442. සඞ්ඛජාතකං (4)

39. බහුස්සුතො සුතධම්මොසි සඞ්ඛ, දිට්ඨා තයා සමණබ්‍රාහ්මණා ච;

අථක්ඛණෙ දස්සයසෙ විලාපං, අඤ්ඤො නු කො තෙ පටිමන්තකො මයා.

40. සුබ්භූ [සුබ්භා (ස්‍යා.), සුම්භා, සුභ්මා (ක.)] සුභා සුප්පටිමුක්කකම්බු, පග්ගය්හ සොවණ්ණමයාය පාතියා;

‘‘භුඤ්ජස්සු භත්තං’’ ඉති මං වදෙති, සද්ධාවිත්තා [සද්ධාචිත්තා (සී. පී. ක.)], තමහං නොති බ්‍රූමි.

41. එතාදිසං බ්‍රාහ්මණ දිස්වාන [දිස්ව (සී. පී.)] යක්ඛං, පුච්ඡෙය්‍ය පොසො සුඛමාසිසානො [සුඛමාසසානො (ස්‍යා.), සුඛමාසිසමානො (ක.)];

උට්ඨෙහි නං පඤ්ජලිකාභිපුච්ඡ, දෙවී නුසි ත්වං උද මානුසී නු.

42. යං ත්වං සුඛෙනාභිසමෙක්ඛසෙ මං, භුඤ්ජස්සු භත්තං ඉති මං වදෙසි;

පුච්ඡාමි තං නාරි මහානුභාවෙ, දෙවී නුසි ත්වං උද මානුසී නු.

43. දෙවී අහං සඞ්ඛ මහානුභාවා, ඉධාගතා සාගරවාරිමජ්ඣෙ;

අනුකම්පිකා නො ච පදුට්ඨචිත්තා, තවෙව අත්ථාය ඉධාගතාස්මි.

44. ඉධන්නපානං සයනාසනඤ්ච, යානානි නානාවිවිධානි සඞ්ඛ;

සබ්බස්ස ත්‍යාහං පටිපාදයාමි, යං කිඤ්චි තුය්හං මනසාභිපත්ථිතං.

45. යං කිඤ්චි යිට්ඨඤ්ච හුතඤ්ච [යිට්ඨංව හුතංව (සී. පී.)] මය්හං, සබ්බස්ස නො ඉස්සරා ත්වං සුගත්තෙ;

සුසොණි සුබ්භමු [සුබ්භු (සී.), සුබ්භා (ස්‍යා.)] සුවිලග්ගමජ්ඣෙ [සුවිලාකමජ්ඣෙ (ස්‍යා. පී. සී. අට්ඨ.), සුවිලාතමජ්ඣෙ (ක.)], කිස්ස මෙ කම්මස්ස අයං විපාකො.

46. ඝම්මෙ පථෙ බ්‍රාහ්මණ එකභික්ඛුං, උග්ඝට්ටපාදං තසිතං කිලන්තං;

පටිපාදයී සඞ්ඛ උපාහනානි [උපාහනාහි (සී. පී.)], සා දක්ඛිණා කාමදුහා තවජ්ජ.

47. සා හොතු නාවා ඵලකූපපන්නා, අනවස්සුතා එරකවාතයුත්තා;

අඤ්ඤස්ස යානස්ස න හෙත්ථ [න හත්ථි (පී.)] භූමි, අජ්ජෙව මං මොළිනිං පාපයස්සු.

48. සා තත්ථ විත්තා සුමනා පතීතා, නාවං සුචිත්තං අභිනිම්මිනිත්වා;

ආදාය සඞ්ඛං පුරිසෙන සද්ධිං, උපානයී නගරං සාධුරම්මන්ති.

සඞ්ඛජාතකං චතුත්ථං.