445. නිග්‍රොධජාතකං (7)
72. න වාහමෙතං [න චාහමෙතං (සී.)] ජානාමි, කො වායං කස්ස වාති වා [චාති වා (සී.)];
යථා සාඛො චරි [වදී (සී. ස්‍යා. පී.)] එවං, නිග්‍රොධ කින්ති මඤ්ඤසි.
73. තතො ගලවිනීතෙන, පුරිසා නීහරිංසු මං;
දත්වා මුඛපහාරානි, සාඛස්ස වචනංකරා.
74. එතාදිසං දුම්මතිනා, අකතඤ්ඤුන දුබ්භිනා;
කතං අනරියං සාඛෙන, සඛිනා තෙ ජනාධිප.
75. න වාහමෙතං ජානාමි, නපි මෙ කොචි සංසති;
යං මෙ ත්වං සම්ම අක්ඛාසි, සාඛෙන කාරණං [කඩ්ඪනං (සී. ස්‍යා.)] කතං.
76. සඛීනං සාජීවකරො, මම සාඛස්ස චූභයං;
ත්වං නොසිස්සරියං දාතා, මනුස්සෙසු මහන්තතං;
තයාමා ලබ්භිතා ඉද්ධී, එත්ථ මෙ නත්ථි සංසයො.
77. යථාපි බීජමග්ගිම්හි, ඩය්හති න විරූහති;
එවං කතං අසප්පුරිසෙ, නස්සති න විරූහති.
78. කතඤ්ඤුම්හි ච පොසම්හි, සීලවන්තෙ අරියවුත්තිනෙ;
සුඛෙත්තෙ විය බීජානි, කතං තම්හි න නස්සති.
79. ඉමං ජම්මං නෙකතිකං, අසප්පුරිසචින්තකං;
හනන්තු සාඛං සත්තීහි, නාස්ස ඉච්ඡාමි ජීවිතං.
80. ඛමතස්ස මහාරාජ, පාණා න පටිආනයා [දුප්පටිආනයා (සී. ස්‍යා. පී.)];
ඛම දෙව අසප්පුරිසස්ස, නාස්ස ඉච්ඡාමහං වධං.
81. නිග්‍රොධමෙව සෙවෙය්‍ය, න සාඛමුපසංවසෙ;
නිග්‍රොධස්මිං මතං සෙය්‍යො, යඤ්චෙ සාඛස්මි ජීවිතන්ති.
නිග්‍රොධජාතකං සත්තමං.