9. ඨිතඤ්ජලියත්ථෙරඅපදානං

42. ‘‘මිගලුද්දො පුරෙ ආසිං, අරඤ්ඤෙ කානනෙ අහං;

තත්ථ අද්දසං [තත්ථද්දසාසිං (සී. ස්‍යා.)] සම්බුද්ධං, බාත්තිංසවරලක්ඛණං.

43. ‘‘තත්ථාහං අඤ්ජලිං කත්වා, පක්කාමිං පාචිනාමුඛො;

අවිදූරෙ නිසින්නස්ස, නියකෙ පණ්ණසන්ථරෙ.

44. ‘‘තතො මෙ අසනීපාතො, මත්ථකෙ නිපතී තදා;

සොහං මරණකාලම්හි, අකාසිං පුනරඤ්ජලිං.

45. ‘‘ද්වෙනවුතෙ ඉතො කප්පෙ, අඤ්ජලිං අකරිං තදා;

දුග්ගතිං නාභිජානාමි, අඤ්ජලිස්ස ඉදං ඵලං.

46. ‘‘චතුපණ්ණාසකප්පම්හි, මිගකෙතුසනාමකො;

සත්තරතනසම්පන්නො, චක්කවත්තී මහබ්බලො.

47. ‘‘පටිසම්භිදා චතස්සො…පෙ… කතං බුද්ධස්ස සාසනං’’.

ඉත්ථං සුදං ආයස්මා ඨිතඤ්ජලියො ථෙරො ඉමා ගාථායො අභාසිත්ථාති.

ඨිතඤ්ජලියත්ථෙරස්සාපදානං නවමං.