453. මහාමඞ්ගලජාතකං (15)

155. කිංසු නරො ජප්පමධිච්චකාලෙ, කං වා විජ්ජං කතමං වා සුතානං;

සො මච්චො අස්මිඤ්ච [අස්මිංව (පී.)] පරම්හි ලොකෙ, කථං කරො සොත්ථානෙන ගුත්තො.

156. යස්ස දෙවා පිතරො ච සබ්බෙ, සරීසපා [සිරිංසපා (සී. ස්‍යා. පී.)] සබ්බභූතානි චාපි;

මෙත්තාය නිච්චං අපචිතානි හොන්ති, භූතෙසු වෙ සොත්ථානං තදාහු.

157. යො සබ්බලොකස්ස නිවාතවුත්ති, ඉත්ථීපුමානං සහදාරකානං;

ඛන්තා දුරුත්තානමප්පටිකූලවාදී, අධිවාසනං සොත්ථානං තදාහු.

158. යො නාවජානාති සහායමිත්තෙ [සහායමත්තෙ (සී. පී.)], සිප්පෙන කුල්‍යාහි ධනෙන ජච්චා;

රුචිපඤ්ඤො අත්ථකාලෙ මතීමා [මුතීමා (සී. පී.)], සහායෙසු වෙ සොත්ථානං තදාහු.

159. මිත්තානි වෙ යස්ස භවන්ති සන්තො, සංවිස්සත්ථා අවිසංවාදකස්ස;

න මිත්තදුබ්භී සංවිභාගී ධනෙන, මිත්තෙසු වෙ සොත්ථානං තදාහු.

160. යස්ස භරියා තුල්‍යවයා සමග්ගා, අනුබ්බතා ධම්මකාමා පජාතා [සජාතා (ක.)];

කොලිනියා සීලවතී පතිබ්බතා, දාරෙසු වෙ සොත්ථානං තදාහු.

161. යස්ස රාජා භූතපති [භූතපතී (සී. ස්‍යා. පී.)] යසස්සී, ජානාති සොචෙය්‍යං පරක්කමඤ්ච;

අද්වෙජ්ඣතා සුහදයං මමන්ති, රාජූසු වෙ සොත්ථානං තදාහු.

162. අන්නඤ්ච පානඤ්ච දදාති සද්ධො, මාලඤ්ච ගන්ධඤ්ච විලෙපනඤ්ච;

පසන්නචිත්තො අනුමොදමානො, සග්ගෙසු වෙ සොත්ථානං තදාහු.

163. යමරියධම්මෙන පුනන්ති වුද්ධා, ආරාධිතා සමචරියාය සන්තො;

බහුස්සුතා ඉසයො සීලවන්තො, අරහන්තමජ්ඣෙ සොත්ථානං තදාහු.

164. එතානි ඛො සොත්ථානානි ලොකෙ, විඤ්ඤුප්පසත්ථානි සුඛුද්‍රයානි [සුඛින්ද්‍රියානි (පී.)];

තානීධ සෙවෙථ නරො සපඤ්ඤො, න හි මඞ්ගලෙ කිඤ්චනමත්ථි සච්චන්ති.

මහාමඞ්ගලජාතකං පන්නරසමං.