත්තං සබන්ධනං;

අතිථිස්මිං යො නිසින්නස්මිං, එකො භුඤ්ජති භොජනං.

84. තං තං වදාමි කොසිය, දෙහි දානානි භුඤ්ජ ච;

අරියමග්ගං සමාරූහ, නෙකාසී ලභතෙ සුඛං.

85. උළාරවණ්ණා වත බ්‍රාහ්මණා ඉමෙ, අයඤ්ච වො සුනඛො කිස්ස හෙතු;

උච්චාවචං වණ්ණනිභං විකුබ්බති, අක්ඛාථ නො බ්‍රාහ්මණා කෙ නු තුම්හෙ.

86. චන්දො ච සුරියො ච [සූරියො ච (ක.)] උභො ඉධාගතා, අයං පන මාතලි දෙවසාරථි;

සක්කොහමස්මි තිදසානමින්දො, එසො ච ඛො පඤ්චසිඛොති වුච්චති.

87. පාණිස්සරා මුදිඞ්ගා ච [මුතිඞ්ගා ච (සී. ස්‍යා. පී.], මුරජාලම්බරානි ච;

සුත්තමෙනං පබොධෙන්ති, පටිබුද්ධො ච නන්දති.

88. යෙ කෙචිමෙ මච්ඡරිනො කදරියා, පරිභාසකා සමණබ්‍රාහ්මණානං;

ඉධෙව නික්ඛිප්ප සරීරදෙහං, කායස්ස භෙදා නිරයං වජන්ති.

89. යෙ කෙචිමෙ සුග්ගතිමාසමානා [සුග්ගතිමාසසානා (සී. පී.), සුග්ගතාසිසමානා (ක.)], ධම්මෙ ඨිතා සංයමෙ සංවිභාගෙ;

ඉධෙව නික්ඛිප්ප සරීරදෙහං, කායස්ස භෙදා සුගතිං වජන්ති.

90. ත්වං නොසි ඤාති පුරිමාසු ජාතිසු, සො මච්ඡරී රොසකො [කොසියො (ස්‍යා. ක.)] පාපධම්මො;

තවෙව අත්ථාය ඉධාගතම්හා, මා පාපධම්මො නිරයං ගමිත්ථ [අප්පත්ථ (ක. සී. ස්‍යා. පී.)].

91. අද්ධා හි මං වො හිතකාමා, යං මං සමනුසාසථ;

සොහං තථා කරිස්සාමි, සබ්බං වුත්තං හිතෙසිභි.

92. එසාහමජ්ජෙව උපාරමාමි, න චාපිහං [න චාපහං (සී. පී.)] කිඤ්චි කරෙය්‍ය පාපං;

න චාපි මෙ කිඤ්චි අදෙය්‍යමත්ථි, න චාපිදත්වා උදකං පිවාමි [උදකම්පහං පිබෙ (සී.)].

93. එවඤ්ච මෙ දදතො සබ්බකාලං [කාලෙ (ක.)], භොගා ඉමෙ වාසව ඛීයිස්සන්ති;

තතො අහං පබ්බජිස්සාමි සක්ක, හිත්වාන කාමානි යථොධිකානීති.

කොසියජාතකං සත්තමං.