446. තක්කලජාතකං (8)

82. න තක්කලා සන්ති න ආලුවානි [ආලුපානි (සී. ස්‍යා. පී.)], න බිළාලියො න කළම්බානි තාත;

එකො අරඤ්ඤම්හි සුසානමජ්ඣෙ, කිමත්ථිකො තාත ඛණාසි කාසුං.

83. පිතාමහො තාත සුදුබ්බලො තෙ, අනෙකබ්‍යාධීහි දුඛෙන ඵුට්ඨො;

තමජ්ජහං නිඛණිස්සාමි සොබ්භෙ, න හිස්ස තං ජීවිතං රොචයාමි.

84. සඞ්කප්පමෙතං පටිලද්ධ පාපකං, අච්චාහිතං කම්ම කරොසි ලුද්දං;

මයාපි තාත පටිලච්ඡසෙ තුවං, එතාදිසං කම්ම ජරූපනීතො;

තං කුල්ලවත්තං අනුවත්තමානො, අහම්පි තං නිඛණිස්සාමි සොබ්භෙ.

85. ඵරුසාහි වාචාහි පකුබ්බමානො, ආසජ්ජ මං ත්වං වදසෙ කුමාර;

පුත්තො මමං ඔරසකො සමානො, අහිතානුකම්පී මම ත්වංසි පුත්ත.

86. න තාහං [ත්‍යාහං (ස්‍යා.)] තාත අහිතානුකම්පී, හිතානුකම්පී තෙ අහම්පි [අහඤ්හි (ස්‍යා.)] තාත;

පාපඤ්ච තං කම්ම පකුබ්බමානං, අරහාමි නො වාරයිතුං තතො.

87. යො මාතරං වා පිතරං සවිට්ඨ [මාතරං පිතරං වා වසිට්ඨ (සී. පී.)], අදූසකෙ හිංසති පාපධම්මො;

කායස්ස භෙදා අභිසම්පරායං, අසංසයං සො නිරයං උපෙති [පරෙති (සී. පී.)].

88. යො මාතරං වා පිතරං සවිට්ඨ, අන්නෙන පානෙන උපට්ඨහාති;

කායස්ස භෙදා අභිසම්පරායං, අසංසයං සො සුගතිං උපෙති.

89. න මෙ ත්වං පුත්ත අහිතානුකම්පී, හිතානුකම්පී මෙ [මම (?)] ත්වංසි පුත්ත;

අහඤ්ච තං මාතරා වුච්චමානො, එතාදිසං කම්ම කරොමි ලුද්දං.

90. යා තෙ සා භරියා අනරියරූපා, මාතා මමෙසා සකියා ජනෙත්ති;

නිද්ධාපයෙ [නිද්ධාමසෙ (පී.)] තඤ්ච සකා අගාරා, අඤ්ඤම්පි තෙ සා දුඛමාවහෙය්‍ය.

91. යා තෙ සා භරියා අනරියරූපා, මාතා මමෙසා සකියා ජනෙත්ති;

දන්තා කරෙණූව වසූපනීතා, සා පාපධම්මා පුනරාවජාතූති.

තක්කලජාතකං අට්ඨමං.