454. ඝටපණ්ඩිතජාතකං (16)

165. උට්ඨෙහි කණ්හ කිං සෙසි, කො අත්ථො සුපනෙන තෙ;

යොපි තුය්හං [තායං (පී.)] සකො භාතා, හදයං චක්ඛු ච [චක්ඛුංව (පී.)] දක්ඛිණං;

තස්ස වාතා බලීයන්ති, ඝටො ජප්පති [සසං ජප්පති (?)] කෙසව.

166. තස්ස තං වචනං සුත්වා, රොහිණෙය්‍යස්ස කෙසවො;

තරමානරූපො වුට්ඨාසි, භාතුසොකෙන අට්ටිතො.

167. කිං නු උම්මත්තරූපොව, කෙවලං ද්වාරකං ඉමං;

සසො සසොති ලපසි, කො නු තෙ සසමාහරි.

168. සොවණ්ණමයං මණීමයං, ලොහමයං අථ රූපියාමයං;

සඞ්ඛසිලාපවාළමයං, කාරයිස්සාමි තෙ සසං.

169. සන්ති අඤ්ඤෙපි සසකා, අරඤ්ඤෙ වනගොචරා;

තෙපි තෙ ආනයිස්සාමි, කීදිසං සසමිච්ඡසි.

170. න චාහමෙතෙ [න චාහමෙතං (සී.), න වාහමෙතෙ (ස්‍යා.), න වාහමෙතං (පී.)] ඉච්ඡාමි, යෙ සසා පථවිස්සිතා [පඨවිංසිතා (සී. ස්‍යා. පී.)];

චන්දතො සසමිච්ඡාමි, තං මෙ ඔහර කෙසව.

171. සො නූන මධුරං ඤාති, ජීවිතං විජහිස්සසි;

අපත්ථියං යො පත්ථයසි, චන්දතො සසමිච්ඡසි.

172. එවං චෙ කණ්හ ජානාසි, යදඤ්ඤමනුසාසසි;

කස්මා පුරෙ මතං පුත්තං, අජ්ජාපි මනුසොචසි.

173. යං න ලබ්භා මනුස්සෙන, අමනුස්සෙන වා පුන [පන (පෙ. ව. 215)];

ජාතො මෙ මා මරී පුත්තො, කුතො ලබ්භා අලබ්භියං.

174. න මන්තා මූලභෙසජ්ජා, ඔසධෙහි ධනෙන වා;

සක්කා ආනයිතුං කණ්හ, යං පෙතමනුසොචසි.

175. යස්ස එතාදිසා අස්සු, අමච්චා පුරිසපණ්ඩිතා;

යථා නිජ්ඣාපයෙ අජ්ජ, ඝටො පුරිසපණ්ඩිතො.

176. ආදිත්තං වත මං සන්තං, ඝතසිත්තංව පාවකං;

වාරිනා විය ඔසිඤ්චං, සබ්බං නිබ්බාපයෙ දරං.

177. අබ්බහී වත මෙ සල්ලං, යමාසි හදයස්සිතං;

යො මෙ සොකපරෙතස්ස, පුත්තසොකං අපානුදි.

178. සොහං අබ්බූළ්හසල්ලොස්මි, වීතසොකො අනාවිලො;

න සොචාමි න රොදාමි, තව සුත්වාන මාණව [භාතික (පෙ. ව. 224)].

179. එවං කරොන්ති සප්පඤ්ඤා, යෙ හොන්ති අනුකම්පකා;

නිවත්තයන්ති සොකම්හා, ඝටො ජෙට්ඨංව භාතරන්ති.

ඝටපණ්ඩිතජාතකං සොළසමං.

දසකනිපාතං නිට්ඨිතං.