443. චූළබොධිජාතකං (5)

49. යො තෙ ඉමං විසාලක්ඛිං, පියං සම්හිතභාසිනිං [සම්මිල්ලභාසිනිං (සී. පී.), සම්මිල්ලහාසිනිං (ස්‍යා.)];

ආදාය බලා ගච්ඡෙය්‍ය, කිං නු කයිරාසි බ්‍රාහ්මණ.

50. උප්පජ්ජෙ [උප්පජ්ජ (සී. පී.)] මෙ න මුච්චෙය්‍ය, න මෙ මුච්චෙය්‍ය ජීවතො;

රජංව විපුලා වුට්ඨි, ඛිප්පමෙව නිවාරයෙ [නිවාරයිං (ක.)].

51. යං නු පුබ්බෙ විකත්ථිත්ථො [විකත්ථිතො (ක. සී. ස්‍යා. ක.)], බලම්හිව අපස්සිතො;

ස්වජ්ජ තුණ්හිකතො [තුණ්හිකතො (සී.), තුණ්හික්ඛකො (පී.)] දානි, සඞ්ඝාටිං සිබ්බමච්ඡසි.

52. උප්පජ්ජි මෙ න මුච්චිත්ථ, න මෙ මුච්චිත්ථ ජීවතො;

රජංව විපුලා වුට්ඨි, ඛිප්පමෙව නිවාරයිං.

53. කිං තෙ උප්පජ්ජි නො මුච්චි, කිං තෙ න මුච්චි ජීවතො;

රජංව විපුලා වුට්ඨි, කතමං ත්වං නිවාරයි.

54. යම්හි ජාතෙ න පස්සති, අජාතෙ සාධු පස්සති;

සො මෙ උප්පජ්ජි නො මුච්චි, කොධො දුම්මෙධගොචරො.

55. යෙන ජාතෙන නන්දන්ති, අමිත්තා දුක්ඛමෙසිනො;

සො මෙ උප්පජ්ජි නො මුච්චි, කොධො දුම්මෙධගොචරො.

56. යස්මිඤ්ච ජායමානම්හි, සදත්ථං නාවබුජ්ඣති;

සො මෙ උප්පජ්ජි නො මුච්චි, කොධො දුම්මෙධගොචරො.

57. යෙනාභිභූතො කුසලං ජහාති, පරක්කරෙ විපුලඤ්චාපි අත්ථං;

ස භීමසෙනො බලවා පමද්දී, කොධො මහාරාජ න මෙ අමුච්චථ.

58. කට්ඨස්මිං මත්ථමානස්මිං [මන්ථමානස්මිං (පී.), මද්දමානස්මිං (ක.)], පාවකො නාම ජායති;

තමෙව කට්ඨං ඩහති, යස්මා සො ජායතෙ ගිනි.

59. එවං මන්දස්ස පොසස්ස, බාලස්ස අවිජානතො;

සාරම්භා [සාරබ්භා (ක.)] ජායතෙ කොධො, සොපි තෙනෙව ඩය්හති.

60. අග්ගීව තිණකට්ඨස්මිං, කොධො යස්ස පවඩ්ඪති;

නිහීයති තස්ස යසො, කාළපක්ඛෙව චන්දිමා.

61. අනෙධො [අනින්ධො (සී. ක.), අනින්දො (ස්‍යා.)] ධූමකෙතූව, කොධො යස්සූපසම්මති;

ආපූරති තස්ස යසො, සුක්කපක්ඛෙව චන්දිමාති.

චූළබොධිජාතකං පඤ්චමං.