450. බිලාරකොසියජාතකං (12)

125. අපචන්තාපි දිච්ඡන්ති, සන්තො ලද්ධාන භොජනං;

කිමෙව ත්වං පචමානො, යං න දජ්ජා න තං සමං.

126. මච්ඡෙරා ච පමාදා ච, එවං දානං න දිය්‍යති;

පුඤ්ඤං ආකඞ්ඛමානෙන, දෙය්‍යං හොති විජානතා.

127. යස්සෙව භීතො න දදාති මච්ඡරී, තදෙවාදදතො භයං;

ජිඝච්ඡා ච පිපාසා ච, යස්ස භායති මච්ඡරී;

තමෙව බාලං ඵුසති, අස්මිං ලොකෙ පරම්හි ච.

128. තස්මා විනෙය්‍ය මච්ඡෙරං, දජ්ජා දානං මලාභිභූ;

පුඤ්ඤානි පරලොකස්මිං, පතිට්ඨා හොන්ති පාණිනං.

129. දුද්දදං දදමානානං, දුක්කරං කම්ම කුබ්බතං;

අසන්තො නානුකුබ්බන්ති, සතං ධම්මො දුරන්නයො.

130. තස්මා සතඤ්ච අසතං [අසතඤ්ච (සී. ස්‍යා. පී.)], නානා හොති ඉතො ගති;

අසන්තො නිරයං යන්ති, සන්තො සග්ගපරායනා.

131. අප්පස්මෙකෙ [අප්පම්පෙකෙ (ස්‍යා.)] පවෙච්ඡන්ති, බහුනෙකෙ න දිච්ඡරෙ;

අප්පස්මා දක්ඛිණා දින්නා, සහස්සෙන සමං මිතා.

132. ධම්මං චරෙ යොපි සමුඤ්ඡකං චරෙ, දාරඤ්ච පොසං දදමප්පකස්මිං [දදං අප්පකස්මිපි (පී.)];

සතං සහස්සානං සහස්සයාගිනං, කලම්පි නාග්ඝන්ති තථාවිධස්ස තෙ.

133. කෙනෙස යඤ්ඤො විපුලො මහග්ඝතො [මහග්ගතො (සං. නි. 1.32)], සමෙන දින්නස්ස න අග්ඝමෙති;

කථං සතං සහස්සානං [කථං සහස්සානං (සී. ස්‍යා. පී.)] සහස්සයාගිනං, කලම්පි නාග්ඝන්ති තථාවිධස්ස තෙ.

134. දදන්ති හෙකෙ විසමෙ නිවිට්ඨා, ඡෙත්වා [ඣත්වා (සී. පී.), ඝත්වා (ස්‍යා.)] වධිත්වා අථ සොචයිත්වා;

සා දක්ඛිණා අස්සුමුඛා සදණ්ඩා, සමෙන දින්නස්ස න අග්ඝමෙති;

එවං සතං සහස්සානං [එවං සහස්සානං (සී. ස්‍යා. පී.)] සහස්සයාගිනං, කලම්පි නාග්ඝන්ති තථාවිධස්ස තෙති.

බිලාරකොසියජාතකං ද්වාදසමං.