451. චක්කවාකජාතකං (13)
135. වණ්ණවා අභිරූපොසි, ඝනො සඤ්ජාතරොහිතො;
චක්කවාක සුරූපොසි, විප්පසන්නමුඛින්ද්‍රියො.
136. පාඨීනං පාවුසං මච්ඡං, බලජං [වාලජං (සී. පී.), බලජ්ජං (ස්‍යා.)] මුඤ්ජරොහිතං;
ගඞ්ගාය තීරෙ නිසින්නො [ගඞ්ගාතීරෙ නිසින්නොසි (ස්‍යා. ක.)], එවං භුඤ්ජසි භොජනං.
137. න වාහමෙතං [සබ්බත්ථපි සමානං] භුඤ්ජාමි, ජඞ්ගලානොදකානි වා;
අඤ්ඤත්‍ර සෙවාලපණකා, එතං [අඤ්ඤං (ස්‍යා.)] මෙ සම්ම භොජනං.
138. න වාහමෙතං සද්දහාමි, චක්කවාකස්ස භොජනං;
අහම්පි සම්ම භුඤ්ජාමි, ගාමෙ ලොණියතෙලියං.
139. මනුස්සෙසු කතං භත්තං, සුචිං මංසූපසෙචනං;
න ච මෙ තාදිසො වණ්ණො, චක්කවාක යථා තුවං.
140. සම්පස්සං අත්තනි වෙරං, හිංසයං [හිංසාය (ස්‍යා. පී. ක.)] මානුසිං පජං;
උත්‍රස්තො ඝසසී භීතො, තෙන වණ්ණො තවෙදිසො.
141. සබ්බලොකවිරුද්ධොසි, ධඞ්ක පාපෙන කම්මුනා;
ලද්ධො පිණ්ඩො න පීණෙති, තෙන වණ්ණො තවෙදිසො.
142. අහම්පි [අහඤ්ච (?)] සම්ම භුඤ්ජාමි, අහිංසං සබ්බපාණිනං;
අප්පොස්සුක්කො නිරාසඞ්කී, අසොකො අකුතොභයො.
143. සො කරස්සු ආනුභාවං, වීතිවත්තස්සු සීලියං;
අහිංසාය චර ලොකෙ, පියො හොහිසි මංමිව.
144. යො න හන්ති න ඝාතෙති, න ජිනාති න ජාපයෙ;
මෙත්තංසො සබ්බභූතෙසු, වෙරං තස්ස න කෙනචීති.
චක්කවාකජාතකං තෙරසමං.