15. මහාලොමහංසචරියා
119. ‘‘සුසානෙ සෙය්‍යං කප්පෙමි, ඡවට්ඨිකං උපනිධායහං;
ගාමණ්ඩලා [ගොමණ්ඩලා (සී.), ගාමමණ්ඩලා (ස්‍යා.)] උපාගන්ත්වා, රූපං දස්සෙන්තිනප්පකං.
120. ‘‘අපරෙ ගන්ධමාලඤ්ච, භොජනං විවිධං බහුං;
උපායනානූපනෙන්ති, හට්ඨා සංවිග්ගමානසා.
121. ‘‘යෙ මෙ දුක්ඛං උපහරන්ති, යෙ ච දෙන්ති සුඛං මම;
සබ්බෙසං සමකො හොමි, දයා කොපො න විජ්ජති.
122. ‘‘සුඛදුක්ඛෙ තුලාභූතො, යසෙසු අයසෙසු ච;
සබ්බත්ථ සමකො හොමි, එසා මෙ උපෙක්ඛාපාරමී’’ති.
මහාලොමහංසචරියං පන්නරසමං.
යුධඤ්ජයවග්ගො තතියො.